Pơhiăp ƀơi mông bưp, Khua git gai pơ ala mơnuih ƀôn sang dêh čar Vương Đình Huệ lăi, ƀing khua pơ ala hơmâo sa thun mă bruă truh kih hăng 10 tơlơi jơnum hmư̆ hing hơmâo anom bruă čih hră pơhing ruah. Biă ñu, amăng hơdôm hrơi ngă bruă blung a thun 2024, Khua mua pơ ala mơnuih ƀôn sang hơmâo pơphun truh kih mông Jơnum ƀu pơkă hlâo tal 5, hơmâo pơsit lu tơlơi yôm phun, biă ñu lĕ pơsit Tơlơi phiăn Lŏn tơnah (pơkra glăi) hăng Tơlơi phiăn anom bruă brơi čan prăk (pơkra glăi), hơmâo ƀing kơhnâo, mơnuih ƀôn sang, anom bơwih ƀong amăng hăng gah rơngiao dêh čar lăng yôm. Hlâo či pơdơi tê̆t, Khua git gai pơ ala mơnuih ƀôn sang hơmâo kĭ pơsit dua tơlơi phiăn yôm anai.

Pơ ala kơ Ping gah mơ̆ng Ƀirô pơ ala mơnuih ƀôn sang dêh čar, Jơnum min apăn bruă pơ ala mơnuih ƀôn sang, Khua git gai pơ ala mơnuih ƀôn sang pơpŭ bơni kơ ƀing khua pơ ala, hơdôm anom bruă mơ̆ng Ƀirô khua pơ ala mơnuih ƀôn sang, hơdôm anom bruă mơ̆ng Jơnum min apăn bruă pơ ala mơnuih ƀôn sang dêh čar, ƀing khua mua, mơnuih mă bruă mơ̆ng anom bruă pơ ala mơnuih ƀôn sang abih pran jua ngă bruă, pơčeh phrâo ba truh tơlơi truh kih prong mơ̆ng thun 2023.

Thun 2024 jing sa thun yôm biă, jing thun hơdôm anom bruă, djŏp gưl, anom bruă, plơi pla khŏm gir hloh đah mơ̆ng dưi ngă hơdôm rơnoh pơkă bơwih ƀong huă - mơnuih mơnam mơ̆ng abih rơwang thun, Khua git gai pơ ala mơnuih ƀôn sang lăi, ƀing khua pơ ala pơ-ư pơ-ang kơ hơdôm tơlơi dưi ngă amăng thun 2023, samơ̆ ƀu dưi wơr hơbit ôh, khŏm gir hloh. Him lăng bruă amăg ha thun anai prong biă, rơngiao mơ̆ng hơdôm bruă yôm phun hơmâo ngă na nao anun lĕ čih pơkra tơlơi phiăn, krăp lăng kơđi tơlơi, pơsit hơdôm bruă yôm phun hăng bruă pơkŏn dong, Anom bruă pơ ala mơnuih ƀôn sang khŏm gir prăp lui anăp nao 80 thun Hrơi ruah khua pơ ala mơnuih ƀôn sang blung a. Yua hnun, Khua git gai pơ ala mơnuih ƀôn sang Vương Đình Huệ pơtă:

“Kâo lăi lu wơ̆t laih, hrơi mông yơh yôm. Yua hnun, ƀing ta khŏm pơphun ngă bruă mơ̆ng hrơi blung a akŏ blan mơtăm laih anun tui hăng akŏ bruă ba tơbiă. Ƀing ta gir anăp nao anom bruă pơ ala mơnuih ƀôn sang jai hrơi mă bruă rơgơi, hơmâo tơlơi dưi dưm kơnar, djơ̆ tơlơi phiăn, samơ̆ kiăo tui tơlơi hơdip phrâo, djơ̆ hăng tơlơi kiăng sit nik mơn, pơhlôm bruă mă mơ̆ng Ƀirô khua pơ ala  lĕ gơñăm nao tơlơi klă hiam kơ dêh čar hăng djuai ania ta. Abih bang tơlơi pơtrun mơ̆ng ƀing khua pơ ala lĕ mă ană mơnuih hăng anom bơwih ƀong ngă phun. Hăng pran jua pơjing tơlơi phara aka ƀu phiah ƀuh jing tơlơi juăt ƀuh, hmao tlôn, pơhlôm akŏ pơdong lŏn ia đĭ kyar tañ, hơđong hăng mut hrŏm jar kmar”.

Khua git gai pơ ala mơnuih ƀôn sang pơtă kơ hơdôm anom bruă mơ̆ng khua pơ ala mơnuih ƀôn sang, hơdôm khul grup mơ̆ng Jơnum min apăn bruă pơ ala mơnuih ƀôn sang hăng ƀing khua, mơnuih mă bruă amăng Anom bruă pơ ala mơnuih ƀôn sang thâo kjăp tơlơi git gai mơ̆ng Khua git gai Ping gah Nguyễn Phú Trọng ƀơi mông bưp hăng pơpŭ bơni Tê̆t kơ ƀing khua, khua hơđăp mơ̆ng Ping gah, Kơnuk kơna anun lĕ: “Thun 2023 ta gum pơgôp yơh, thun 2024 ta khŏm gum pơgôp hloh dong. Thun 2023 truh kih yơh, thun 2024 ta khŏm truh kih hloh dong”.

Ƀrô akŏ bơyan bơnga thun phrâo, Khua git gai pơ ala mơnuih ƀôn sang dêh čar Vương Đình Huệ bơni hơ-ơč kơ ƀing khua pơ ala, mơnuih mă bruă mơ̆ng Jơnum min apăn bruă pơ ala mơnuih ƀôn sang, ƀing khua, mơnuih mă bruă mơ̆ng Anom bruă pơ ala mơnuih ƀôn sang hơmâo sa thun Giáp Thìn pơdrong sah.

Hlâo kơ anun, Khua čih pioh, Khua anom bruă pơ ala mơnuih ƀôn sang Bùi Văn Cường lăi pơthâo glăi bruă ngă amăng hrơi Tê̆t Giáp Thìn 2024. Tui anun, Jơnum min apăn bruă pơ ala mơnuih ƀôn sang hơmâo lăi pơthâo rơđah pơ Jơnum min wai lăng djuai ania, hơdôm Jơnum min mơ̆ng sang bruă pơ ala mơnuih ƀôn sang, anom bruă pơ ala mơnuih ƀôn sang, hơdôm anom bruă gah Jơnum min apăn bruă pơ ala mơnuih ƀôn sang wai lăng ngă tui khut khăt tơlơi pơčrâo trun mrô 26 mơ̆ng Khul gum bruă git gai Ping gah, Tơlơi pơčrâo trun mrô 30 mơ̆ng Khua dêh čar, laih dong pơtă kiăng ngă klă djŏp tơlơi djru tơlơi hơdip mơnuih ƀôn sang, lăng ba tơlơi hơdip ƀing khua, mơnuih mă bruă, sang anŏ kơnuk kơna djru, sang anŏ tơnap tap.

Bruă hyu čuă jơmư hrơi Tê̆t mơ̆ng Khua git gai pơ ala mơnuih ƀôn sang, ƀing Kơ-iăng khua, Ding kơna apăn bruă pơ ala mơnuih ƀôn sang tui tơlơi jao bruă hơmâo pơhlôm klă, rơnuk rơnua, thâo pơkrem, tŭ yua, lăp djơ̆ hăng tơlơi kiăng.

Hơdôm anom bruă pơ ala mơnuih ƀôn sang, anom bruă yua Jơnum min apăn bruă pơ ala mơnuih ƀôn sang wai lăng ječ ameč čih pơkra tơlơi pơtrun ngă bruă, pok pơhai bruă kiăng ngă thun 2024 pơhlôm djơ̆ hrơi pơkă./.