VOV4.Jarai - Tom brơi (18/3), Jơnum min djop djuai ania mơnuih mơnam dêh čar Việt Nam tơring čar Daklak pơphun Jơnum bơkơtuai tal 2 kiăng bơkơtuai hră čih anăn hơdôm mơnuih tơbiă anăn kơ khua pơ ala mơnuih ƀôn sang dêh čar ta tal 15 hăng hơdôm mơnuih tơbiă anăn kơ khua pơ ala Jơnum min pơ ala mơnuih ƀôn sang tơring čar tal 10 (rơwang bruă 2021-2026).

Amăng mông jơnum, hăng pran jua tŭ ư hrom prong, ƀing khua pơ ala hmâo pơsit tŭ ư hră čih anăn 12 čô mơnuih mơng tơring čar tơbiă anăn kơ Khua pơ ala mơnuih ƀôn sang dêh čar ta tal 15 hăng 138 čô mơnuih tơbiă anăn kơ Khua pơ ala Jơnum min pơ ala mơnuih ƀôn sang tơring čar Daklak rơwang bruă pơ̆ anăp. Mơng bôh tơhnal bơkơtuai anai mơ-ĭt kơ Jơnum min djop djuai ania mơnuih mơnam dêh čar Việt Nam tơring čar amra mơ-it mă tơlơi gum pơhiăp pơsit hăng đăo gơnang mơng mơnuih ƀôn sang ƀơi anih dô̆ mơng lơ 21/3 truh lơ 13/4 hăng mơnuih dưi hmâo ƀirô, khul grŭp, anom bruă lăi pơthâo mơnuih tơbiă anăn kơ khua pơ ala mơnuih ƀôn sang dêh čar tal 15 hăng khua pơ ala Jơnum min pơ ala mơnuih ƀôn sang tơring čar, rơwang bruă 2021-2026 tui tơlơi pơkă. Rơwang bruă 2021-2026, Daklak dưi pơpha 9 čô khua pơ ala mơnuih ƀôn sang dêh čar. Amăng anun, 5 čô khua pơ ala ƀơi anih dô̆ hăng mă bruă ƀơi tơring čar, 4 čô khua pơ ala yua kơ dêh čar ta lăi pơthâo. Mrô khua pơ ala Jơnum min pơ ala mơnuih ƀôn sang tơring čar lĕ 75 čô khua pơ ala./.    

Siu H’ Prăk: Pô pơblang