Hăng 18 anih anom mut hrŏm, mơmot ngui buh ao adai hăng eng ao djuai ania lăi pơthâo lu anŏ hiam gru grua mơng djop djuai ania, kual lŏn nao pơtum pơƀut ƀơi Dak Lak. Mơng ao adai, ao člah 4 bơnah truh pơ eng ao djuai ania Êđê, Jarai, M’nông, Thái, Tày, Mường…rĭm čô mơnuih buh pơƀuh lêng pơdah anŏ hiam phara pơmut hrŏm lu gru grua ƀơi Dak Lak tơdơi kơ pơmut hrŏm.

Mut hrŏm mông ngui lĕ ƀing apăn bruă, ding kơna đah kơmơi, mơnuih ngă hmua, đah kơmơi rơgơi, đah kơmơi bơwih ƀong sĭ mơdrô hăng đah kơmơi ngă tơhan. Hơdôm anih anom ba nao ngui pơƀuh hơdôm blah eng ao gru grua hrŏm hăng bruă pơčeh phrâo phara, hơngah bơnga pơmut hrŏm eng ao djuai ania hăng ao adai.

Buh eng ao djuai ania Thái, amai Hoàng Thị Dương, rai mơng să Buôn Đôn brơi thâo, anai lĕ hrơi mông kiăng ƀing ding kơna đah kơmơi ƀơi hơdôm boh ƀon lan dưi pơbưp, pơlăi nao rai hăng thâo hluh dong kơ gru grua mơng djop djuai ania. “Anai lĕ sa hrơi ngui mơ-ak mơng đah kơmơi hrơi hăng ăt lĕ hrơi mông kiăng ƀing đah kơmơi pơbưp nao rai kơplah wah ƀing đah kơmơi amăng hơdôm khul đah kơmơi hơdôm boh să. Hrơi pơkŏn ƀing ta lêng kơ lu bruă, ƀu hơmâo wăn kiăng pơbưp nao rai hăng anai lĕ hrơi mông kiăng adơi amai pơbưp, pơlăi nao rai, hrăm tơdruă hăng pel ĕp lu ƀiă dong kơ gru grua yôm phara mơng djop kual.”

Hrŏm hăng bruă pơpŭ brơi gru grua djuai ania, jơlan hơdră anai ăt ako pơjing hơdôm grup KOls, KOCs Dak Lak, kiăng ngă tơkuh nao rai mơnuih ngă hmua, anom bơwih ƀong hrŏm hăng ƀing thâo dar pơdah rup, lăi pơthâo hăng sĭ gơnam amăng plang mơnuih mơnam. Yă H’Giang Niê, Khua khul mơnuih ngă hmua tơring čar Dak Lak brơi thâo, hơmâo dong lu mơnuih ngă hmua jing ƀing mơnuih hmư̆ hing amăng plang mơnuih mơnam hăng hrưn đĭ tŭ yua bruă mă amăng grup, kah hăng anai lĕ bruă pơgôp ngă pơđĭ kyar ngă hmua amăng ƀon lan. “Ƀing gơmơi čang rơmang grup KOLs, KOCs amăng tơring čar amra tơkuh nao rai lu anih anom sĭ mơdrô pơprong amăng dêh čar lăi hrŏm hăng pơ tač rơngiao dong, akŏ pơjing hơdôm glông pơlir kiăng lăi pơthâo gơnam tam mơng tơring čar Dak Lak lăi phara hăng hơdôm boh tơring čar pơkŏn đơ đam dêh čar lăi hrŏm. Hluai tui grup anai, ƀing gơmơi čang rơmang dưi pơtô hrăm brơi ƀing mơnuih ngă hmua hur har pran jua, thâo pơčeh phrâo hăng khin hơtai ba sĭ amăng plang internet.”

Ăt ƀrô hrơi anai, ƀơi Buôn Ma Thuột, Dak Lak, pơphun pơdă prưng rup rap hơngah pơkra mơng hrĕ mơrai Cao Nguyên. Sang glông, bruă man gô̆ lŏn, khuông mơñam rai hrŏm hăng hơdôm rup rap jê̆ giăm amăng tơlơi hơdip mơng mơnuih ƀôn sang kual Dap kơdư hơmâo ƀing kač rup dưm hrŏm bơnal mrai pơdah lu rup hiam biă mă.

Pô kač rup Trương Văn Linh, Khua anih pơtô kač rup, Sang hră Cao đẳng Văn Hoá Nghệ thuật Dak Lak ba nao pơdă prưng 3 pok rup tui lăng phara. Amăng anun, rup anăn gơnam yôm mơng lŏn drơ̆t, ñu pơčeh rai tui kual lŏn bazan hăng phun kơphê, samơ̆ ƀu pơdah hăng rup rap pơƀuh sit nik tui hơđăp. Pô kač rup Trương Văn Linh brơi thâo: “Kơphê mơng Dak Lak hơmâo ba hyu amăng rŏng lŏn tơnah, kâo mă anăn anun lĕ “Gơnam yôm mơng lŏn drơ̆t” hăng pơƀuh brơi phara mơn. Lơm arăng nao lăng rup, tui hluai rĭm čô mơnuih ăt lăng phara mơn.”

Rĭm pok rup amăng anih pơdă prưng pơdah pran hor mơng mơnuih thâo pơčeh rai kơ kual lŏn hăng gru grua Dap kơdư. Hrơi pơdă prưng hrĕ mrai Cao Nguyên pơphun ƀơi Sang djă pioh gơnam sô hơđăp rŏng lŏn tơnah Cà phê, Buôn Ma Thuột, pok amăng brơi arăng mut lăng truh abih kơnôl 30/10/2026./.