Amăng hrơi adai hơjan tơthul, ƀơi atur sang pơčah, lŏn pơtâo dor klŏm, ơi Phạm Dũng, ƀơi plơi Phú Hữu, să Hòa Thịnh, tơring čar Dak Lăk glăk dŏ lăng ƀing tơhan man sang phrâo brơi ñu. Ñu brơi thâo, Kơnuk kơna hơmâo laih 3 gru sang brơi ñu ruah mă hăng gru sang ƀơi thơi ñu hor, gru sang kjăp, dưi pơgang hơjan kơthel:“Gru 1, gru 2 hăng plơi pơ anai, hăng să anai djơ̆ lăp hloh. Yua pơ anai ia dăo kơtang, ruah gru sang či man pơdong djơ̆ laih hăng ayuh hyiăng lŏn adai pơ anai, ƀu hơmâo tơlơi či lăi dong tah”.

Hrŏm hăng sang anŏ ơi Dũng, lu sang anŏ ƀơi să Hòa Thịnh leng kơ tŭ ư mơ̆ng blung lơ̆m hơmâo pơƀuh gru sang “3 khăng” - hơmâo atur khăng, pơnăng khăng hăng pơbung khăng, ngă tui amăng “Bruă mă Quang Trung”. Yă Nguyễn Thị Thiểu, dŏ pơ Phú Hữu, să Hòa Thịnh brơi thâo:“Pit rơpơi hai ƀu pơmin lơi hơmâo Kơnuk kơna djru brơi tañ tui anai, klă biă mă yơh. Tañ hơmâo anih dŏ, hơmâo anih čơkă Tê̆t, Kơnuk kơna lăng ba ană plơi tui hăng anai mơak biă yơh”.

Hăng mơnuih ƀôn sang pơ kual ia dăo, tơhan blah ngă ƀu kơnong djru gơnam tam đôč ôh, jing mơnuih mơ̆ ană plơi kơnang, pơhlom brơi huăi pioh glăi pô hlơi gah tlôn. Amăng mông pok pơhai “Bruă mă Quang Trung”, tơlơi hơmâo lăi nao lok rai hăng ƀing khua, ling tơhan jing pran jua “ngă brơi ană plơi kah hăng ngă brơi pô ta mơn”. Thượng uý Đỗ Đình Tuấn, Trung Đoàn 143, Sư đoàn 315 (Tơhan kual 5) lăi:“Lơ̆m nao sem lăng rim boh sang, gơmơi lăng sang neh met wa pơ anai kar hăng sang anŏ gơmơi mơn. Djru ba ană plơi kar hăng djru glăi sang anŏ ta mơn”.

Ƀu kơnong nam ačŏng čoh ƀơi anih pơdong sang ƀudah tơlơi mă bruă mơ̆ng mlăm truh rơdah đôč ôh, “Bruă mă Quang Trung” hơdeč hmar ăt pơƀuh tơlơi gum ngă mơ̆ng abih bang anom bruă kơđi čar. Ƀơi kual ia dăo Khánh Hòa, Khua Jơnum min mơnuih ƀôn sang tơring čar ơi Trần Phong pơsit, Ling tơhan hăng Kông an gơgrong bruă yom phun djru ba ană plơi pơdong sang; gong gai glăm bruă jak iâu, git gai, kah pơpha bruă hăng iâu pơthưr abih bang mơnuih gum djru, pơhlom tơlơi djru anai anăp nao mơnuih ƀôn sang soh:“Prăk djru man pơdong sang kơ neh met wa kual ia dăo hơmâo ngă kơtang tui, hơmâo wơ̆t tơhan blah ngă hăng Kông an. Hơdôm boh tơring ngă hiư̆m pă kiăng prăk mơ̆ng tơring čar, mơ̆ng khul grup, pô anai pô adih djru brơi, pioh či blơi pơtâo čuah pơsơi pơsă đôč yơh, lui pơmut amăng mrô prăk či apah arăng mă bruă. Yua hnun, tơlơi gơgrong mơ̆ng hơdôm boh să, phường prong biă”.

Hăng tơlơi gir run kơtang hloh, “Bruă mă Quang Trung” djru akŏ pơjing anŏ kơtang amăng mơnuih tơpuôl pơhlom pơgang tơlơi truh lŏn adai ngă: tơlơi rơgơi pơphun, ngă hrŏm hăng ngă bruă djơ̆ tơlơi pơkă. Sit tơlơi rơgơi anun yơh mơ̆ng dưi ngă hơdeč hmar, ba glăi sang dŏ kjăp hăng ba glăi tơlơi hok mơak. Đại tá Dương Văn Long, Kơ-iăng khua Kông an tơring čar Gia Lai brơi thâo:“Pran jua ngă bruă lĕ ƀu hơmâo yap hrơi pơdơi ôh, ƀu hơmâo yap mông, ƀu yap nao adai pơ-iă ƀudah hơjan hlim ôh. Gơmơi gir ngă hiư̆m pă kiăng truh hrơi Tê̆t, abih bang sang anŏ hơmâo kơnuk kơna djru, leng kơ hơmâo sang dŏ, hơmâo anih dŏ dong ƀong huă, hơđong tơlơi hơdip”.

“Bruă mă Quang Trung” amra pơjưh hĭ mơn, lơ̆m hơdôm boh sang tuč rơnuč hơmâo jao kơ ană plơi, samơ̆ anŏ yom mơ̆ bruă anai pioh glăi amra hơmâo bang hyu dong mơn. Anun ƀu kơnong jing rơbêh 1.600 boh sang dŏ kjăp hăng 40.000 boh sang anŏ hơmâo pơkra glăi, djru neh met wa hơđong tơlơi hơdip ƀơi anăp tơlơi truh sat lŏn adai ngă đôč ôh mơ̆ ăt pơƀuh brơi tơlơi rơgơi, apăn bruă hăng tơlơi pơtruh pơlir hơbit djŏp khul!

Hơdôm boh sang “3 khăng” mơ̆ng “Bruă mă Quang Trung” amra jing “puih kơđông” amăng pran jua ană plơi, hơmâo man hăng tơlơi pơmin pran jua rŭ glăi, pơplih phrâo thâo prăp mă pô, wơ̆t hăng ia hâ̆o ia hang mă bruă hrơi mlăm ƀu pơdơi pơdă mơ̆ng ling tơhan. Mơ̆ng luh hơmâo klơi trun, sa tơlơi hơdip phrâo glăk rŭ glăi dong, kjăp hloh. Sa pran jua kjăp kơtang mơ̆ng mơnuih ƀôn sang glăk bơbôr đĭ kjăp khŏp amra jing tơlơi gêh găl đĭ kyar mơ̆ng Lŏn ia ta amăng rơnuk phrâo./.

Link tơlơi čih mrô 1: https://vov4.vov.vn/jarai/cran-hodra-konuk-kona-hang-hodip-moda-chinh-sach-va-cuoc-song/hodom-toloi-cih-hodra-nga-brua-tui-quang-trung-jec-amec-man-podong-sang-pojing-pran-dao-gonang-mong-monuih-bon-sang-toloi-cih-mro-1-bing-tohan-djru-broi-jec-amec-505330.vov4