VOV4.Jarai-Ƀơi Dak Lak, amăng bruă mă hok mơak čơkă ruah khua pơ ala mơnuih ƀôn sang dêh čar tal XV hăng khua mua pơ ala djop gưl rơwang bruă thun 2021-2026, Sang djă pioh gơnam gru Dak Lak phrâo pok pơhai pơdă rup anăn “Hrơi mơak kơ lŏn ia”. Pơdă rup hră pơar tal anai hơmâo 3 akŏ bruă phun:

Khua mua nao ĕp lăng anih pơdă rup

Wa Hồ hăng Anom bruă pơ ala mơnuih ƀôn sang Việt Nam; Gru kơđom khua pơ ala mơnuih ƀôn sang Việt Nam; hơdôm bruă mă ƀuh tŭ yua hloh mơ̆ng Grup khua mua pơ ala mơnuih ƀôn sang dêh čar hăng ƀing pơ ala mơnuih ƀôn sang djop gưl tơring čar Dak Lak.

Hơmâo năng ai 130 pok rup lăi pơthâo, pơdă djru ngă rơđah tui hơdôm boh tơhnal mơ̆ng khua mua pơ ala mơnuih ƀôn sang dêh čar hăng khua mua pơ ala djop gưl tơring čar Dak Lak hnun mơ̆n amăng djop rơnuk; lăi pơtong bruă ngă tŏ tui hăng bơblih phrâo mơ̆ng khua mua pơ ala mơnuih ƀôn sang dêh čar amăng bruă mă čih pơkra tơlơi phiăn, ĕp lăng hăng pơtrun lu bruă mă yom kơ lŏn ia; bruă ngă djơ̆ tơlơi gơgrong ba tơlơi dưi prong hloh mơ̆ng kơnuk kơna lŏn ia, ngă tơpă jơlan hơdră, tơlơi pơtrun mơ̆ng Ping gah, jing tơlơi phiăn dêh čar pioh pơphun ngă tui.

Nay Jek: Pơblang