VOV4.Jarai - Hăng jơlan hơdră “Rơđah bơngač jơlan plơi pla”, hơdôm pluh km jơlan ƀơi guai tơring čar Daklak hơmâo arăng dưm truă apui kơđen pơčrang rơđah amăng jơlan; ngă gêh gal brơi mơnuih ƀon sang găn nao rai hăng pơgôp pơhlôm rơnuk rơnua ƀơi kual giăm guai lŏn ia. Anai lĕ hơdôm bruă mă yôm phăn mơng Khul hlăk ai tơring čar Daklak djru man pơdong plơi pla phrâo.

Akŏ blan 3 thun anai, mơnuih ƀon sang dŏ ƀơi ƀut plơi Ia Rvê, tơring glông Ea Sup, tơring čar Daklak gir run kiăng kơ hơdôm ară jơlan amăng plơi pla hơmâo dưm truă apui kơđen. Ring bruă “Rơđah bơngač jơlan plơi”  ƀơi ƀut plơi 8 glông rơbêh 1 km, hăng 20 gong apui kơđen, hrĭp pơ-iă yang hrơi, abih tih rơnoh prăk tuh pơ alin lĕ 35 klăk.

Rĭng bruă rơđah bơngač jơlan plơi ƀơi ƀut plơi 8, să Ia Rvê, tơring glông Ea Sup yua apui lơtrik hrĭp pơ-iă yang hrơi

Anai lĕ bruă mă tui jơlan hơdră “Blan 3 kual giăm guai” yua kơ Khul hlăk ai tơring čar Daklak gum hrŏm hăng Khul hlăk ai tơring čar Lâm Đồng pok pơhai ƀơi kual giăm guai tơring čar Daklak, amăng anun Khul hlăk ai tơring čar Lâm Đồng djru prăk kak brơi gơnam tam, ƀing hlăk ai hăng mơnuih ƀon sang djru mă bruă. Ơi Phạm Hồng Lĩnh, khua ƀut plơi 8, să Ia Rvê, tơring glông Ea Sup brơi thâo, dong mơng hrơi jơlan hơmâo apui kơđen, mơnuih ƀon sang nao rai amuñ ƀiă yơh ană plơi pla hok mơ-ak biă mă.

Lơ̆m jơlan aka ƀu hơmâo apui kơđen ƀơi anai hơmâo lu tơlơi rung răng biă mă. Tơdơi kơ dưm truă apui kơđen mơnuih ƀon sang hok mơ-ak biă mă, blung hlâo lĕ pơhlôm rơnuk rơnua amăng plơi pla, neh met wa dong yua hăng hok mơ-ak biă mă. Mơng hrơi jơlan hơmâo apui kơđen neh met wa triang bơrơguăt drơi jăn amăng tlam mơmŏt juăt 9 mông ha mơkrah ƀudah 10 mông kah mơng pit đih.

Hlâo anun, mơng rơnuč thun hlâo, ƀơi plơi Drang Phôk, să Krông Na, tơring glông Buôn Đôn, ring bruă apui kơđen pơčrang rơđah amăng jơlan plơi ăt pok pơhai amăng arăng jơlan glông 1,5 km hăng 27 gong apui kơđen. Ơi Y Chuôn Bkrông, mơnuih hơdip amăng plơi Drang Phôk brơi thâo, ring bruă anai dong mơng hrơi pơkra giong hăng mă yua truh ră anai ba glăi tŭ yua biă mă. Hơmâo apui kơđen ƀu djơ̆ ngă kơ mơnuih ƀon sang amuñ nao rai, pơhlôm rơnuk rơnua đôč ôh mơ̆ ăt ngă jơlan nao rai jai hrơi hiam tui, mơnuih ƀon sang kơđiăng djă pioh hăng wai lăng gơnam hrŏm ƀiă dong.

Abih bang mơnuih ƀon sang hlơi hlơi lêng kơ hok mơ-ak soh, yua kơ jơlan hơmâo apui kơđen, amuñ nao amăng mơmŏt mlăm, lơ̆m duam ruă hyu čuă jơmư huăi tơnap tap dong tah ƀing gơmơi hok mơ-ak biă mă.

Truh ră anai, ƀơi tơring čar Daklak hơmâo 8 ƀut plơi pla giăm guai lŏn ia hơmâo dưm truă apui kơđen pơčrang rơđah amăng jơlan plơi hăng giăm 13 km ară jơlan amăng plơi pla hơmâo dưm truă apui kơđen. Amăng mrô anai hơmâo ring bruă yua kơ kông ti apui lơtrik Daklak djru, ƀing apăn bruă, ling tơhan wai pơgang guai hơmâo gum hrŏm. Sa, dua ring bruă hơmâo Khul hlăk ai tơring čar Daklak jak iâu gum djru kiăng kơ hơmâo lu dong plơi pla giăm guai hơmâo apui kơđen pơčrang rơđah amăng jơlan plơi.

Kông ti apui lơtrik Daklak djru dưm truă apui kơđen ƀơi plơi Drang phôk, să Krông Na, tơring glông Buôn Đôn

Ayong Y Lê Pas Tơr, Kơ-iăng khua khul hlăk ai tơring čar Daklak brơi thâo, mơng thun 2014 truh ră anai, ring bruă apui kơđen pơčrang rơđah amăng jơlan plơi hơmâo djop gưl khul hlăk ai amăng tơring čar Daklak pok pơhai hăng lu bruă mă tŭ yua hloh. Sa, dua khul grup hlăk ai tơring glông hăng ƀon lan hơmâo jak iâu gum djru kiăng kơ pơphun ngă ring bruă anai, gum hrŏm hăng kông ti apui lơtrik hơdôm tơring glông man pơdong, dưm truă apui kơđen amăng plơi pla.

Hrŏm hăng anun, amăng 2 thun giăm anai, Khul hlăk ai tơring čar Daklak tŏ tui pok pơhai jơlan hơdră Apui kơđen pơčrang rơđah amăng plơi giăm guai, đing nao tuh pơ alin dưm truă apui kơđen kơtuai tui jơlan amăng plơi pla giăm guai lŏn ia. Hơnong pơkă truh thun 2022 amra dưm truă apui kơđen amăng jơlan glông 20 km ƀơi guai lŏn ia.

Abih bang rơnoh prăk tuh pơ alin lêng lĕ prăk djru brơi mơnuih mơnam. Pơ anăp anai Khul hlăk ai tơring čar him lăng amra dưm truă apui kơđen kơtuai tui jơlan ƀơi guai lŏn ia. Anai lĕ akŏ bruă glăk rơkâo gưl Ping gah kah hăng jak iâu mơnuih gum djru brơi dong. Hăng ring bruă apui kơđen pơčrang rơđah ƀơi guai lŏn ia amra glông him lăng giăm 20 km amra pơgiong tui rơ wang mă bruă mơng thun 2017-2022, gir run truh abih rơ wang mă bruă, hlâo kơ Jơnum khul hlăk ai tơring čar pơphun amra pơgiong ring bruă anai laih anun lăi pơthâo amăng mông jơnum.

Hơdôm ring bruă apui kơđen pơčrang rơđah amăng jơlan plơi hơmâo pok pơhai pơgôp pơhlôm rơnuk rơnia, hrưn đĭ tơlơi hơdip kơ mơnuih ƀon sang ƀơi hơdôm kual giăm guai. Hăng ƀing mơnuih dŏ hơdip ƀơi kual giăm guai lŏn ia tơring čar Daklak, hơdôm ring bruă anai hơmâo ba glăi tŭ yua sit nik, pơgôp pơplih ƀô̆ mơta plơi pla, pơhlôm rơnuk rơnua ƀơi guai lŏn ia ta.

Siu Đoan: Pơblang