VOV4.Jarai - Glăk amăng bơyan adai pơ-iă hang, mơnuih ƀon sang ƀơi Dăk Nông yua apui lơtrik đĭ ha mơkrah pơhmu hăng bơyan pơkŏn, hơmâo truh 2 klăk kWh hăng jua apui pơđuăi rơbêh 100MW. Kiăng pơhlôm brơi apui yua hơđong, Kông ti apui lơtrik Dăk Nông git gai mơnuih mă bruă amăng kông ti dŏ krăp lăng hrơi mlăm, brơi mơnuih nao gak dong ƀơi anih amuñ hơmâo apui răm. Laih dong pơkra ming, pơđĭ tui jua apui ƀơi anih pơđuăi apui đĭ trun, hrĕ apui pơđuăi jua tơdu ƀơi anih plơi pla dŏ; jah rơmet ƀhông ƀơi anih hơmâo hrĕ apui, pơplih aptomat....pơhlôm hlâo ƀu brơi hơmâo tơlơi truh lơ̆m mă yua apui kơtang đơi. Hơdôm plơi pla khŏm hơmâo hơdră pơhlôm apui lơtrik ƀơi anih pơđuăi jua apui yôm, git gai mă yua ƀơi hơdôm anih pơđuăi jua apui 110 kV, hơdôm boh sang măi apui lơtrik anet amra dưi brơi apui kơ hrĕ pơđuăi jua apui găp ƀrô. Rơngiao kơ anun dong, Apui lơtrik Dăk Nông ăt pơtă hlâo kiăng mơnuih ƀon sang yua apui pơkrem kah hăng: kup hĭ apui lơ̆m ƀu kiăng yua, anăm yua đơi ôh măi bluh angin rơ-ơ̆.

Siu H’Mai: Pơblang