VOV4.Jarai-Djop gơnong bruă, anom bruă gong gai kơnuk kơna hăng djop tơring glông khom prăp lui djop mơta gơnam yua mă bruă pơphun pơplông abih anih 12 ƀơi Dak Lak kiăng hơđong rơnuk rơnua, tơpă, djơ̆ tơlơi phiăn laih anun ngă gêh gal kơ čơđai sang hră, boh nik ñu ƀing čơđai đăo đing jĕ giăm mơnuih ƀă kman Covid 19 hlăk tơnap tap ră anai, anai lĕ boh yôm phun dưi lăi pơthâo lơ̆m jơnum Khua mua git gai pơplông abih anih 12 thun 2021 tơring čar Dak Lak tlam lơ 2/6.

Tal pơplông abih anih 12 thun 2021 ƀơi Dak Lak hơmâo 19 rơbâo 800 čô čơđai sang hră pơplông 32 rơbâo anih čih anăn, hăng 830 boh anom mut pơplông. Truh ră anai, đơ đam tơring čar hơmâo pơtong 2 čô čơđai sang hră arăng đăo đing F1 hăng 39 čô F2, abih bang lêng kơ pơ tơring glông Ea Hleo soh.

Lu čơđai sang hră đăo đing jĕ giăm mơnuih ƀă klin tui anun, Khua mua git gai bruă pơhlôm pơgang klin pơtrun hiăp kơ Gơnong bruă Pơtô hăng Pơjuăt ngă hrom djop sang bruă, gong gai kơnuk kơna brơi pơphun pơplông tŭ yua rơnuk rơnua, tơpă, djơ̆ tơlơi phiăn dơ̆ng mơ̆ng bruă čih anăn truh kơ bruă pơsit boh tơhnal, puang tŭ yap  hrăm giong abih anih 12.

Nay Jek: Pơblang