VOV4.Jarai - Mơng lơ 27/5 truh ră anai, ƀơi tơring čar Gia Lai ƀuh 4 anih hơmâo klin ngă pơđeh pơrơtut ƀơi klĭ kơbao, rơmô, hăng giăm 70 drơi ƀơi 3 boh tơring glông anun lĕ Mang Yang, Čư̆ Sê, Đăk Đoa laih anun amuñ ƀă hyu pơ anih pơkŏn dong. Ră anai, pŭ rơmô kơbao mơng tơring čar Gia Lai lĕ rơbêh 435 rơbâo drơi, lu tal 2 amăng dêh čar ta; arăng rông kiăo tui sang anŏ đôč, ƀơi kual mơnuih ƀon sang djuai ƀiă yơh rông lu.

Bruă pơgang klin, wai lăng rơmô kơbao yôm biă mă hăng tơlơi bơwih ƀong mơng mơnuih ƀon sang. Yua hnun, Jơnum min mơnuih ƀon sang tơring čar Gia Lai hơmâo hră pơtrun ječ kơ hơdră pơgang klin ngă pơđeh ƀơi klĭ rơmô kơbao. Tui anun, Jơnum min mơnuih ƀon sang tơring čar Gia Lai git gai hơdôm plơi pla hăng anom bruă ngă hmua hơmâo hơdră pơgăn klin lar hyu, blơi vaccine tlâ̆o kơ hlô rông, djru ba prăk kăk hăng gum čuh hĭ rơmô kơbao djai, krăp lăng gơnam rông kiăng thâo pơgang hlâo.

Siu H’Mai: Pơblang