VOV4.Jarai - Mơguah lơ 26/3, tơring čar Gialai pơphun hrơi pơphun pla kyâo “Yua kơ dêh čar Việt Nam mơtah mơda” ƀơi Anih bơwih brơi tuai čuă ngui Biển Hồ (să Biển Hồ, Pleiku). Amăng mông pơphun, khua git gai Ping gah tơring čar, Jơnum min mơnuih ƀon sang tơring čar Gialai, khua mua pơ ala brơi gơnong bruă, anom bruă amăng tơring čar laih dong anom bruă djru hơmâo gum tơngan hrŏm pla 200 phun kyâo hngo jum dar anih bơwih brơi tuai čuă ngui Biển Hồ (arăng juăt iâu lĕ Dơnao ia Tơ Nung) să Biển Hồ, plơi prong Pleiku.

Mơnuih ƀon sang ngă tui tơlơi jak iâu pla kyâo amăng thun 2021

Ƀơi anai, Khua jơnum min mơnuih ƀon sang tơring čar Gialai brơi thâo, tơring čar glăk anăp nao hơnong pơkă pơjing plơi prong jing plơi prong mơtah mơda pơgang brơi tơlơi suaih pral; pla kyâo glai ƀu djơ̆ kơnong kiăng wai pơgang ayuh hyiăng rơhuông adai đôč ôh mơ̆ ăt djru amăng pơđĭ kyar bơwih ƀong huă, mơnuih mơnam, gru grua hăng tuai čuă ngui. Amăng 5 thun laih rơgao, tơring čar hơmâo pla 20 rơbâo ektar glai kyâo. Tơlơi pơsit mơng Jơnum ruah khua Ping gah tơring čar tal XVI, rơwang thun 2021-2025 ăt ba tơbiă hơnong pơkă pla phrâo 40.000 ektar kyâo glai, đĭ tui glai rưng amăng tơring čar dưm dưm 47,75 % amăng 5 thun pơ anăp anai.

Siu Đoan: Pơblang