VOV4.Jarai - Kông ang tơring čar Daklak phrâo pơphun jơlan hơdră pơbưp ƀô̆ mơta tui phiăn juăt Hơdor glăi 90 thun Hrơi pơdŏng Khul hlăk ai Cộng sản Hồ Chí Minh (26-3-1931 – 26-3-2021). Amăng mông pơbưp ƀô̆ mơta, ƀing mơnuih pơ ala hmâo lok glăi gru grua 90 thun Hrơi pơdŏng Khul hlăk ai Cộng sản Hồ Chí Minh, hrom hăng lăng glăi pran jua prong pran săn hơtai, gum hrom mơng hlăk ai Kông ang tơring čar ƀơi hơdôm anih anom, djru pơhlôm rơnuk rơnua hơđong, pơhlôm klă mơnuih mơnam amăng tơring čar. Kơnong kơ thun 2020, hơdôm khul grŭp hlăk ai amăng abih bang Kông ang tơring čar hmâo ngă tui laih 126 tal gum djru ƀơi hơdôm bôh plơi pla, să hăng abih bang nua ñu giăm truh 3 klai prăk; ƀơk 23 anung prăk djru hrăm hră “Djru pran  čơđai nao sang hră” kơ čơđai sang hră tơnap tap, hăng mrô prăk rơbêh 82 klăk prăk; pha brơi 20.000 blah bơnal gôm adung mơbah hăng gơnam tam kiăng yua rơbêh kơ 150 klăk prăk djru mơnuih ƀôn sang  pơgang, pơgăn klin Covid-19. Hrom hăng anun pơsur, gum hrom pơgiăng 8 tơn gơnam, 420 klăk prăk djru neh wa kual Tŏng krah dêh čar bơbeč djơ̆ yua ayuh hyiăng ƀu klă ngă; gum hrom brơi giăm truh 600 anung drah.

Anom bruă tơdăm dra mut phung tơring čar Kon Tum phrâo ngă hrŏm hăng Gơnong bruă Pơtô hăng Pơjuăt pơphun Hrơi mơak jơnum prong anăn “Čơđai muai mơak găng añrăng-yak nao jing  Tơdăm dra mut phung”. Ƀơi mông jơnum mơak anai, ƀing čơđai sang hră rŭi hyu tui hăng grup čơđai sang hră mut phung juăt ngă thăng jơnum gru grua čơkă mơak hơdor glăi 90 thun Hrơi akŏ pơjing khul tơdăm dra mut phung rơnuk HCM lơ 26/3; pơdah lu hơdră adoh suang mơak hăng akŏ ñu bơni kơ plơi pla, lŏn ia, gru grua mơ̆ng Khul tơdăm dra mut phung rơnuk HCM hăng bơni čơđai muai Việt Nam. Ƀrô djơ̆ tal anai, anom bruă tơdăm dra mut phung tơring čar Kon Tum hơmâo ƀơk brơi 13 anung prăk hrăm hră kơ čơđai sang hră hrăm hră thâo amăng bơyan hrăm tal sa rơgao.

Siu H’ Prăk – Nay Jek: Pô pơblang