VOV4.Jarai - Daklak ăt ngă tui hơdră pơplông mut hrăm anih 10 hăng 4 tơlơi pơplông anun lĕ Ngữ Văn, Toán, Ngoại ngữ hăng tơlơi hrăm ruah tui hluai hor. Thun hrăm 2021-2022, Daklak amra pơphun pơplông mut hrăm anih 10 ƀơi dua boh sang hră anun lĕ: Sang hră gưl tlâo Chuyên Nguyễn Du hăng Sang hră gưl tlâo Kơnuk kơna čem rông ba Nơ Trang Lơng; hơdôm sang pơkŏn amra čŏm puang tui học bạ. Hrơi pơphun pơplông pơphun mơng lơ 8 hăng 9/6/2021. Tui anun, lơ 8/6, mơguah, ƀing čơđai amra pơplông tơlơi hrăm Ngữ Văn, yang hrơi tlam pơplông Ngoại Ngữ. Lơ 9/6, mơguah pơplông Toán, yang hrơi tlam pơplông tơlơi hrăm ruah mă tui hor. Anun yơh Daklak ăt ngă tui hrơi mông pơkă pơplông mut hrăm anih 10 tui lăi pơthâo hlâo anun. Kiăng kơ tal pơplông mut hrăm anih 10 pơhlôm rơnuk rơnua, tơpă sit, djơ̆ hăng hrơi mông pơkă, gơnong bruă pơtô hrăm hơmâo rơkâo ƀing apăn bruă, nai pơtô, mơnuih mă bruă kiăng kơđiăng, khut khăt pral lui klă anih pơplông, laih dong pơhlôm pơgang klin Covid-19.

Siu Đoan: Pơblang