VOv4.Jarai - Tơring čar Daklak glăk amăng bơyan không phang, lu kual glai kyâo amăng tơring čar Daklak amuñ apui ƀong. Kiăng kơ pơgang, ƀing mơnuih wai đang glai hăng gơnong bruă bơdjơ̆ nao amăng tơring čar glăk gir kơtir pok pơhai lu hơdră bruă. Tui hăng ơi Mai Văn Kiện - Kơ-iăng khua anom bruă wai lăng glai rưng tơring čar Daklak, đơ đam tơring čar hơmâo giăm 200.000 ektar glai rưng amăng mrô giăm 500.000 ektar glai glăk amăng kual amuñ apui ƀong mrô 4 ƀudah ƀiă truh mrô 5.

Čuh rơmet agaih hăng trơ̆i hĭ than kyâo krô pioh pơgang apui ƀong glai

Pơ-iă kơtang sui hrơi truh pơ blan 5, yua anun amuñ ngă apui ƀong glai biă mă. Anom bruă wai lăng đang glai Daklak hơmâo pơphô bruă brơi Jơnum min mơnuih ƀon sang tơring čar pơtrun hơdră bruă pơgang apui ƀong glai, prah apui ƀong glai. Git gai djop anom bruă hăng ƀing mơnuih arăng jao wai lăng glai pel ĕp glăi hơdôm anih amuñ apui ƀong ƀơi tơring glông: Buôn Đôn, Ea Sup hăng Ea H’leo hăng kual glai prong giăm 195.000 ektar kiăng kơ đing nao pok pơhai hơdră pơgang hŭi apui ƀong glai.

Siu Đoan: Pơblang