VOV4.Jarai - Tom brơi (18/3), Amăng jơnum klah čun, Khul pơ ala mơnuih ƀon sang tơring čar Dak Nông hơmâo sem lăng pơgôp hiăp hăng pơsit 9 črăn hră lăi pơthâo, hră mơ-it đĭ, akŏ bruă yôm phăn. Amăng anun, hơmâo Tơlơi pơsit kơ bruă akŏ pơjing Anom bruă Khul khua pơ ala mơnuih ƀon sang dêh čar hăng Khul pơ ala mơnuih ƀon sang tơring čar Dak Nông tui tơlơi tŭ ư pơmut 2 anom bruă anun lĕ Anom bruă Khul khua mua pơ ala mơnuih ƀon sang dêh čar hăng Anom bruă Khul pơ ala mơnuih ƀon sang tơring čar.

Amăng mông jơnum, ƀing khua mua hơmâo tŭ yap hră mơ-it mơng Jơnum min mơnuih ƀon sang tơring čar brơi pơdơi bruă 2 čô khua lĕ ding kơna Jơnum min mơnuih ƀon sang tơring čar hăng ơi Nguyễn Tấn Bi, Khua gơnong bruă prăk kak hăng ơi Trần Văn Nam, Khua gơnong bruă pôr pơhing, dua gơñu hơdai nao mă bruă pơkŏn dong. Laih dong pơphun plĕ hră pơhrua ruah 2 čô ding kơna Jơnum min mơnuih ƀon sang tơring čar hăng ơi Hoàng Văn Thuần, Khua gơnong bruă prăk kak hăng ơi Nguyễn Văn Hiệp, Khua gơnong bruă wai pơgang ayuh hyiăng lŏn mơnai.

Siu Đoan: Pơblang