VOV4.Jarai-Mơguah tom brơi, lơ 11/3, ơi Võ Ngọc Thành, Kơ-iăng khua git gai ping gah, Khua jơnum min mơnuih ƀôn sang Gia Lai nao jơnum hrom jak iâu “Tết pla kyâo hơdor na nao kơ Wa Hồ” thun 2021 yua Kông an tơring čar pơphun.

Hăng bruă ngă jak iâu pơkơtưn mă bruă, hơdôm thun rơgao, tơhan kông an pơgang kơđi čar, rơnuk rơnua kơ mơnuih mơnam, ăt djru hrom lu mơ̆n bruă mă pơsir hmao kru tơlơi ngă sat kơ glai klô ayuh hyiăng anih hơdip jum dar, mơ̆ng anun, dưi pơgang klă glai klô amăng tơring čar.

Pơhiăp ƀơi mông jơnum, ơi Võ Ngọc Thành hrom hăng khua mua, tơhan kông an tơring čar hơmâo pơtrun bruă pla lu phun kyâo lăi nao anŏ kiăng, yua kơ anih hơdip jum dar jai hrơi mơtah mơda hiam klă na nao.

Amăng thun 2021, rĭm boh anom bruă amăng kông an tơring čar khom pla boh ƀiă mơ̆ng 2 phun pơngŏ, gleng nao pla kyâo pơprong, sui thun, lu mơta kiăng; hơdôm thun tŏ tui khom pla lu hloh kiăng tơ-ui đĭ tui truh 1,5 wơ̆t pơkă hăng thun hlâo.

Nay Jek: Pơblang