VOV4.Jarai - Yang hrơi lơ 31/5 Ding jum ia jrao lăi pơthâo hơmâo dong 1 čô mơnuih ƀă klin Covid-19 ƀơi tơring čar Daklak, lĕ mơnuih ƀă klin mrô 7186. Pô anai dŏ ƀơi ƀut plơi 7, să Čư̆ Mốt, tơring glông Ea H’Leo, lĕ F1 hăng mơnuih ƀă klin ƀơi ƀôn prong Hồ Chí Minh. Ƀơi anăp kơ tơlơi tơnap tap mơng klin kheng, tơring glông Ea H’Leo ječ ameč pok pơhai hơdôm hơdră guang dar kiăng pơgang klin. Tơdơi kơ ha hrơi, rơbêh kơ 600 čô mơnuih F1, F2 hăng F3 arăng kiăo tui ĕp, 10 anih glăk ngă tui tơlơi črâo trun guang dar. Bruă pơčlah mơnuih mơnam ăt hơmâo pơphun ječ ameč.

Ơi Nông Ngọc Thiết, Khua Jơnum min mơnuih ƀon sang să Ea Wy, anai lĕ anih bơdjơ̆ nao mơnuih ƀă klin mrô 7186, brơi thâo mơng 10 mông mơmŏt lơ 30/5, anom bruă bơdjơ̆ nao ƀơi ƀon lan hơmâo pơdong anih dŏ gak, guang dar hơdôm anih anun lĕ sang mơñum kơphê Thanh Dậu, sang mơñum kơphê Cây Si, sang ƀong huă Ba Khía, sang khăm pơjrao tơgơi Việt Pháp 2, laih dong kiăo tui ĕp ƀing mơnuih F1, F2:

Lơ̆m pok pơhai djop mơta bruă hơmâo kiăo tui ĕp 27 čô mơnuih lĕ F1, ƀing mơnuih F2 giăm 200 čô. Ƀing gơmơi hơmâo pơdong 5 anih dŏ gak ƀơi hơdôm anih mơnuih ƀă klin F0 hlâo anun weh nao. Hơdôm anih dŏ gak hơmâo pôr amăng loa. Ƀing gơmơi rơkâo hơdôm anom bruă ia jrao ƀơi să tŏ tui kiăo tui ĕp ƀing mơnuih F1, F2 hăng F3. Kơ bruă anai ƀing gơmơi jak iâu mơnuih ƀon sang hmư̆ tơlơi pơhing hăng nao phaih gah ia jrao.

Anih dŏ gak ƀơi ƀut plơi 6a să Čư Mốt

Bơ ƀơi să Čư̆ Mốt, anih hơmâo mơnuih ƀă klin Covid-19 mrô 7186, mơng mơmŏt mrô 30/5 truh ră anai gong gai să hơmâo kiăo tui ĕp hăng ba nao pơčlah pơƀut 15 čô mơnuih F1. 150 čô mơnuih F2 hăng 180 čô mơnuih F3 hơmâo arăng pơtô brơi bruă pơčlah. Să ăt hơmâo pơdong 5 anih dŏ gak guang dar ƀơi 3 ƀut plơi pla 6a, 6b hăng ƀut plơi 7 hăng 2.500 čô mơnuih. Ơi Võ Văn Lệ, Kơ-iăng khua Jơnum min mơnuih ƀon sang să Čư̆ Mốt, brơi thâo: rĭm anih guang dar, gong gai să hơmâo pơpha 7 čô mơnuih hơmâo tơhan wai amăng plơi pla, hlăk ai, khul đah kơmơi hăng kông ang. Bruă djru tui tlôn kơ mơnuih ƀon sang amăng kual guang dar hơmâo đing nao:

Ƀing gơmơi jao rĭm grup 2 čô hlăk ai hăng đah kơmơi lơ̆m mơnuih ƀon sang amăng kual guang dar rơkâo hơget thơ ƀing gơmơi amra lăi pơthâo brơi grup hlăk ai djru nao blơi gơnam tam neh met wa či yua. Jơnum min djop djuai ania mơnuih mơnam ăt jak iâu abih bang mơnuih apăn bruă, mơnuih mă bruă amăng să gum pơgôp pơgang klin.

Guang dar sang mơñum ƀong Ba Khiá să Ea Wy

Tui hăng ơi Nguyễn Văn Hà, Khua Jơnum min mơnuih ƀon sang tơring glông Ea H’Leo, truh 14 mông lơ 31/5, tơring glông anai hơmâo kiăo tui ĕp 62 čô mơnuih F1, rơbêh 300 mơnuih F2. Ră anai abih bang ƀing mơnuih F1 hơmâo ba nao pơčlah pơƀut amăng tơring čar lĕ Sang hră Cao đẳng Công Nghệ Tây Nguyên. Tui hăng pơčrang lăng tal 1 hơmâo 47/62 čô mơnuih huăi ƀă virus Sars-Cov2. Mơng 9 mông lơ 31/5 Jơnum min mơnuih ƀon sang tơring glông ăt hơmâo pơčlah mơnuih mơnam tui tơlơi črâo trun mrô 15 mơng Khua dêh čar ƀơi tơring kual Ea Đrăng, să Ea Wy.

Ơi Nguyễn Văn Hà brơi thâo, gong gai ƀon lan hơmâo prap lui hơdră pơhlôm brơi gơnam ƀong huă brơi mơnuih ƀon sang. Hrŏm hăng anun, Jơnum min mơnuih ƀon sang tơring glông hơmâo jao bruă brơi rĭm anom bruă hăng rơkâo anom bruă bơdjơ̆ nao khŏm pơsir khut khăt ƀing mơnuih ngă soh bruă pơčlah mơnuih mơnam:

Anom bruă gru grua pel ĕp amăng hơdôm anih ƀing gơñu wai lăng, Anom bruă pơphun bruă mă pel ĕp hơdôm brua bơdjơ̆ nao tơlơi đăo bơ kông ang pel ĕp hơdôm anih pơgiăng hyu tuai. Hăng hơdôm să, hơdôm anom bruă tơdah brơi hơmâo tơlơi ngă soh ƀing mơnuih apăn akŏ amra glăm ba. Anăm pơtah tai samơ̆ kiăng kơ prap lui na nao, anăm bral rơngal ôh.

Tal hơđuh đĭ klin Covid-19 tal 4 anai, Daklak hơmâo 4 čô mơnuih ƀă klin lĕ mơnuih ƀă klin mrô 3237, 3334, 3836 hăng 7186. Tơring čar hơmâo pơčlah pơƀut, pơčlah hơdôm rơtuh čô mơnuih F1, pơčlah mă pơ sang rơbêh 5 rơbâo čô mơnuih hăng hơmâo rơbêh 3 rơbâo čô mơnuih hơdip ƀơi anih guang dar.

Siu Đoan: Pơblang