Tlam lơ 28/12, ƀơi să Ia Dom (tơring čar Gia Lai), Binh đoàn 15 (Ding jum ling tơhan) pơphun man pơdong sang rung brơi să Ia Dom. Anai lĕ ring bruă pok blung amăng jơlan hơdră man pơdong  9 boh sang rung jao brơi mơnuih ƀôn sang hơdôm boh să giăm guai gah Yŭ dua boh tơring čar Gia Lai hăng Quảng Ngãi. Tui tơlơi pơkă, 9 boh sang drông hơmâo tuh pơ alin man pơdong abih tih prăk nua ñu 20 klai prăk. Rĭm boh sang drông hơmâo lan sang prong 130 met karê, glông rơbêh 17 met. Hơdôm boh sang rung anai hơmâo man pơdong tui sang gru grua sô hơđăp, kiăng lăp djơ̆ hăng gru grua mơnuih djuai ania ƀơi kual giăm guai tơring čar Gia Lai hăng Quảng Ngãi.

Him lăng, 9 boh sang drông anai amra pơgiong hăng dưi mă yua amăng blan 9/2026. Đĭ pơhiăp amăng mông pok man pơdong, thượng tướng Trương Thiên Tô, Khua anom bruă kơđi čar ling tơhan dêh čar Việt Nam brơi thâo: bruă tuh pơ alin man pơdong sang rung ƀơi hơdôm boh să giăm guai mơnuih djuai ania ƀiă, kiăng hơkrŭ pran gum pơgôp abih bang mơnuih, pơjing kjăp “pran đăo gơnang mơng mơnuih ƀôn sang”, pơlir hăng bruă jao hơđong bruă kơđi čar, ling tơhan-wai pơgang rơnuk rơnua amăng ƀon lan.