VOV4.Jarai - Anom wai lăng dlai kyâu (Ding jum đang hmua hăng pơđĭ kyar ƀôn lan dêh čar ta) lăi pơtă hlâo hui apui ƀong dlai ƀơi Dăp Kơdư glăk ƀơi rơnoh huĭ rơhyư̆t. Anom wai lăng dlai kyâu pơtă mơnuih ƀôn sang khut khăt ƀu mă yua apui amăng dlai klô hăng giăm guai dlai klô yua kơ huĭ apui ƀong dlai. Ƀơi anăp tơlơi anun, gơnong bruă wai lăng dlai kyâu hơdôm anih anom amăng kual hmâo pok pơhai laih bruă pơgang pơgăn huĭ apui ƀong dlai.

Wai lăng pơgang rơbêh kơ 13 rơbâo ektar dlai klô, rim wot truh bơyan phang, Grŭp wai lăng dlai klô pơgang hlôm hlâo Hra, tơring glông Mang Yang, tơring čar Gialai glăi gum hrom hăng mơnuih ƀôn sang čuh rơmet jum dar, rok krô kơ dlai. Ơi Nguyễn Văn Chín, Khua Grŭp wai lăng brơi thâo, bơyan phang thun anai, 1.000 ektar dlai amra hmâo tơlơi apui ƀong dlai prong, dưi pơsir laih jum dar rok krô jum dar pơhlôm. Grŭp gum hrom hăng hơdôm bôh sang anô̆ čơkă dlai jao wai lăng hmâo agaih rơmet 13 km jơlan pơgăn apui, hrom hăng anun kơtưn bruă hyu tir pơgang hlôm hlâo huĭ apui ƀong dlai:

“Ƀing gơmơi lăi pơthâo pơsur hăng kĭ pơkôl hăng hơdôm bôh sang anô̆ mơnuih ƀôn sang dô̆ giăm dlai pok pơhai hơdôm hơdră pơgăn apui ƀong dlai pơhlôm djơ̆ tơlơi kiăng pơgang. Pơphun hyu tir dô̆ gak ƀơi hơdôm kual phun hăng jơlan gah pơgang hlôm hlâo lĕ phun ñu, pơgăn apui ƀong khom hmao tlôn”.

Gialai pơphun jah agaih rơmet jơlan pơgăn apui ƀong ƀơi hơdôm anih amra hmâo apui ƀong prong

Tơring glông Mang Yang ră anai hmâo rơbêh kơ 53 rơbâo ektar dlai klô, amăng anun hmâo giăm truh 6 rơbâo ektar gah hơdôm kual phun apui ƀong anun lĕ: Ayun, Đê Ar, Đăk Trôi, Đăk Djăng. Ơi Trần Tất Đắc, Kơ-iăng Khua Anom wai lăng dlai kyâu tơring glông Mang Yang, brơi thâo: Kiăng gơgrong hlâo pơgang, pơgăn apui ƀong dlai, tơring glông Mang Yang hmâo ngă giong laih Grŭp git gai pơgang hlôm hlâo huĭ apui ƀong gưl să, pơdŏng jơlan gah 4 mơta hơđăp, hrom hăng anun pơdŏng hơdôm grŭp, khul pơgang, pơgăn apui ƀong dlai klô hăng khul wai lăng truh kơ ha rơtuh čô mơnuih, phun ñu lĕ mơnuih ƀôn sang ƀơi anai kiăng pơgang pơgăn apui ƀong dlai klô mơng blung mơtăm.

“Pơgang dlai jing bruă phun hăng yôm phăn lĕ pơgang, pơgăn apui ƀong dlai klô khom mă bruă pơgang hlôm hlâo phun ñu. Lom hmâo apui ƀong thơ amra yua lu mơta gơnam tam, yap wot rơdêh rơnuk anai kah hăng hơdôm bôh dêh čar pơđĭ kyar samơ̆ ăt đing nao hlâo mơn bruă pơgang hlôm hlâo huĭ apui ƀong khom dưi lăng nao hlâo”.

Ƀơi tơring čar Lâm Đồng, mơng hlâo kơ tết tui phiăn juăt truh ră nai, kual dlai kyâu hngô amuñ apui ƀong raih ataih rôk tui jơlan 27C găn hơdôm bôh să Dă Sar, Dă Nhim, Dă Chais gah tơring glông Lạc Dương dưi hmâo Grŭp wai lăng dlai pơgang hlôm hlâo Dă Nhim hăng hơdôm bôh sang anô̆ čơkă wai lăng dlai jao hmâo pơpha mơnuih dô̆ gak ƀơi hơdôm anih anom, pơphun hyu tir na nao kiăng thâo hmao tlôn tơdah hmâo apui ƀong dlai. Ơi Ha Dinh, djuai ania K’ho, sang anô̆ čơkă mă wai lăng pơgang dlai ƀơi să Dă Sar brơi thâo:

“Anom hmâo kơčăo bruă lĕ pơdŏng grŭp kiăng pơpha kơ djop mơnuih nao gak. Tơdah lom ƀuh apui ƀong thơ ƀing gơmơi lăi pơthâo mơtăm kơ anom, anom amra lăi pơthâo glăi tañ kơ Grŭp kiăng tum pơƀut khul mơnuih pơgăn apui ƀong hmao tlôn.

Lăi pơhing kơ mơnuih ƀôn sang pơđĭ tui tơlơi pơmin pơgang dlai klô

Ơi Nguyễn Khang Thiên, Khua Anom wai lăng dlai kyâu tơring čar Lâm Đồng brơi thâo, hăng jơlan gah ƀu lui raih, gơgrong hlâo anun djop jơlan gah pơgang pơgăn dlai dưi hmâo hơdôm bôh anom pok pơhai mơng akô̆ bơyan phang mơtăm.

 “Ƀing gơmơi hmâo kơtưn črâo ba hơdôm bôh Anom wai lăng dlai kyâu, Grŭp wai lăng dlai kyâu mă bruă lom kiăng, hơdôm anom juăt bruă, hơdôm pô dlai pơtrut kơtang bruă wai lăng pơgang dlai, pơgang hlôm hlâo huĭ apui ƀong dlai. Amăng anun đing nao bruă lăi pơhing, đing nao hơdôm anih anom juăt hmâo apui ƀong kiăng pơhlôm ba glăi bôh tơhnal bruă pơgang, pơgăn apui ƀong dlai”.

Lâm Đồng pơhrăm pơgang pơgăn apui ƀong dlai klô  

Ƀơi hơdôm anih anom phun amuñ hmâo apui ƀong dlai ƀơi tơring čar Kontum, kah hăng: tơring glông Đăk Tô, Kon Braih, Ngọc Hồi, Ia Hdrai, Đang dlai lŏn ia Čư̆ Mom Ray... hơdôm anom bruă pô dlai, gơnong bruă đang kyâu hăng gong gai hơdôm anih anom hmâo iâu pơhrui đut hlah khul mơnuih pơkiăo nao gak wai wot hrơi mlăm. Hăng tơring glông ƀơi guai lŏn ia hmâo rơbêh 88 rơbâo ektar dlai klô hăng lŏn kyâu, abih bang lŏn dlai kyâu glăk ƀơi gưl pơkă lăng hlâo apui ƀong dlai huĭ rơhyư̆t biă, ơi Nguyễn Quốc Tuấn, Khua Anom wai lăng dlai kyâu tơring glông Ia Hdrai, brơi thâo:

“Pơ-iă hang sui hrơi, phang khôt amra ba truh apui ƀong prong biă. Ƀing gơmơi ăt pơsit mơn hơdôm kual phun kiăng pơđar dô̆ gak hrơi mlăm. Ƀing pô dlai hmâo khul wai lăng pơgang dlai. Khul anun pơgang rah dlai klô hăng amăng bruă pơgang hlôm hlâo huĭ apui ƀong dlai hlao. Hrom hăng anun pơkă gum hrom hăng hơdôm bôh anom, hăng Jơnum min mơnuih ƀôn sang să laih anun hơdôm anom bruă tơhan pơdŏng ƀơi anai. Pel ĕp ƀing pô dlai khom ngă tui djơ̆ jơlan gah hmâo pơsit tui jơlan gah 4 mơta hơđăp kiăng prăp lui lom hmâo apui ƀong truh”.

Kiăng gơgrong hlâo bruă pơgang hlôm brơi rơbêh kơ 610 rơbâo ektar dlai klô, hơdôm bôh anom pô dlai ƀơi Kontum hmâo ngă laih hơdôm rơbâo km jơlan pơgang apui; pơdŏng hơdôm anih dô̆ gak, anom kiăng wai lăng mơnuih mut tơbiă; agaih rơmet, čuh rok krô jum dar kiăng plai ƀiă huĭ hmâo apui ƀong dlai; pơphun kĭ pơkôl hăng rim sang anô̆ kiăng wai lăng bruă agaih rơmet đang hmua bĕ apui ƀong hlia hyu truh pơ̆ dlai klô./.

Siu H’ Prăk: Pô pơblang