Blung a khŏm pơsit, bruă pơphun ngă 3 Jơlan hơdră dêh čar pơtrun (kơ akŏ pơdong plơi pla phrâo, hrŏ trun ƀun rin kjăp hăng pơđĭ kyar bơwih ƀong huă - mơnuih mơnam kual mơnuih ƀôn sang djuai ƀiă hăng čư̆ siăng) ƀơi hơdôm boh tơring čar Dap Kơdư amăng hơdôm thun rơgao hơmâo ba glăi boh tŭ yua blung a. Anih anom jơlan nao rai hơmâo pơplih phrâo, tơlơi hơdip mơnuih ƀôn sang đĭ tui mơn. Tha plơi Anưk - mơnuih ƀôn sang plơi Tuơh Ktu, să Glar, tơring glông Đăk Đoa, tơring čar Gia Lai brơi thâo:“Tơlơi hơdip ră anai pơplih lu biă. Djŏp plơi pla pơplih hiam, hlâo adih jơlan nao rai glut, hlŭ, amruih biă, kar hăng drông bui, sang dŏ tơ̆i phơ̆i, yik yuk, apui ƀu hơmâo...Ră anai hơmâo jơlan hiam, hơmâo sang hră, hơmâo sang ia jrao, apui lơtrik rơđah bơngač. Pô kâo hơmâo nao ngui mơn pơ Dak Lăk adih lăng hiam biă. Laih dong giăm anai kâo hơmâo nao pơ Đăk Bơt, Kon Gang, nao truh pơ Kbang lăng tơlơi hơdip phara, hiam biă. Dua dong amăng bruă ngă hmua pla pơjing mơnuih ƀôn sang thâo mă yua măi mok, boh thâo phrâo. Tơlơi hơdip trơi pơđao, djŏp sang anŏ hơmâo rơdêh thut, wơ̆t hăng pơ kual ataih yaih ăt hơmâo mơn...Abih bang lĕ yua hơmâo mơ̆ng Ping gah, Kơnuk kơna ta mơn”.

Samơ̆ amăng 3 jơlan hơdră dêh čar pơtrun, Jơlan hơdră pơđĭ kyar bơwih ƀong huă mơnuih mơnam kual mơnuih ƀôn sang djuai ƀiă čư̆ siăng jing tơnap hloh. Ƀơi mông jơnum ƀu tui tơđar lok 5 rơnuč thun rơgao, khua mua hơmâo pơtrun Tơlơi pơtrun hơdră djru phara ngă jơlan hơdră dêh čar pơtrun. Tơlơi pơtrun hơmâo 6 črăn, pơkă 8 mơta tơlơi djru phara hơjăn đah mơ̆ng pơsir brơi đut tơhnal hơdôm tơlơi tơnap, tơlơi gun gan, djru ngă gal brơi hơdôm boh tơring dưi ngă bruă tañ, brơi prăk čan pioh ngă hơdôm jơlan hơdră dêh čar pơtrun amăng hrơi blan pơ anăp. Kơ-iăng khua dêh čar Trần Lưu Quang lăi, anai jing hơdră djru kơtang biă aka ƀu hơmâo djơ̆ ôh mơ̆ng hlâo:“Tơlơi pơkă mơ̆ng 8 mơta bruă anun lĕ jao bruă kiăo tui gưl kjăp kơtang, pơđĭ tui tơlơi rơgơi mơ̆ng plơi pla, hyu pel ĕp, krăp lăng. Jao bruă kơ tơring glông, să dưi mơn hă ƀŭ. Hơmâo mơn tơlơi bơngơ̆t aka ƀu khin ngă. Yua hnun khŏm pơmin kjăp tơlơi hơget dưi ngă hăng ƀu dưi ngă, prăk kăk kơnuk kơna ta khŏm wai lăng kjăp mah 1 asar prăk tŭ mơn. Laih dong, anai ƀu djơ̆ hơdră ngă lăng hlâo ôh, anai lĕ hơdră ngă bruă phara hơjăn”.

Ƀing khua pơ ala hơmâo tŭ ư hăng jơlan hơdră jao bruă kơ gưl tơring glông wai lăng, pơphun ngă hơdôm jơlan hơdră dêh čar pơtrun tui jơlan: “Jơnum min pơ ala mơnuih ƀôn sang tơring glông dưi pơplih hơdră kah pơpha prăk tuh pơ alin, prăk mă yua re se kơplah wah hơdôm jơlan hơdră dêh čar gơñăm ngă amăng bruă tuh pơ alin pơkă găp ƀrô, bruă tuh pơ alin prăk rim thun, mrô prăk kơnuk kơna rim thun hơmâo anom bruă gưl prong jao”. Pô pơ ala Tạ Văn Hạ, grup khua mơ̆ng Quảng Nam lăi:“Hăng 8 tơlơi pơkă ngă lăng hlâo anai kâo pơmin amra hơmâo tơlơi pơplih prong pơtrut ngă tañ ƀiă 3 jơlan hơdră dêh čar pơtrun. Anai jing bruă kâo pơmin khŏm sem lăng ngă hiư̆m pă lơ̆m ruah, ta iâu ngă lăng hlâo lĕ khŏm hơmâo anih pơphun hlâo, pơ ala brơi, anun lĕ plơi pla, plơi prong, kual čư̆ siăng....abih bang hơdôm tơlơi anun ƀing ta pơtum glăi jing jơlan hơdră anun, tơlơi djru anun khŏm lăi nao abih bang bruă hăng abih bang anih”.

Ƀing pơ ala mơnuih ƀôn sang hăng mơnuih ruah khua amăng dêh čar ta čang rơmang Tơlơi pơtrun kơ hơdră ngă bruă, tơlơi pơkă phara amăng hơdôm jơlan hơdră dêh čar pơtrun hơmâo Khua mua pơ ala mơnuih ƀôn sang pơsit amra ba glăi lu tơlơi pơplih phrâo, ngă amuñ ƀiă kiăng kual čư̆ siăng pơtrut tui tơlơi gêh gal, hrưn đĭ hloh. Ơi U Minh Nam, Kơ-iăng khua anom bruă djuai ania tơring čar Kon Tum brơi thâo:“Kiăo tui gru tơhnal anun, gơmơi amra pơtô ba hơdôm boh tơring čih pơkra hơdră ngă bruă rơđah rơđông, hơmâo hơdră pơsir. Laih dong pơđĭ tui tơlơi grong bruă mơ̆ng ping gah, gong gai plơi pla pơƀut pok pơhai hơdôm bruă tong ten. Pơsit brơi rơđah hloh hơdôm tơlơi djru, tơlơi pơkă phara hơjăn hơmâo ƀing khua pơ ala ƀudah hơmâo Kơnuk kơna, hơdôm ding jum anom bruă pơtrun rai. Klâo dong lĕ sem lăng, ngă pơgiong abih hơdôm tơlơi pơčrâo bruă kơ Jơlan hơdră dêh čar pơtrun kơ djŏp gưl, đah mơ̆ng pơđĭ tui tơlơi grong bruă mơ̆ng grup črâo bruă”.

Mơnuih ƀôn sang amăng đơ đam dêh čar, kual Dap Kơdư lăi hơjăn čang rơmang, tơdơi kơ tơlơi pơtrun hơmâo Khua mua pơ ala mơnuih ƀôn sang pơsit brơi, Kơnuk kơna hăng anom apăn bruă amra tañ pơtrun hơdôm tơlơi pơkă, tơlơi pơtô ba đah mơng tơlơi phiăn anai pơtrut đĭ boh tŭ yua, mut amăng tơlơi hơdip mơda./.