Kơthel mrô 13, hăng sit biă ñu lĕ hơjan ia ling dăo kơtang hloh rơnuč blan 11/2025 ngă 1.653 boh sang kual Tong krah hăng Dap kơdư glưh răm rai, rơbêh 35.000 boh sang răm rai, hơdôm rơbăn boh sang anŏ lê̆ amăng tơlơi glêh tơnap. Lơm ia hơđoh trun, lŏn čuah ăt dor hlŏm djop anih kual Dơnung tong krah, Khua dêh čar ơi Phạm Minh Chính hơmâo nao pơ kual tong krah gah Ngŏ Dak Lak, hơmâo tơlơi iâu pơthưr: pơkra ming hăng man pơdong glăi sang brơi mơnuih ƀôn sang tơdơi kơ bưp tơlơi rơngiă djop mơta:

“Ƀing ta pơphun “Hơdră ngă bruă tui Quang Trung” ngă tui ječ ameč, khut khăt amăng bruă man pơdong sang dŏ. Hơdră bruă tui Quang Trung pơsir hĭ 2 bruă bơdjơ̆ nao sang dŏ. Sa lĕ kaih hloh hlâo lơ 31/1/2026 djop sang glưh răm rai, sang ia kor đuăi kiăng man pơdong glăi. Bruă tal 2, pơkra ming sang răm rai kiăng giong hlâo kơ lơ 31/12/2025”.

Sa hrơi tơdơi kơ tơlơi jak iâu mơng Khua dêh čar, lơ 1/12, mơng Hà Tĩnh truh pơ Lâm Đồng, sit biă ñu ƀơi kual bơdjơ̆ nao kơtang mơng hơjan kơthel ƀơi Dak Lak, Khánh Hòa, Gia Lai, rơbêh 5.600 čô mơnuih apăn bruă, ling tơhan mơng hơdôm anom bruă ling tơhan; giăm 5.100 čô mơnuih apăn bruă, ling tơhan, kông ang hơmâo pơkiăo nao djru brơi.

Mơmŏt trun rai tañ biă ƀơi kual lŏn dăo Hòa Thịnh (Dak Lak). Hrŏm hăng jua ur mơng arŏng aroač, hlŭ dơluh ăt dŏ čuik čoak, apui kơđen ƀơi hơdôm ring bruă ăt dŏ lu ling tơhan glăk pơdŭ hyu čuah pơtâo, glăm hyu gơnam, ƀing gơñu pơphun ha mông mă bruă phara; man pơdong glăi sang brơi mơnuih ƀôn sang mơng hơdôm luh atur sang dơlăm. Ƀu dŏ glăi ƀơi đing prep ayŭp, ƀu hơmâo tơlơi pơsit hơget, “Hơdră ngă bruă tui Quang Trung” ječ ameč man djru brơi, pơdŭ pơgiăng nao čuah pơtâo hăng tơkai hlŭ rơbat nao rai amăng mơmŏt mlăm.

Trung uý Hồ Hoài Phin, grup tơhan mrô 1, Trung đoàn 143, Sư đoàn 315 (Quân khu 5) brơi thâo, ƀơi hơdôm boh sang atur lŏn kiăng pơkra glăi yua lŏn djrưh đơi.

“Lŏn hlŭ dơluh tui anai ƀlĭu biă mă, tơlơi anai ngă glêh tơnap brơi bruă mă. Mah lu tơlơi tơnap tap samơ̆ hăng pran gơgrong hloh, ƀing adơi ayong ăt gir run pơgiong djop bruă jao, pơhlôm brơi kjăp hloh”.

“Ječ ameč” lĕ pran ngă bruă mơng hơdră ngă bruă tui Quang Trung, samơ̆ kiăng tơpă ară hăng bruă pơkra kjăp kiăng djơ̆ hăng hrơi mông pơkă. Thượng tá Đỗ Thành Thái, Khua tơhan Sư đoàn 315 (Quân khu 5) brơi thâo, kơnong hơmâo sa tơlơi kiăng hơdôm grup man pơdong dưi ngă 2 tơlơi rơkâo, anun lĕ kiăng gir run, mă bruă tơhrơi kah hăng mlăm.  

“Ayuh hyăng ƀu gêh gal, hơjan sui hrơi, samơ̆ ƀing gơmơi lêng kơ pơtă pơtăn ƀing apăn bruă, ling tơhan hăng pran jua hơkrŭ glăi tơnap tap. Pơpha 3 ka, 4 kíp, sit biă ñu lĕ pơkiăo nao ling tơhan mă bruă tơhrơi kah hăng mlăm kiăng dưi pơgiong bruă jao”.

Hăng pran jua “Găn rơgao pơ-iă hơjan, mă bruă tơhrơi mlăm”, ƀing apăn bruă, ling tơhan mut hrŏm “Hơdră ngă bruă tui Quang Trung” anăm brơi ngă kaih. Mơng mơguah sing bring truh mơmŏt mlăm, ƀing ling tơhan sum ao hlŭ čuik čoak, ăt djă kơthung pơdŭ simăng, đĭ trun man pơkra. Git gai gum hrŏm, abih bang ling tơhan gum ngă bruă kơtrâ̆o.

Hăng mơnuih ƀôn sang kual ia ling dăo, bruă ƀuh ƀơi anăp hơdôm boh sang glăk ƀơƀrư̆ man pơdong giong amăng mơmŏt mlăm ƀu djơ̆ kơnong lĕ tơlơi hok mơ-ak đôč ôh mơ̆ ăt lĕ tơlơi pơ alum pran jua tơdơi kơ hrơi rơngiă djop mơta. Ơi Lê Hùng Nhựt, dŏ amăng plơi Mỹ Điền, să Hòa Thịnh, tơring čar Dak Lak brơi thâo:

“Kơnuk kơna ba ling tơhan nao djru mơnuih ƀôn sang tui anai ngă ƀing gơmơi hok mơ-ak biă mă, kâo pơpŭ bơni biă mă. Tơdơi ƀuh hơmâo ling tơhan djru brơi, aka ƀu lăi nao bruă man pơdong sang, bruă rơmet pơagaih jum dar ăt ngă glêh tơnap mơn”.

Tơdơi kơ 3 wŏt hrơi tơjuh pok pơhai “Hơdră ngă bruă tui Quang Trung”, hơdôm boh sang phrâo glăk pơdong đĭ. Anai ƀu djơ̆ kơnong lĕ anih pơging brơi pơ-iă hơjan, kiăng mơnuih ƀôn sang dŏ glăi plơi pla tơdơi kơ hơjan ia ling dăo. “Hơdră bruă ngă tui Quang Trung” hơmâo găn rơgao djop tơlơi tơnap amăng bruă rŭ pơdong glăi anŏ răm rai, jing sa tơlơi pơƀuh hiam kơ pran gum pơgôp hăng tơlơi glăm ba bruă kơđi čar ƀơi anăp mơnuih ƀôn sang. Tơlơi git gai mơng mơnuih apăn bruă kơnuk kơna hơmâo pơtruh nao rai hăng pran jua ječ ameč mơng ling tơhan. Hơdôm boh sang dŏ jang jai amra ruh hĭ, kiăng mut dŏ hơdôm boh sang phrâo, anai lĕ tơlơi kơđŏm glăi pran gir run ngă bruă hăng pran khăp pap. Hơdôm tơlơi kơđŏm glăi anai ăt pơjing rai mơng tơlơi pơčeh phrâo, pơhlôm sir kjăp hăng tañ hloh, djru brơi mơnuih ƀôn sang rơnuk rơnua amăng hơdôm hrơi hơjan kơthel./.