VOV4.Jarai-Dơ̆ng mơ̆ng tơdơi kơ jơnum lok 10 khua mua pơ ala mơnuih ƀôn sang dêh čar tal 14 truh ră anai, Grup khua mua Jơnum min wai lăng djop djuai ania mơnuih mơnam Viêt Nam ngă hrom Jơnum min git gai pơ ala mơnuih ƀôn sang dêh čar pơƀut hơmâo 2.278 mơta tơlơi pơgôp hiăp, rơkâo đĭ mơ̆ng mơnuih plĕ hră ruah khua hăng mơnuih ƀôn sang amăng dêh čar mơit kơ jơnum lok 11 tal 14.

Tui hăng Khua jơnum min djop djuai ania mơnuih mơnam Viêt Nam, ơi Trần Thanh Mẫn, mơnuih plĕ hră hăng mơnuih ƀôn sang ăt pơdah pran jua bơngơ̆t biă mă tơlơi ƀă hyu klin Covid 19 ră anai, anŏ bơbeč sat lu biă mă ngă duăm ruă hăng ngă tơnap kơ bruă sĭ mơdrô laih anun tơlơi hơdip mơda mơnuih ƀôn sang, boh nik ñu kual hơmâo klin; bơngơ̆t kơ tơlơi arăng mut bơbiă ča čot amăng dêh čar ta hăng pơhaih bruă ia jrao ƀu tơpă ôh.

Rơkâo kơ ƀing pơ ala mơnuih ƀôn sang, kơnuk kơna, djop ding jum, anom bruă hăng djop tơring čar ăt ngă tui hơdră rŭ glăi tơlơi bơwih ƀong huă, pơhlôm hơđong bruă mơnuih mơnam, tơlơi hơdip mơda ană plơi pla lơ̆m mông klin Covid 19 hlăk ƀă tơnap tap; pơsir hĭ hơdôm tơlơi aka ƀu klă amăng bruă pơtô pơjuăt, bruă ia jrao, gru grua hiam-mơnuih mơnam; wai lăng lŏn tơnah hăng pơgang ayuh hyiăng anih hơdip jum dar laih anun ngă tui tŭ yua hloh bruă pơhlôm, pơgăn tơlơi soh hưp ham ƀong kông ngăn, tơlơi phăk phai...

Nay Jek: Pơblang