Kơnôl 8/10, bruă prăp rơmet kơ Hrơi jơnum ngui gru grua djuai ania Mông tal 4 thun 2026 hơmâo ngă ječ ameč ƀơi Điện Biên. Hơdôm khul kơhnăk, mơnuih ngă sen, bơkjăp drơi jăn mơ̆ng 11 boh tơring čar glăk pơƀut pơtŏp rơguăt, prăp rơmet giong djŏp tơlơi adoh suang, ngă sen, laih dong prăp lui jơgăn pơdă gơnam, gơnam hmư̆ hing, pơƀuh hyu anŏ yom gru grua hăng gơnam yom mơ̆ng djuai ania Mông kiăng abih bang plơi pla, tuai rơnguai thâo.

Hrơi jơnum ngui gru grua djuai ania Mông tal 4 pơphun mơ̆ng kơnôl 9-11/10, hăng giăm 800 čô kơhnăk, mơnuih ngă sen, bơkjăp drơi jăn mơ̆ng 11 boh tơring čar, amăng anun hơmâo, Điện Biên, Tuyên Quang, Phú Thọ, Thái Nguyên, Sơn La, Cao Bằng, Lai Châu, Lào Cai, Thanh Hóa, Nghệ An laih dong Dăk Lăk. Kơnong ƀơi Điện Biên hơmâo 101 čô mơnuih kơhnăk gru đưm, mơnuih ngă sen, adoh suang, gum pơhrup bruă gru grua, hăng 62 čô bơkjăp drơi jăn pơplông 6 mơta tơlơi phun, hăng 35 bruă pơplông. Hơdôm boh tơring ba nao gơnam tam kiăo tui tơlơi hơdip mơda hăng gru grua djuai ania Mông djŏp kual, mơ̆ng eng ao, gơnam pơkra hăng tơngan truh kơ gơnam mơ̆ng đang hmua, gơnam hmư̆ hing jơman hloh hăng hơdôm gơnam pioh mă yua amăng tơlơi hơdip. Anai ƀu kơnong jing anih ba pơƀuh gơnam đôč ôh, ăt djru mơnuih ƀôn sang thâo rơđah tơlơi ră ruai gru grua gah tlôn rim mơta gơnam./.