VOV4.Jarai-Ngă tui tơlơi git gai mơ̆ng Ding jum kông an kơ bruă ngă hră kăn kươk kơ mơnuih ƀôn sang, kông an tơring čar Dak Lak hlăk gir run abih pran jua, brơi khua mua hăng ling tơhan mă bruă hrơi mlam bơwih brơi bruă ngă hră kăn kươk kơ ană plơi tañ giong, sa hrơi mlam mă bruă 19 mông, pioh tŭ mă hră pơar, anăn păn mơnuih ƀôn sang giong anun čih anăn pơkra brơi hră kak kăn kươk dưm čip rơgơi hăng điện tử djơ̆ hnong pơkă.

Anih mă bruă ngă hră pơar kơ ană plơi tơring čar Dak Lak lĕ 1 amăng 18 boh anih ngă hră pơar čih anăn mă rup kak kăn kươk amăng tơring čar. Hăng 3 grup mă bruă, pơpha 3 wơ̆t mă bruă sa hrơi mlam ƀu pơdơi ôh bơblih nao rai pơdơi ƀiă mông đôč:

Mơguah, tlam hăng mơmŏt, mơ̆ng 7 mông mơguah truh 10 mông mlăm, rĭm hrơi tŭ mă hră pơar 600 čô mơnuih, nao ngă hră kăn kươk. Mông mă bruă pơđĭ tui 15 mông sa hrơi pơhrua hĭ 8 mông hlâo adih, kiăng ngă gêh găl kơ mơnuih ƀôn sang nao ngă hră tañ giong. Truh ră anai, kông an tơring čar hơmâo tŭ mă hră pơar 70 rơbâo čô mơnuih ngă hră, mơit glăi kơ Ding jum kông an pơsir hăng ngă brơi hră kak kăn kươk.

Tui hăng akŏ bruă truh lơ 30/6, kông an Dak Lak amra ngă giong 1 klăk 200 rơbâo pok rup kăn kươk kơ mơnuih ƀôn sang hơmâo čip, dưi ngă giong 70% tơhnal jao mơ̆ng Ding jum kông an.

Nay Jek: Pơblang