Hăng djuai ania K’ho, mơñam hơkă ƀudah rêu rô ƀu kơnong kiăng rơguăt tơngan đôč ôh, gir ngă đôč ôh, ăt kiăng hơmâo ƀing ơi, anong wa pơtô glăi dong.  Ơi Rơ Ông Ha Bông (djuai ania K’ho Čil, ƀơi plơi K’Nơh, să Dam Rông 4) jing sa amăng hơdôm čô mơnuih ăt gir hăng bruă mơñam bung bai. Tui hăng tơlơi ñu thâo, rim hơkă, bai, rêu rô kiăng hrĕ, gai mơñam, hơdră mơñam ñu phara mơn:“Bruă ta ruah kram pơ-ô či mơñam yom biă. Juăt ñu arăng nao pơ glai hơmâo ană plơi pla brơi nao, laih aun ĕp kram tha 2 thun či koh, phun djrao, phun pơ-ô khŏm ruah mă phun hiam, kjăp. Tơdơi kơ djă glăi pơ sang, ăt hơmâo ruah kiăo tui thun phun kram, phun djrao mơn, gah phun gah tơdŭ hai ñu hơmâo anŏ yua phara mơn. Đam ƀơi thơ rơmuăn, rơ-un, rơčăm lăp djơ̆ lĕ mă yua. Đing djrao pioh mơñam bai, mơñam rơ-i (mơñam hơkă anet, hơmâo bơnga). Đing kram, đing djrao hiam kah mơ̆ng dưi mơñam hiam, kjăp. Thâo ruah kram tui anun ƀu djơ̆ tŭ kơ thâo mă amăng ha hrơi dua hrơi ôh. Anun lĕ ta hrăm mơ̆ng ơi yă, amĭ ama, anong wa ta mơn”.

Tơdơi kơ hơmâo kram, pô mơñam krih tơluah trañ, pơkra dơnong, gơnăo. Tui hluai kơ tơlơi thâo mơn, trañ mơñam hơmâo klâo, pă, čơpăn, ha pluh ƀudah pluh dua glông trañ. Pô mơñam dui, hrĭ ming trañ kiăng mut krĕp, kjăp khŏp, huăi jôh; laih dong sem lăng, čơkăp hĭ trañ rơbêh, laih anun hruă kjăp dơnong či akă.

Gah tlôn rim mơta gơnam pơkra rai lĕ pran jua gir kơtir hăng tơlơi thâo rơgơi hơmâo pơtŏp rơguăt amăng lu thun. Tơlơi anai glăk hơmâo ơi Rơ Ông Ha Bông pơtô glăi kơ ƀing hlăk ai, ană tơčô sang anŏ ñu hrăm tui. Bon Niêng Hoàng Đức, tơkeng thun 2013, tơčô ơi Rơ Ông Ha Bông. Ñu drit amĭ mơ̆ng 3 thun, hơmâo rơkơi bơnai ơi Bông rông ba. Hơdip hăng ơi ñu, Hoàng Đức hor biă kơ bruă mơñam rêu rô, laih anun ñu thâo laih mơñam hơkă blung a:“Kâo hor biă kơ bruă anai. kiăng djă pioh bruă pơkra gơnam mơ̆ng ơi yă. Kâo hor mơñam bung bai, rêu rô. Anai lĕ rêu prong, bơ anai lĕ rêu anet ne, rêu bơnga ne...)

Hơdôm boh hơkă, bai, rêu rô jing gơnam juăt yua biă amăng tơlơi hơdip neh met wa K’ho mơ̆ng đưm truh kơ ră anai. Amai Cơ Liêng K’Joan, (plơi K’Nơh, să Dam Rông 4, tơring čar Lâm Đồng), brơi thâo:“Hơkă, bai ƀudah rê rô anai kiăng biă mă. Lơ̆m nao pơ hmua, gui djuh, sô̆ ia, ƀudah nao pĕ añăm leng kơ pioh amăng anai soh yơh. Laih dong huăi ngă hơƀak jrak kơ ayuh hyiăng ôh, yua dah hơmâo mơñam hăng kram, hăng djrao, lơ̆m tơ̆i ƀu thâo yua dong tah, ta pioh lu hnun huăi hơƀak kơ ayuh hyiăng lơi. Hơkă, rêu rô anai kiăng biă mă amăng tơlơi hơdip gơmơi, mơ̆ng ơi yă đưm laih”.

Hăng mơnuih djuai ania K’ho Čil, bruă mơñam rêu rô anai ăt pơƀuh tơlơi gơgrong bruă mơ̆ng ƀing đah rơkơi amăng sang anŏ wơ̆t hăng amăng plơi pla. Mơnuih kơhnâo gru đưm Rơ Ông Ha Bông lăi: “Tui hăng ơi yă gơmơi đưm adih: Kiăng ƀong tơkuih ĕp kram, kiăng mơñam hơkă ĕp djrao, ta kiăng thâo kơđi lĕ ta khŏm pơhmư̆, kiăng ngă ơi, ngă ama lĕ ta khŏm thâo mơñam yơh. Mơñam rêu rô yơh kiăng thâo krăn pô đah rơkơi anun rơgơi hă ƀô̆. Kah hăng kâo mơ̆ng anet laih pơhrăm mơñam, ră anai kâo 58 thun baih, ăt dŏ mơñam mơn”.

Mơ̆ng tơlơi hrăm blung a hăng ama, truh kơ pơtô glăi bruă mơñam kơ ană tơčô mô yâo, bruă mă mơ̆ng ơi Rơ Ông Ha Bông jing tơlơi ră ruai kơ tơlơi hơdip mơ̆ng bruă mơñam bung bai rêu rô ƀơi Dơng K’Nơh. Rim boh hơkă, bai hơmâo pơkra rai ƀu kơnong pơƀuh tơlơi rơgơi mơ̆ng pô mơñam đôč ôh, ăt djă pioh anŏ yom gru grua djuai ania K’Ho Čil. Lơ̆m ƀing kơhnăk gru đưm ăt dŏ ngă bruă, lơ̆m ƀing hlăk ai hor kơ bruă, hrăm mơñam, bruă mơñam anai ăt dŏ na nao đôč, djă pioh gru grua plơi pla amăng tơlơi hơdip rơnuk anai./.