Ơi Nguyễn Đình Trường, Khua kông ti May Việt Tiến hơđăp, Kơ-iăng Khua khul mơnuih bơwih ƀong sĭ mơdrô gah tơhan hơđăp Việt Nam brơi thâo, rơwang thun laih rơgao, Khul tơhan hơđăp Việt Nam hơmâo pơgiong bruă jao hăng lêng kơ ba gru črâo ba rơnuk tơdơi, hrăm hăng ngă tui pran gơgrong mă pô, pran sông kơtang amăng blah wang mơ̆ rơnuk ơi yă ta pơjing, pioh glăi kơ ană tơčô, tŏ tui bruă wai pơgang lŏn ia ta. Yua anun yơh, rơwang thun pơ anăp hăng 1/3 mrô mơnuih tơbiă anăn amăng Khul apăn bruă, hăng tui tơlơi git gai mơng Khul apăn bruă phrâo, ơi Nguyễn Đình Trường đăo gơnang nao hơdôm hơnong pơkă amăng rơwang 7 amra tŏ tui ngă tŭ yua dong:

“Ngă tui tơlơi git gai mơng Khua git gai Ping gah dêh čar ơi Nguyễn Phú Trọng, Khul tơhan hơđăp Việt Nam hơmâo 5 bruă jao. Amăng 5 bruă jao anun hơmâo 2 mơta yôm phiăn kiăng pơplih phrâo. Tơlơi pơplih tal sa lĕ, kiăng pơjing khul grup kơđi čar hơđong kjăp, tơpă sit, kiăng ngă akŏ phun, wai pơgang gong gai mơng ƀon lan pơ glông. Bruă tal dua lĕ gir run mut hrŏm bơwih ƀong huă kiăng pơhrŏ trun ƀun rin hăng mut hrŏm amăng bruă yua Ping gah hăng Kơnuk kơna pơphun. Anai lĕ 2 mơta bruă phrâo yôm phun kiăng pơjing Khul jai hrơi pơđĭ kyar”.

Sa amăng hơdôm bruă jao hơmâo djop gưl khul tơhan hơđăp amăng đơ đam dêh čar gir run ngă tui anun lĕ djru brơi ding kơna tơhan hơđăp ngă pơdrông asah, pơđĭ kyar bơwih ƀong huă. Ơi Trần Bá Đông, Khua khul tơhan hơđăp phường Đông Tảo, plơi prong Hưng Yên, tơring čar Hưng Yên brơi thâo, hăng 3 boh anom bơwih ƀong sĭ mơdrô yua tơhan hơđăp ngă akŏ, hơbô̆ bruă djru brơi ding kơna tơhan hơđăp ngă pơdrông asah hăng dưi ngă tŭ yua amăng hơdôm thun laih rơgao. Ră anai 100% mrô ding kơna tơhan hơđăp ƀu hơmâo hlơi dong tah ƀun rin, 85% lĕ sang anŏ pơdrông asah hăng 15% mrô sang anŏ hơdip jơnap yơh. Ơi Trần Bá Đông čang rơmang:

“Prăk čan ƀing gơmơi ƀơi ƀon lan ngă tui djơ̆ tơlơi pơkă mơng Kơnuk kơna laih, sang bruă prăk djru mơnuih mơnam amra djru brơi djơ̆ hăng tơlơi pơkă. Ră anai ƀing gơmơi čang rơmang gơnong glông djru brơi hiưm pă kiăng hơmâo hơdră lăp djơ̆, hơdôm boh tơhnal, jơlan hơdră djru brơi ƀing gơmơi pơklaih mơng ƀun rin. Ƀing gơmơi čang rơmang, hăng đăo gơnang abih pran jua nao tơlơi git gai mơng Khul apăn bruă rơwang tal 7 anai hăng kâo čang rơmang ƀing gơñu amra gơgrong, hăng pran jua hur har mơng tơhan wa Hô, ƀing gơñu amra ngă tui git gai bruă mă amăng Khul brơi kjăp hloh kiăng pơđĭ kyar”.

Bơ ơi Dương Xuân Hảo, Khua anom bruă Khul tơhan hơđăp tơring čar Ninh Bình pơdah pran gir run, rơwang phrâo anai amra tŏ ngă tui hơdôm hơbô̆ bruă, gum hrŏm djru ngă pơdrông asah mơng ƀing ding kơna khul tơhan hơđăp:

“Khul tơhan hơđăp tơring čar Ninh Bình rơwang pơ anăp amra gir run ngă gêh gal brơi hloh, pơhlôm hơmâo prăk čan kiăng ƀing ding kơna gêh gal bơwih ƀong pơđĭ kyar hăng pơhlôm dưi čan prăk mơng hơdôm sang bruă prăk djru mơnuih mơnam hăng sang bruă prăk pơkŏn dong. Hơmâo hơdră pơtrut pơsur tơdruă, djru nao rai anai lĕ ding kơna hơpă đĭ đăi ƀiă djru brơi boh thâo, tơlơi găn rơgao amăng bơwih ƀong kiăng abih bang ding kơna pơđĭ kyar”.

Hơdôm pok hră pơtrut mơng Jơnum lĕ tơlơi črâo ba yôm phăn amăng bruă mă hăng pơđĭ kyar mơng khul amăng 5 thun pơ anăp. Tơdơi kơ tal Jơnum, djop gưl khul tơhan hơđăp pơphun klă bruă hruă kjăp ngă tui tơlơi pơsit, hơdôm tơlơi pơtrun mơng Jơnum, pơtô pơblang tơl abih bang mơnuih apăn bruă, ding kơna kơ boh tơhnal mơng Jơnum; ječ ameč pơjing, pok pơhai jơlan hơdră, akŏ bruă mă, ba tơlơi pơtrun ngă tui sit nik; pơtrut bruă pơplông, hrăm tui hăng ngă tui tơlơi pơmĭn, tơlơi hơdip hiam klă, bruă mă mơng Hồ Chí Minh, ngă pơgiong hơdôm bruă jao; pơgôp pơjing hăng wai pơgang lŏn ia, djơ̆ hăng pran đăo gơnang mơng Ping gah, kơnuk kơna hăng mơnuih ƀon sang. Đĭ pơhiăp pơđut mông jơnum, Thượng tướng Bế Xuân Trường, Khua khul tơhan hơđăp Việt Nam tal XII, rơwang thun 2022-2027 lăi rơđah:

“Ƀing gơmơi ƀuăn ƀơi anăp abih bang Khul tơhan tơđăp đơ đam dêh čar amra gum pơgôp, mut hrŏm, pơlir kjăp, pơjing khul kjăp amăng bruă kơđi čar, đăo gơnang mơng tơlơi git gai mơng Ping gah, Kơnuk kơna, akĕ phĭ hăng Ping gah, kơnuk kơna, hăng mơnuih ƀon sang hăng hơdră chủ nghĩa xã hội, lêng kơ pơdah pran gơgrong. Pơplih phrâo boh tơhnal, hơdră bruă, gir run, gơgrong, thâo pơčeh phrâo, git gai ngă tui bruă jao, pơjing khul mă bruă tơpă sit, hơđong kjăp amăng djop mơta, pơgiong klă hloh djop bruă jao.