Amăng đang hmua prong rơbêh 1 ektar ƀơi să Ea Na (Dak Lak), tơhan rơka Trần Quốc Đài hrŏm hăng bơnai ñu yak nao bơyan pĕ pơhrui sầu riêng. Mơnuih ngă hmua kiăng gir run anun ăt djă ba tơlơi ruă kă yua djơ̆ boh phao amăng rơnuk blah wang. Ơi Đài mut ngă tơhan thun 1976, djru blah wang ƀơi dêh čar Kur. Amăng sa tal hyu ĕp kơsung blah hăng Khmer Đỏ, ñu djơ̆ kơnông ayăt ƀơi kơ-iăng, tơngan hăng tơkai. Tơdơi kơ pơjrao suaih, ñu tŏ tui nao blah ngă truh hrơi pơgiong bruă jao hăng tơbiă mơng ngă tơhan thun 1981. Pơwot glăi tơlơi hơdip tui hơđăp, ñu gir run pla kơphê, tiu laih anun khin hơtai pla sầu riêng. Truh ră anai, đang hmua prong rơbêh 1 ektar dưi pơhrui glăi giăm 900 klăk prăk rĭm thun. Hăng ơi Trần Quốc Đài, yua rơka rơkač yua anun lơm mă bruă ăt glêh glar pơhmu hăng ƀing pơkŏn, samơ̆ ăt ƀu ngă ñu tơdu pran jua ôh. “Mah ta ngă bruă hơget lêng kơ glêh glar soh, ƀing găng añrăng ngă hmua ăt glêh glar yơh, bơ kâo pô tơhan rơka amra glêh lu ƀiă. Yua anun ngă hơget kiăng găp ƀrô, mă bruă 6 mông pơdơi, bơ arăng mă bruă 8 mông. Ta gir tui ƀơƀrư̆ amra dưi ngă lu bruă dong”.

Giăm hăng đang hmua ơi Trần Quốc Đài lĕ đang pla sầu riêng glăk mơtah mơda mơng tơhan rơka Hà Văn Quảng. Tơdơi kơ thun blan djru blah wang pơ tač rơngiao ƀơi dêh čar Kur, ñu nao pơ Dak Lak bơwih ƀong huă tui hơdră ba mơnuih hyu bơwih ƀong. Giong ngă tơhan, ñu tŏ tui ngă kông ang, tơhan amăng plơi pla laih dong ngă Khua git gai Ping gah să Ea Bông hlâo kơ pơdơi lơtret. Tơdơi kơ pơdơi bruă, tơhan hơđăp pơwot glăi ngă đang hmua. Mơng hmua prong 1 ektar hơmâo kơphê pla pơplah hrŏm sầu riêng, sang anŏ ñu hơmâo prăk pơhrui hơđong mơng 600-700 klăk prăk rĭm thun.

Hăng mơnuih ƀôn sang, tơlơi yôm hloh mơng ơi Quảng ƀu djơ̆ kơnong lĕ đang hmua pơhrui glăi lu đôč ôh mơ̆ ñu ăt pơdah pran ba jơlan hlâo mơng tơhan hơđăp. Lơm ƀon lan pok prong jơlan amăng plơi pla, ñu pơyơr lŏn giăm 100 met karê. Yua thâo bơwih ƀong huă, ñu amra črâo brơi ƀing ding kơna tơhan hơđăp hăng neh met wa bơwih brơi phun kơphê, sầu riêng kiăng hơmâo lu dong prăk pơhrui. Ơi Hà Văn Quảng brơi thâo: “Lơm pơdơi lơtret, kâo glăi bơwih ƀong ngă đang hmua hrŏm sang anŏ. Hăng sa čô tơhan hơđăp, kiăng tŏ tui gru hơdip mơng tơhan rơnuk wa Hô, kâo amra ba jơlan hlâo kiăng neh met wa jum dar ngă tui.”

Tơdơi kơ pơmut hrŏm anih anom gưl să, Khul tơhan hơđăp să Ea Na (tơring čar Dak Lak) hơmâo 861 čô ding kơna, amăng anun 39 mơnuih lĕ tơhan hơđăp, tơhan rơka. Lu ding kơna mah thun tha, ƀu hơmâo pran dong tah samơ̆ ăt mut hrŏm hơdôm bruă mă amăng ƀon lan. Ơi Trần Quốc Đài hăng ơi Hà Văn Quảng lĕ dua čô mơnuih ba gru hơmâo khul ruah kiăng pok prong hơbô̆ bruă bơwih ƀong huă. Ơi Phương Toại Nguyện, kơ-iăng Khua khul tơhan hơđăp să Ea Na brơi thâo, ơi Đài hăng ơi Quảng ăt juăt črâo ba ƀing ding kơna kơ boh thâo bơwih brơi phun kơphê, sầu riêng, tiu; djru brơi hơdôm boh sang anŏ dŏ tơnap tap hrưn đĭ hơđong tơlơi hơdip mơda. “Amăng jơnum pơƀut tui tơđar rĭm blan, rĭm rơwang, ƀing gơmơi lêng kơ pơjing jơlan hơdră hyu čuă lăng hơdôm hơbô̆ bruă pơđĭ kyar bơwih ƀong huă tŭ yua. Ƀing gơmơi hơmâo pơtô pơblang, pok prong hơbô̆ bruă anai tơl ƀing ding kơna aka ƀu thâo bơwih brơi phun kơphê, sầu riêng, tiu hăng bruă ba ƀing ding kơna nao tơl đang hmua ĕp lăng….”

Blah wang pơđut sui laih, hơdôm nam rơka rơkač ăt dŏ mơn, samơ̆ hăng pran gir run mơng ling tơhan ƀu dŏ glăi mơng hrơi tơbiă ngă tơhan. Mơng hơdôm tơdron blah wang đưm truh pơ hơdôm blah đang kơphê, sầu riêng ră anai, ƀing gơñu ăt kret kruai gir run mă bruă, hăng pran jua ba jơlan hlâo, gơgrong hăng plơi pla. Anai ăt lĕ rup rap jê̆ giăm, sit nik mơng gru tơhan rơnuk wa Hô amăng thun blan rơngai: Ƀu djơ̆ kơnong nao blah ngă lơm lŏn ia kiăng đôč ôh mơ̆ ăt gir run pơjing plơi pla lơm lŏn ia ta rơngai./.