VOV4.Jarai - Ƀơi anăp kơ tơlơi tơnap tap mơng klin Covid-19, tlam lơ 31/5, Jơnum min mơnuih ƀon sang plơi prong Buôn Ma Thuột, tơring čar Daklak pơphun pok glăi hơdôm anih wai lăng mơng djop anom bruă kơtuai tui jơlan glông Hồ Chí Minh ară jơlan găn nao tơdrông mrô 14 să Hoà Phú kiăng pơgang klin Covid-19.

Pok glăi hơdôm anih gum hrŏm wai pơgang klin kơtuai tui jơlan Hồ Chí Minh ară jơlan găn nao tơring čar Daklak

Tui anun, pơphun mơng 5 mông tlam lơ 31/5, hơdôm anom bruă wai lăng jơlan glông, pơhlôm rơnuk rơnua, ia jrao … ƀơi hơdôm anih wai lăng, pel ĕp mơnuih hăng rơdêh, amăng tơring čar Daklak kiăng pơgăn hŭi klin lar hyu; pel ĕp bruă ngă tui bruă pơgang klin hăng ngă tui bruă gah ia jrao (pơčrang lăng drơi jăn, truă khăn gôm ƀô̆, phaih gah ia jrao, pruih ia jrao hmao tlôn hơdôm rơdêh găn nao rai. Laih dong kiăo tui lăng, ĕp ƀuh tañ ƀing mơnuih ƀă klin hăng jê̆ giăm hăng mơnuih ƀă klin, ƀing mơnuih him lăng ƀiă klin Covid-19 kiăng kơ ngă tui hơdră pơčlah, pơjrao tơdah hơmâo klin.

Ƀing nao ia jrao črâo brơi mơnuih ƀon sang phaih gah ia jrao

Mơmot lơ 31/5, yă H’Yim Kđoh - Kơ-iăng khua Jơnum min mơnuih ƀon sang tơring čar Dăk Lăk ngă rah Kơ-iăng khua git gai pơgang klin Covid-19 mơng tơring čar hơmâo kĭ hră pok pơhai hơdră pơgang klin ječ ameč lơ̆m tơring čar phrâo hơmâo mơnuih ƀă kman Covid-19 tal 4 ƀơi tơring glông Ea H’leo (pô ruă mrô 7187). Tui hăng tơlơi pơtrun, abih bang plơi prong Buôn Ma Thuột amra ƀu brơi dŏ pơƀut rơgao 10 čô ƀơi sang ƀong huă, sang mơñum kơphê; anih ngui ngor. Pơdơi jăng jai bruă sĭ mơdrô mơñum ƀong ƀơi kơtuai jơlan. Ăt tui tơlơi pơtrun anai mơn, mơnuih mơng ataih glăi hăng mơnuih mơng pơkŏn rai pơ tơring čar hơmâo klin Covid-19 khŏm nao pơhaih pơ sang ia jrao giăm sang laih anun hơmâo pơtô ba dŏ pơčlah pơ sang amăng 21 hrơi. Ƀơi tơring glông Ea H’leo ngă tui klă hơdră guang dar, dŏ pơčlah, pơgang klin pơphun mơng 9 mông mlăm lơ 31/5/2021 truh hrơi hơmâo tơlơi lăi glăi phrâo.

Siu Đoan - Siu H’Mai: Pơblang