VOV4.Jarai - Tom brơi lơ 16/3, Jơnum min djop djuai ania mơnuih mơnam dêh čar Việt Nam tơring čar Gialai pơphun jơnum bơkơtuai tal dua kiăng tŭ ư hrom čih anăn ƀơ ƀiă hơdôm mơnuih tơbiă anăn kơ khua pơ ala mơnuih ƀôn sang dêh čar ta tal 15, khua pơ ala Jơnum min pơ ala mơnuih ƀôn sang hơdôm gưl rơwang bruă 2021-2026.

Amăng mông jơnum, Jơnum min djop djuai ania mơnuih mơnam dêh čar Việt Nam tơring čar Gialai hmâo lăi pơthâo laih hăng pel ĕp hră čih anăn, hrơi tơkeng, tơlơi hơdĭp, bruă mă mơng 13 čô mơnuih gah hơdôm ƀirô, khul grŭp, anom bruă mơng tơring čar Gialai tơbiă anăn kơ khua pơ ala mơnuih ƀôn sang dêh čar tal 15. Tơdơi kơ bơkơtuai kơ tơhnal pơkă phun, hơdră, bruă mă, mrô mơnuih, abih bang khua pơ ala tŭ ư hrom čih anăn 13 čô mơnuih lăi pơthâo tơbiă anăn kơ Khua pơ ala mơnuih ƀôn sang dêh čar tal 15. Jơnum bơkơtuai tal dua ăt čih mơn hră hơdôm mơnuih tơbiă anăn kơ khua pơ ala Jơnum min pơ ala mơnuih ƀôn sang tơring čar Gialai tal 12, rơwang bruă 2021-2026 hmâo 140 čô mơnuih./.

Siu H’ Prăk: Pô pơblang