VOV4.Jarai - Amăng mông mă bruă hăng khua mua grup FLC, Khul apăn bruă Ping gah tơring čar Daklak hơmâo tŭ ư hăng tơlơi pơtrun tuh pơ alin akŏ bruă man pơkra hơdôm anih bơwih brơi tuai čuă ngui, anih ngui ngor hăng tơdrŏn taih gofl ƀơi dơnao Ea Nhái ƀơi să Čuôr Đăng, tơring glông Čư̆ Mgar prong giăm 200 ektar.

Amăng mông mă bruă, Khua git git kông ti pơčruh ngăn FLC lăi: Akŏ bruă man pơkra hơdôm anih čuă ngui đang glai, anih ngui ngor hăng tơdrŏn taih gofl ƀơi dơnao Ea Nhái ƀơi să Čuôr Đăng, tơring glông Čư̆ Mgar lơ̆m hơmâo tơring čar Daklak tŭ ư, hrŏm hăng tơlơi gir run mơng djop anom bruă kơđi čar, kông ti amrra pok pơhai man pơkra amăng blan 9 anai, amăng kual lŏn prong 190 ektar.

Thun blan pơkă ngă pơgiong amăng 1 thun amra giong tơdrŏn taih gofl hăng kaih hloh 2 thun amra pơgiong abih ring bruă anai. Khua git gai Ping gah tơring čar Daklak tŭ ư hăng tơlơi pơtrun tuh pơ alin mơng grup FLC ƀơi dơnao Ea Nhái hăng rơkâo Jơnum min mơnuih ƀon sang akŏ pơjing Khul git gai djru bruă mă hăng pơsir hĭ tơnap tap, gun găn brơi kông ti FLC lơ̆m pơphun man pơkra.

Siu Đoan: Pơblang