VOV4.Jarai-Hrŏm amăng dêh čar ta, Khul git gai wai lăng rơnuk rơnua jơlan glông tơring čar Gia Lai pơphun jơnum, jak iâu hrơi blan mă bruă kơtang hloh, hyu pơtô pơblang, pôr pơthâo tơlơi phiăn hăng hyu tir ĕp ƀuh pơsir tơlơi soh rơnuk rơnua, hơđong rô nao rai ƀơi jơlan glông kơ hlăk ai tơdăm ngek dra muai mơnuih djuai ƀiă kiăng pơhrŏ ƀiă tơlơi truh rơdêh pơjrom amăng kual mơnuih djuai ƀiă lơ̆m tơring čar. Nguyễn Thảo, pô čih tơlơi pơhing Gong phun jua pơhiăp Việt Nam ră ruai.

Tui hăng Khul git gai pơgang tơlơi rơnuk rơnua jơlan glông tơring čar Gia Lai, kơnong amăng 2 blan akŏ thun anai, ƀơi tơring čar hơmâo 56 wơ̆t rơdêh pơjrom kơtang biă mă, ngă kơ 46 čô mơnuih djai hăng hơdôm hơpluh čô mơnuih rơka. Ha mơkrah mrô tơlơi truh anun, tơbiă rai mơ̆ng ƀing tơdăm ngek dra muai mơnuih djuai ƀiă.

Amăng anun să Ia Hrŭ, tơring glông Čư̆ Pưh hơmâo 5 čô mơnuih djai. Ơi Huỳnh Thái Nghiêm, Khua Jơnum min mơnuih ƀôn sang să Ia Hrŭ, tơring glông Čư̆ Pưh brơi thâo, abih 5 tơlơi truh anun lêng kơ ƀing đĭ rơdêh thut ƀu klŭm đuăn pơgang akŏ ôh, 2 čô aka ƀu hơmâo hră dưi mơgăt rơdêh thut. Hrŏm hăng phun ñu ba truh tơlơi sat anai, ơi Nghiêm lăi dơ̆ng, hơmâo sa črăn lĕ tơbiă rai mơ̆ng amĭ ama ƀing gơñu kraih đơi ƀu eng kơ ană bă, hơgĕt rơkâo hơmâo soh anun yơh hơmâo tơlơi:

“Sang anŏ ƀu eng đơi kơ ană bă rơkâo rơdêh thut hơmâo mơtam. Mah tơnap hai, samơ̆ sang anŏ ăt gir run blơi rơdêh thut kơ ană bă. Đĭ rơdêh đuăi hyu amăng jơlan glông aka ƀu thâo djop tơlơi phiăn, anun ba truh tơlơi răm ƀăm ruă pran jua djơh hăng anun. Mơnuih amăng sang anŏ dŏ kơtuă biă mă, ƀu pơmin ôh ană bă tơdăm đơr ama, dra đơr amĭ pung kơ djai đuăi. Ruă pran jua biă mă”.

Pơblang tong ten kơ tơlơi truh ƀơi jơlan glông amăng kual mơnuih djuai ƀiă dŏ, Khul git gai rơnuk rơnua jơlan glông tơring čar Gia Lai brơi thâo, lu mơnuih hơmâo tơlơi truh lêng kơ tơdăm ngek dra muai, ƀing mơnuih glăk hơmâo pran mă bruă kơ sang anŏ. Tơlơi soh glăi ba truh tơlơi pơjrom anai lu biă mă, pô đĭ rơdêh thut aka ƀu djop thun ôh, mơgăt rơdêh thut aka ƀu hơmâo hră dưi mơgăt rơdêh thut jua pơprong; mơñum tơpai, mơñum ƀiêr ăt mơgăt rơdêh laih anun đĭ hmar, seng nao rai, ƀu klŭm đuăn pơgang akŏ, aka ƀu hmao pơgăn hĭ ôh, grŭp hơmâo tơlơi truh baih.

Ơi Nguyễn Văn Hạnh, Kơ-iăng Khua Gơnong bruă wai lăng jơlan glông, Kơ-iăng Khua Khul git gai pơgang rơnuk rơnua jơlan glông tơring čar Gia Lai brơi thâo, tal hyu ngă bruă pơtô pơblang, pôr pơthâo tơlơi phiăn hăng hyu tir pơsir tơlơi soh glăi rô nao rai ƀơi jơlan glông kơ tơdăm ngek dra muai mơnuih djuai ƀiă kiăng pơtrut tơlơi thâo hluh, ngă tui djơ̆ tơlơi phiăn kơnuk kơna pơgang rơnuk rơnua jơlan glông amăng kual plơi pla, kual mơnuih djuai ƀiă, boh nik ñu hơdôm boh plơi hơmâo jơlan prong dêh čar găn nao.

Amăng anun, tơring čar gleng nao kơ hơdôm hơdră ngă hrŏm pơtô lăi, pôr pơthâo hăng pơsir khut khăt ngă soh glăi tơlơi phiăn jơlan glông:

“Mơta sa, ngă hrŏm pơtô pơblang tar ƀar hăng jak iâu ƀing hlăk ai tơdăm juăt mơñum tơpai, hyu hôč ngă ang đĭ hyu rơdêh dơ̆ kiăng. Mơta dua lĕ, bruă hyu tir, ĕp lăng, ƀu kơnong ƀơi jơlan dêh čar ôh, hyu tir truh pơ jơlan amăng să, plơi pla, biă mă ñu jơlan nao rai amăng plơi pla ƀôn ƀut, tơbiă nao pơ jơlan prong dêh čar, kiăng pơgăn tơlơi juăt ba truh rơdêh pơjrom ƀơi jơlan prong dêh čar”.

Nao jơnum hrŏm jak iâu, ayong Siu Hiên, plơi Rŭ Rưng, să Ia Hrŭ brơi thâo:

“Kâo pô hai kơñ pơgi sit đĭ rơdêh nao rai ƀơi jơlan prong khom ngă djơ̆ tơlơi phiăn kơnuk kơna, jơlan hơdră Ping gah pơtrun. Hlâo kơ đĭ rơdêh nao pơ jơlan glông, kâo khom klŭm đuăn pơgang akŏ amơ̆I, ƀu mơñum tơpai, ƀiêr ôh, đĭ rơdêh ƀu đuăi hmar seng nao rai, ƀu pơkra mă đing asăp apui rơdêh tă tăn ôh”.

Tal pơphun ngă bruă hyu pơtô lăi, pôr pơthâo tơlơi phiăn hăng hyu ĕp lăng pơsir tơlơi soh ƀơi jơlan glông, tơlơi rơnuk rơnua rô nao rai mơ̆ng ƀing tơdăm ngek dra muai mơnuih djuai ƀiă tơring čar Gia Lai pơphun amăng 3 blan, mơ̆ng ră anai truh abih blan 6 pơ anăp.

Nguyễn Thảo pô čih-Nay Jek pơblang