VOV4.Jarai-Mơguah lơ 4/6, tŭ mă rơnoh prăk pơčruh 300 klăk mơ̆ng ƀing khua mua, mơnuih mă bruă sit nik hăng mă bruă apah amăng Gơnong bruă Gong phun jua pơhiăp Việt Nam, Khua Jơnum min djop djuai ania mơnuih mơnam Việt Nam, ơi Đỗ Văn Chiến lăng yôm biă mă bruă mă tơlơi pơhing Gong phun jua pơhiăp Việt Nam pôr amăng bruă pơhlôm, pơgang Covid 19, djru mơnuih ƀôn sang ta thâo tơlơi pơhing klin kheng laih anun ngă tui djơ̆ tơlơi pơtô mơ̆ng Ding jum ia jrao.

Jao rơnoh prăk 300 klăk kơ Jơnum min djop djuai ania mơnuih mơnam Việt Nam, Kơ-iăng Khua Gong phun jua pơhiăp Việt Nam, ơi Vũ Hải Quang brơi thâo rĭm khua mua, mơnuih mă bruă sit nik, mơnuih mă bruă apah, ƀing čih tơlơi pơhing, dăp hơdră pơtui jua pơhiăp Gong phun jua pơhiăp Việt Nam pơčruh hrom hơmâo 300 klăk prăk hăng čang rơmang djru hrom ƀiă hăng Ping gah, Kơnuk kơna, lŏn ia ta pơgăn hĭ klin ƀă hyu amăng plơi pla.

Khua Jơnum min djop djuai ania mơnuih mơnam Việt Nam ơi Đỗ Văn Chiến ƀuăn amra pơhaih tong ten, tơpă, mă yua rơnoh prăk anai djơ̆ hơdră, djơ̆ tơlơi phiăn pioh djru hrom blơi vaccine Covid 19.

Nay Jek: Pơblang