Tal hơjan ia ling dăo kơtang hloh rơnuč thun anai phrâo rơgao ngă răm rai kơtang ƀơi hơdôm tơring čar, ƀôn prong kual Tong krah-Dap kơdư. Tơdơi kơ hơjan ia dăo, mơnuih ƀôn sang kual ia dăo ƀơƀrư̆ rŭ pơdong glăi, kiăng tañ hơđong tơlơi hơdip.

Ƀu djơ̆ kơnong djru mă mơnuih lơm ia dăo, tơdơi kơ anun, ƀing ling tơhan tŏ tui ƀuh ƀô̆ mơta ƀơi hơdôm ƀon lan kiăng rŭ pơdong glăi anŏ răm rai. Ƀing gơñu djru ƀơi anih ia dăo, kuăi rơmet hlŭ ƀơi sang ia jrao, anom bruă ia jrao, ƀơk gơnam ƀong brơi mơnuih ƀôn sang hăng djru brơi ƀing mơnuih ruă pơjrao sui hrơi yua hơjan ia ling dăo. Ơi ia jrao Võ Thôi, Kơ-iăng khua sang ia jrao prong tơring čar Quảng Nam brơi thâo:

“Lơm hơjan ia ling dăo, anom bruă git gai tơhan ƀôn prong Đà Nẵng laih dong anom bruă wai pơgang kual 5 hơmâo pơkiăo nao hăng tŏ tui lĕ tô nao rai kiăng thâo tơlơi pơhing. Lơm ia dăo ƀơi sang ia jrao dŏ giăm 6 gam, anom bruă git gai ling tơhan ƀôn prong Đà Nẵng kah hăng anom bruă wai pơgang kual 5 djru brơi sang ia jrao rơmet pơagaih. Bơni biă mă hơdôm anom bruă ling tơhan hơmâo djru brơi”.

Hơdôm rơbâo čô mơnuih ƀôn sang hơmâo ling tơhan djru brơi hmao tlôn kiăng kơ mă mơnuih lơm ia ling dăo. Lơm hơdôm tal hơjan kơthel ƀuh tŏ tui na nao phrâo rơgao, aka ƀu hmao pơdơi, ƀing apăn bruă, ling tơhan tŏ tui nao djru brơi. Ngă tui hơdră bruă “Quang Trung” yua Khua dêh čar jak iâu, ling tơhan Quân khu 5 ƀuh ƀô̆ mơta ƀơi hơdôm kual răm rai kiăng djru brơi mơnuih ƀôn sang pơdong glăi sang. Hơdôm hrơi anai, hơdôm rơbâo čô mơnuih apăn bruă, ling tơhan ngă bruă phrâo-anun lĕ mơnuih man pơdong sang, ƀing gơñu gir run man pơdong glăi sang kơ neh met wa kual hơjan ia ling dăo. Mă bruă wơr ƀong huă, ƀu hmao pit đih, ƀing gơñu gir run amăng hrơi pơ-iă hăng tơlơi čang rơmang djru brơi mơnuih ƀôn sang tañ hơmâo sang sir kjăp, hơđong tơlơi hơdip hlâo kơ Tết tui phiăn juăt.

Trung úy Phạm Ngọc Dân, Tiểu đoàn 303, Trung đoàn 584, anom bruă git gai ling tơhan tơring čar Dak Lak, glăk hrŏm hăng ƀing gŏp man pơdong sang brơi neh met wa, ñu lăi:

“Ngă tui hơdră bruă yua Khua dêh čar pơphun, ling tơhan Quân khu hăng hơdôm anom bruă amăng Ding jum ling tơhan hơmâo gir kơtir mă bruă tơhrơi kah hăng mlăm, hrơi hơjan kar hăng pơ-iă. Ayong adơi djru pơsit tơnap tap kơ gơnam tam, čuah pơtâo, gir run truh lơ 15/1/2026 amra pơgiong ƀiă biă mă ñu 50% mrô sang gong gah ƀon lan jao brơi ling tơhan Quân khu 5 hăng hơdôm anom bruă mơng Ding jum ling tơhan amăng ƀon lan”.

Hơdôm rơbâo čô mơnuih apăn bruă, ling tơhan Quân khu 5 hơmâo nao hăng glăk ƀuh ƀô̆ mơta amăng djop plơi pla bơdjơ̆ nao hơjan ia ling dăo, nao djru man pơdong sang phrâo, pơkra ming sang dŏ brơi hơdôm boh sang anŏ hơmâo sang glưh răm rai. Hăng pran jua gơgrong, ngă bruă abih pran mơng ling tơhan rơnuk wa Hô hơmâo lar hyu, ngă glưh pran jua mơnuih ƀôn sang kual Tong krah-Dap kơdư. Ƀuh ling tơhan glêh glar, neh met wa amăng plơi pla ăt gum tơngan hrŏm djru brơi. Đa tơnă asơi hơbai añăm, đa tuk ia, djru tui tlôn, gum hrŏm găn rơgao tơnap tap. Amăng kual lŏn răm rai kơtang tơdơi kơ hơjan kơthel, pran khăp pap ling tơhan-mơnuih ƀôn sang jai kjăp phik, pơđao pran jua. Yă Nguyễn Thị Mận, dŏ ƀơi să Hòa Thịnh, tơring čar Dak Lak ol kơdol brơi thâo:

“Ƀuh ling tơhan mă bruă glêh glar, ƀing gơñu pap biă mă yua anun ƀing adơi amai ăt nao djru brơi. Ƀing gơmơi djru brơi ling tơhan tơnă asơi hơbai añăm kiăng hơmâo gơnam ƀong jơman kah hơmâo pran man pơdong sang brơi neh met wa”.

Ƀong huă hrŏm, dŏ hrŏm, mă bruă hrŏm, pơhiăp tơlơi djop djuai ania. Pran khăp pap ling tơhan-mơnuih ƀôn sang jai kjăp phik, pơjing ta “pran đăo gơnang mơng mơnuih ƀôn sang” kjăp phik, pơtrut pran kơtang kiăng ling tơhan Quân khu 5 kjăp bruă mă amăng djop anih man pơdong hăng wai pơgang lŏn ia. Thiếu tướng Lương Đình Chung, Khua Quân khu 5 pơsit tong, găn rơgao 81 thun pơjing, blah ngă hăng prong kơtang, ling tơhan Việt Nam lêng pơdah pran gơgrong ba jơlan hlâo, yua mơnuih ƀôn sang ngă bruă:

“Ling tơhan tơbiă rai mơng mơnuih ƀôn sang, yua mơnuih ƀôn sang mơ̆ blah wang”. Puih kơđông tơhan pơdong ƀơi kual Tong krah-Dap kơdư, kual lŏn bơdjơ̆ nao lu wŏt hơjan kơthel, ƀing apăn bruă, ling tơhan Quân khu 5 hluh rơđah, bruă djru brơi mơnuih ƀôn sang lĕ tơlơi glăm ba mơng hơtai boh, nao djru mơnuih ƀôn sang tañ hloh, hmar hloh tơdah dưi. Ƀing gơmơi ăt pơgôp hrŏm hăng anih anom kơđi čar hăng abih bang mơnuih ƀôn sang amăng jum dar Quân khu dưi găn rơgao tơnap tap, glêh glar tơdơi kơ hơjan ia dăo. Lơm mơnuih ƀôn sang hăng djop ƀon lan găn rơgao tơnap tap yua hơjan ia ling dăo, ƀing apăn bruă, ling tơhan Quân khu kah mơng mơ-ak amăng pran jua”.

Lơm hơjan ia ling dăo ngă răm rai kơtang hloh hăng hơdôm tơlơi glêh tơnap ăt dŏ mơn, rup rap ling tơhan Quân khu 5 kret kruai djru mơnuih ƀôn sang jing tơlơi đăo gơnang mơng mơnuih ƀôn sang kual Tong krah-Dap kơdư. Hrơi mông amra rơgao hĭ, samơ̆ pran khăp pap ling tơhan-mơnuih ƀôn sang dŏ na nao. “Ling tơhan rơnuk wa Hô-Ling tơhan tơbiă mơng mơnuih ƀôn sang”-rup rap anun kơđŏm glăi amăng pran jua mơnuih ƀôn sang kual Tong krah, Dap kơdư./.