VOV4.Jarai - Tơdơi kơ hơdôm mơnuih F1 hmâo 3 wŏt pơčrang lăng ƀu ƀuh kơman Sars-CoV-2, rơbêh kơ 140 čô mơnuih ƀôn sang amăng kual guang dar ăt ba glăi mơn bôh tơhnal 2 wot pơčrang lăng ƀu ƀuh kơman, rơwang hrơi tơjuh rơgao, Jơnum min mơnuih ƀôn sang tơring čar Daklak hmâo pơsit lui hĭ bruă guang dar hăng kual mơnuih ƀôn dô̆ ƀơi jơlan añep 189/1 Mai Hắc đế, phường Tân Thành, plơi prong Buôn Ma Thuột, tơring čar Daklak – anih čih hmâo 2 čô mơnuih ƀă kơman Covid-19. Hơk mơ-ak yua kơ hmâo lui hĭ laih tơlơi guang dar samơ̆, mơnuih ƀôn sang ăt khut khăt mơn, ƀu lui raih ôh hăng bruă pơgang, pơgăn klin Covid-19.

Hlâo kơ lui hĭ bruă guang dar, hơdôm mơnuih mă bruă gah ia jrao amăng sum ao pơgang hmâo pruih jrao pơdjai kơman tal rơnuč ƀơi kual mơnuih ƀôn sang dô̆ jơlan añep mrô 189/1 jơlan Mai Hắc Đế, phường Tân Thành, plơi prong Buôn Ma Thuột – anih čih pioh 2 čô mơnuih ƀă kơman Covid-19. Tơdơi kơ anun, djop war guang dar, pơgăn dưi ruh lui. Khua Jơnum min mơnuih ƀôn sang phường Tân Thành pơđok tơlơi pơsit lui hĭ bruă guang dar hăng jao hră tŭ yap rơgao hrơi dô̆ čơlah hăng rơbêh kơ 100 čô mơnuih. Čơkă mă ră tŭ yap, ơi Bùi Trung Khánh brơi thâo:        

 “Ƀing gơmơi ƀuh mơ-ak biă, hơk mơ-ak, yua kơ amăng hơdôm hrơi rơgao hmâo ngă tui klă laih tơlơi pơkă mơng kơnuk kơna, mơng Gong gai dêh čar kơ dô̆ čơlah, ngă tui tơpă hơdôm tơlơi pơkă mơng phường. Pơ̆ anăp anai ƀing gơmơi ăt dô̆ čơlah mă pô mơn ƀơi sang pô hăng lăng tui tơlơi suaih pral dong 7 hrơi, lom anun tơdah tơlơi suaih pral pơhlôm thơ amra nao mă bruă kah hăng hlâo adih”.           

Khul mă bruă pơgang klin ruh lui hrĕ guang dar

Hlâo kơ anun, amăng mơmot lơ 8/5, čih pioh hmâo sa čô mơnuih ƀă kơman Covid-19 ƀơi jơlan añep mrô 189/1 jơlan Mai Hắc Đế lĕ pô ƀă kơman klin mrô 3237. Amăng mơmot lơ 8/5 mơtăm, tơring čar Daklak hmâo pơsit guang dar, dô̆ čơlah ƀơi jơlan anai hăng 47 bôh sang anô mơnuih ƀôn sang dong, 144 čô mơnuih. Lom guang dar, Gơnong bruă ia jrao hmâo mă laih ia akhak ia adung pơčrang lăng tal dua brơi abih bang hơdôm bôh sang anô̆ ƀơi anai, leng kơ ƀu ƀuh kơman klin Sars-CoV-2 ôh. Yă Lê Thị Ngọc Hương ƀơi jơlan añep 189/1 jơlan Mai Hắc Đế, phương Tân Thành, plơi prong Buôn Ma Thuột ră ruai:           

 “Tơdơi giăm hmâo 20 hrơi mưn ƀuh ol kơdol pran jua hăng ăt čang rơmang mơn ƀu hmâo hlơi tui hăng anai. Khă giăm hmâo 20 hrơi dô̆ amăng kual čơlah ƀu mơ-ak ôh, khă hnun hai lăng hrom ƀuh djop mơnuih ăt ha pran jua, ăt čang rơmang mơn klin ruă tañ rơgao hĭ, kiăng klin ruă ƀu nao pơ̆ kual mơnuih ƀôn sang dô̆ tui anai dong tah”.           

            Mơnuih ƀôn sang amăng kual guang dar mơ-ak čơkă mă hră tŭ yap hmâo ngă giong hrơi dô̆ čơlah

Kual mơnuih ƀôn sang dô̆ hmâo guang dar ƀơi jơlan añep 189/1 Mai Hắc Đế, phường Tân Thành, plơi prong Buôn Ma Thuột hmâo 47 bôh sang anô̆ hăng rơbêh kơ 140 čô mơnuih, amăng anun hmâo 20 bôh sang anô̆ sang apah, jing pô mă yua tui hluai pô. Amăng hơdôm hrơi dô̆ čơlah, hrom hăng bruă pơpha khul mơnuih dô̆ gak kiăng pơhlôm rơnuk rơnua, pơhlôm, pơgang klin, gong gai phường hmâo iâu pơthưr laih hơdôm mơnuih thâo tơngiă gum djru khul hăng gơnam kiăng yua ƀong huă kiăng pơhlôm kơ tơlơi hơdip kơ mơnuih ƀôn sang. Kiăo tui anun, hmâo giăm truh 50 klăk prăk; rơbêh kơ 5 tơn añăm hla rok, hơbơi pơtơi, bôh troh; giăm hmâo 15 tơn braih; hơdôm rơtuh kơthung mì tôm hăng lu gơnam kiăng yua djop mơta dưi hmâo ƀing thâo tơngia gum djru brơi kơ mơnuih ƀôn sang ƀơi anai.           

Yă Trần Thị Dinh, Kơ-iăng Khua Jơnum min mơnuih ƀôn sang phường Tân Thành, plơi prong Buôn Ma Thuột, tơring čar Daklak brơi thâo: Pơ̆ anăp anai, khă hmâo lui laih bruă guang dar, phường ăt hmâo dong mơn bruă lăng tui, hơduah ĕp tơlơi suaih pral hơdôm mơnuih dô̆ amăng kual anai kiăng hmao pơsir tơdah hmâo tơlơi phrâo truh.          

 “Tơdơi kơ lui lơi tơlơi guang dar lĕ grŭp Črâo ba bruă pơgang pơgăn klin kheng Covid mơng phường lăng tui dong, lăi pơthâo kơ neh wa ngă klă dong bruă pơgang pơgăn klin Covid-19 ră anai. Neh wa hmâo pơdah pơtuk, pơ-iă drơi jăn, ruă akô̆ lĕ neh wa lăi pơthâo hăng Anom ia jrao phường Tân Thành kiăng hmâo tơlơi pơtô ba rơđah”.           

Tui hăng ơi ia jrao Nguyễn Trung Thành, Kơ-iăng Khua Gơnong bruă ia jrao, Gơnong bruă ia jrao ră anai iâu pơhrui laih djop khul mơnuih gum hrom pơgang, pơgăn klin Covid-19, amăng anun anom bruă ia jrao să, phường, tơring kual ƀơi tơring čar gum hơgô̆p prong amăng truh kih wai lăng klin ruă. Hăng pô phun mă bruă hăng jing anih anom ia jrao giăm mơnuih ƀôn sang hloh anun glông bruă ia jrao – anom ia jrao să, phường, tơring kual hmâo bruă mă yôm phăn amăng pơgang, pơgăn klin Covid-19.           

Hơdôm hrơi rơgao, lom ƀơi tơring čar Daklak čih djă pioh hmâo 3 čô mơnuih ƀă kơman hăng Sars-CoV-2, hơdôm bôh anom ia jrao să, phường, tơring kual leng kơ pơpha khul mơnuih dô̆ gak hrơi mlăm kiăng bŏng glăi hăng djop tơlơi klin ruă amra truh. Hrom hăng anun, kơtưn lăng tui tơlơi suaih pral mơnuih ƀôn sang ƀơi tơring čar hmâo tlôn thâo hơdôm anô̆ pơdah gah rơngiao pơ-iă drơi jăn, pơtuk, tơnap suă jua kiăng pel ĕp tơlơi suaih pral hăng pơsir hmao tlôn tơdah đing đăo hmâo mơnuih ƀă kơman klin Covid-19; pơphô klă kơ grŭp črâo ba pơgang, pơgăn klin ƀơi anai gum hrom hăng hơdôm bôh anom pruih jrao pơdjai kơman; pơtô brơi hơdôm bôh sang anô̆, kual plơi agaih rơmet sang dô̆, lăi pơthâo tơlơi suaih pral; wai lăng kơjăp hơdôm mơnuih glăi mơng anih klin ngă kiăng hmao ngă tui tơlơi pơkă dô̆ čơlah hơbit, dô̆ čơlah ƀơi sang hăng pơkiăo nao mơnuih mă bruă ia jrao lăng tui, pel ĕp tơlơi suaih pral rim hrơi pioh kơ mơnuih ƀôn sang hmâo dô̆ čơlah. Pơ̆ anăp anai, Gơnong bruă ia jrao tơring čar Daklak amra pơdŏng grŭp pel ĕp hăng pơphun pel ĕp ƀu hmâo lăi pơthâo hlâo hơdôm bôh sang ia jrao, kiăng pơkra pơplih, pơtă pơtăn ăt kah hăng pơtô brơi hơdôm bôh anom pok pơhai klă bruă pơgang, pơgăn klin ƀơi tơring čar./.

Siu H’ Prăk: Pô pơblang