Hơdôm thun rơgao, yua hơmâo tơlơi đing nao, djru ba mơ̆ng Ping gah hăng Kơnuk kơna amăng djop bruă tơlơi bơwih ƀong huă, mơnuih mơnam djuai ania Čăm amăng tơring čar pơđĭ kyar ƀiă laih. Kơ-iăng khua ping gah tơring čar Lâm Đồng, ơi Đặng Hồng Sỹ čih pioh hơdôm tơlơi djru pran mơ̆ng mơnuih ƀôn sang Čăm đăo Balamôn amăng bruă pơđĭ kyar bơwih ƀong huă, pơhrŏ ƀun rin, ngă hrŏm lu bruă mă bơkơtưn khăp kơ lơ̆n ia hăng man pơdong tơring čar, plơi pla.

Laih dơ̆ng čang rơmang, abih bang ƀing khua đăo, khua prong amăng khul đăo mơnuih ƀôn sang djuai ania Čăm ăt kơnang kơ kơnuih hiam, tơlơi đăo kơnang mơ̆ng gơñu; djru pơtrut bruă ngă gum pơgôp djuai ania, pơdjru nao rai bơwih ƀong huă tañ pơklaih mơ̆ng ƀun rin, ngă kơjăp tui tơlơi gum pơgôp amăng khul djop djuai ania mơnuih mơnam. Ƀrô tal anai, grup hyu mă bruă mơ̆ng ping gah tơring čar Lâm Đồng hơmâo jao gơnam brơi kơ ƀing khua đăo, khua prong khul đăo hăng mơnuih arăng đăo kơnang amăng djuai ania Čăm đăo Balamôn laih anun bơni hơ-ơč čơkă hrơi ngă yang prong Katê thun 2026 mơak mơai, rơnuk rơnua.