VOV4.Jarai - Mơmot lơ 30/5, ơi Nay Phi La, Khua Gơnong bruă ia jrao tơring čar Daklak pơsit ƀơi tơring čar phrâo čih hmâo 1 čô mơnuih ƀă kơman Sars-CoV-2. Anun lĕ đah kơmơi, ƀơi thôn 7, să Čư̆ Mốt, tơring glông Ea Hleo, tơring čar Daklak. Pô anai dô̆ hrom sa bôh anih apah hăng pô ƀă kơman Covid-19 pơ̆ quận 12, ƀôn prong Hồ Chí Minh. Ñu đĭ rơdêh pơgiăng tuai glăi pơ̆ thôn 7, să Čư̆ Mô̆t lom 6 mông mơguah lơ 26/5/2021.

Mơng lơ 26 truh lơ 29/5 hăng hmâo bưp laih hăng lu mơnuih ƀơi anai. Mơguah lơ 30-5 pô anai dưi ba nao pơ̆ kual dô̆ čơlah hơbit ƀơi Sang hră cao đẳng Công nghệ Tây Nguyên hăng mă ia khak pơčrang lăng ƀuh ƀă kơman Sars-CoV-2. Amăng mlăm lơ 30/5 mơtăm, tơring čar Daklak pơphun  jơnum ječ kiăng pok pơhai hơdôm bruă guang dar hơdôm kuak pô anai dô̆ hơdip mơda hăng dô̆ čơlah hơdôm mơnuih hmâo giăm hăng pô anai. Hrom hăng anun hyu hơduah ĕp mơnuih F1 hăng F2. Jơnum min mơnuih ƀôn sang tơring čar Daklak ăt rơkâo mơn pơdơi jăng jai bruă dŭ pơgiăng tuai hăng rơdêh tui jơlan hơđong, rơdêh đuăi tui hră rơkâo, rơdêh taxi, rơdêh pơgiăng tuai hyu čuă ngui mơng Daklak nao pơ̆ hơdôm bôh ƀôn prong Hồ Chí Minh, tơring čar Bắc Ninh, tơring čar Bắc Giang hăng kơđai glăi yap mơng lơ 30/5/2021./.

Siu H’ Prăk: Pô pơblang