Yang hrơi trun ƀơi tơkai čư̆, ƀơi lan sang rung gru grua amăng plơi Kte, să Phú Thiện, tơring čar Gia Lai, lu mơnuih rai mơng hơdôm boh plơi pla ieo gah pơtum pơƀut mut hrŏm jơlan hơdră ngui atông čing hăng anăn “Djă pioh gru grua-Ngă lar hyu anŏ yôm phara”. Ƀơi anăp apui jă bluk, jua čing hmư̆ bang tơ-ua, hrŏm hăng tơlơi ayun suang mơ-ak, ba glăi anih ngui ngor gru grua kual Dap kơdư, anih hơdôm anŏ yôm gru grua djuai ana Jarai hơmâo djă pioh hăng tŏ tui. Amăng mông ngui ayun suang anun, ơi Siu Yar, dŏ amăng plơi Kte, mah tha rơma yơh, tơngan ñu ăt dŏ găng añrăng atông čing, pơsur abih bang apăn tơngan suang jar dar. “Să hơmâo pơphun pioh hơdor glăi gru grua djuai ania, gru grua čing hơgor, ƀing gơmơi pơ-ư ang biă mă. Yua ƀing gơmơi hor biă čing hơđăp, čing pioh glăi mơng đưm hlâo hmư̆ mơ-ak biă, hmư̆ jua čing amăng pran jua hok kơdok biă. Bơni kơ khul pơphun, ƀing apăn bruă ƀơi să hơmâo pơphun brơi ƀing gơmơi ngui atông čing hăng amra gir run hrăm atông kiăng hơdôm tal pơtop hrăm tui anai brơi tŭ yua klă.”

Sit biă ñu, amăng jơlan hơdră, 40 čô mơnuih kiăo tui hrăm djuai ania Jarai ƀơi Phú Thiện phrâo pơgiong bruă hrăm atông čing, yua mơnuih kơhnâo kơhnăk Nay Phai rai mơng să Phú Túc pơtô brơi; ƀing gơñu dưi atông 3 tơlơi adôh gru grua anun lĕ “Hor mơñam mrai” , “Sang dŏ ƀu thâo wơr” hăng “Pơpŭ kơ anong Thoach” Ayong Ksor Triệu-Hlăk ai dŏ amăng thôn Phú Thiện pơ-ư ang brơi thâo “Hrăm mut hrŏm hăng ngă sit nik”, kiăng jing sa amăng ƀing mơnuih mut hrŏm bruă gru grua-adôh suang. “Kâo rai pơ anai hrăm glăi bruă atông čing hrŏm hăng lu mơnuih anun mơ-ak biă, yua dưi ĕp glăi, djă pioh gru grua mơng djuai ania pô. Laih dong ƀing gơmơi lĕ hlăk ai, ƀing mơnuih phun amăng bruă tŏ tui, ba jơlan hlâo amăng bruă pơphun djă pioh, lăi pơthâo gru grua čing hơgor brơi rơnuk tơdơi dong ƀơi să Phú Thiện.”

Ră anai rơbêh 70 thun, samơ̆ hăng pran jua hur har djă pioh jua čing hơdor kual Dap kơdư, mơnuih kơhnâo kơhnăk Nay Phai găn rơgao rơbêh 80 km mơng să Phú Thúc nao pơ plơi Kte, să Phú Thiện kiăng pơtô glăi tơlơi ngui atông čing brơi neh met wa. Ñu hok mơ-ak biă yua ƀing kiăo tui hrăm lêng kơ hor atông čing hăng dưi atông lu tơlơi adôh sô hơđăp mơng djuai ania Jarai. “Rĭm wŏt nao pơtô, hyu tul čing, kâo ƀuh tong ten pran pơlir, pran khăp hăng jê̆ giăm mơng neh met wa amăng plơi pla. Hơdôm tơlơi ngui amăng plơi pla lơm hơmâo jua čing hơgor amra ngă pơlir hơbit, mut hrŏm kơplah wah amăng abih bang mơnuih, huăi ngă pơčlah. Sit biă ñu, rĭm wŏt nao pơtô brơi ƀing čơđai, kâo ƀuh ƀing gơñu hor atông čing biă. Lăng ƀing čơđai gir hrăm tui anun, kâo ăt mơ-ak biă mă mơn hăng anai lĕ tơlơi ngă kâo jai hur har pran jua kiăng tŏ tui hyu pơtô brơi.”

Pă mơmŏt rơnuč rơwang hrơi tơjuh mơtăm ƀơi să Phú Thiện, tơring čar Gia Lai pơphun jơlan hơdră ngui atông čing hăng lăi pơthâo gơnam ƀong gru grua djuai ania ƀơi kual Dap kơdư amăng plơi Kte, Rbai, Amil hăng Phú Thiện. Ơi Nguyễn Văn Hưng-Kơ-iăng Khua anom bruă djru bruă mơnuih mơnam să Phú Thiện brơi thâo, bruă anai ƀu djơ̆ kơnong kiăng ruah ƀing kơhnâo nao ngui Festival atông čing Gia Lai pơ anăp đôč ôh ăt pơgôp djă pioh, tŏ tui gru grua čing hơgor kual Dap kơdư. “Hăng tơlơi čang rơmang djă pioh gru grua hơmâo UNESCO tŭ yap, anai ƀu djơ̆ kơnong gru grua mơng djuai ania kual Dap kơdư đôč ôh mơ̆ ăt lĕ gru grua ană mơnuih. Ƀing gơmơi čang rơmang tŏ tui pơ anăp dong, Kơnuk kơna djru brơi prăk kak kiăng ƀing gơmơi pok lu anih pơtô hrăm, djru brơi ƀing kơhnâo thâo rơguăt ƀiă, pơhưč lu hlăk ai čơđai mut hrŏm jơlan hơdră djă pioh gru grua djuai ania pô.”

Jua čing ăt dŏ hmư bang tơ-ua, tơlơi ayun suang Jarai ăt tŏ tui jum dar apui jă bluk ƀơi sang rung amăng să Phú Thiện, tơring čar Gia Lai. Ƀing tha rơma pơtô glăi, ƀing hlăk ai tŏ tui, jua čing hơgor ƀu djơ̆ kơnong djă pioh bơngăt gru grua djuai ania đôč ôh mơ̆ ăt kiăng pơlir ană plơi pla, ngă hiam tui tơlơi hơdip gru grua ƀơi kual Dap kơdư hing ang./.