Bôh get kă sa djuai phun hmâo arăng juăt pla lu amăng đang sang hăng ƀơi đang hmua mơ̆ng mơnuih Dap Kơdư. Hơdôm gơnam mă mơ̆ng bôh get krô ƀu kơnong kơ gơnam pioh mă yua rim hrơi ôh mơ̆, ñu dô̆ nao hrŏm hăng tơlơi hơdip mơda gơnam tam, pran jua mơ̆ng djop djuai ania lăi hrŏm, mơ̆ng neh wa djuai ania Êđê lăi ha jăn. Ƀơi pra apui đưm, yă H'Luôn Arul (juăt iâo Aduôn Y Khương) ƀơi buôn Jung, să Êa Ktur, tơring čar Dak Lak, brơi thâo, kiăng hmâo sa bôh get ia hiam hăng pơhlôm klă khom rơngiă hơdôm blan:

"Hlâo adih bôh get kă dưi pla lu ƀơi đang sang, ƀơi đang hmua. Bôh mơda lĕ yua pioh hơbai añăm, hơdôm bôh tha lĕ mă abih pơjeh ñu laih anun ba nao tram amăng glut lŏn ƀudah dưm hăng dlông pra apui hơdôm blan pioh bôh get ñu krô khuă. Ngă tui anun bôh get hmâo ia jŭ ƀudah mriah lŏn drŏt, kơđuh ñu khăng kơjăp, bĕ mô̆t ƀong, ia huăi hrăm”.

Bôh get krô hmâo lu bôh tŭ yua amăng tơlơi hơdip mơda rim hrơi mơ̆ng mơnuih Êđê. Bôh get dưi mă yua pioh dưm ia mơñum, dưm djop mơta pơjeh lơm nao pơ̆ đang hmua, ngă gơnam kơhul asơi đê̆o… Bôh get krô ăt dưi mă yua pioh pơkra gông brô̆ mơn, kah hăng pơkra đing năm, gông pioh pĕ… Tơlơi pơhrua hrŏm mơ̆ng bôh get krô hăng hơdôm gơnam mă yua kah hăng kram djrao, hliñ dŭ hmâo pơjing laih djop mơta gơnam mă yua pĕ gông atông brô̆, hmư̆ mơ-ak biă.

Hrŏm hăng hơdôm bôh tŭ yua rim hrơi, bôh get dô̆ mă yua amăng hơdôm tơlơi jơnum ngui ngă yang đưm, hơdôm phiăn ngă yang yôm phăn mơ̆ng neh wa djuai ania Êđê kah hăng ngă yang pin ia, ngă yang rơkâo ia hơjan, rơkâo brơi pơdai jor kơtor lu, ngă yang brơi kơ tơlơi suaih pral... Ayong Y Tuel Niê (arăng juăt iâo Ama Kain), ƀơi buôn Alê B, phường Êa Kao, tơring čar Dak Lak lăi pơthâo:

"Ră anai khă tơlơi hơdip mơda hmâo lu tơlơi pơplih, samơ̆ kâo ăt mơ-ak mơn yua kơ lu plơi pla ăt dô̆ djă pioh mơn hăng ngă tui hơdôm phiăn juăt ngă yang jơnum ngui mơ̆ng đưm. Hăng amăng hơdôm mông ngă yang dưi pơphun, kâo ƀuh bôh geh krô lĕ sa črăn ƀu dưi kơƀah ƀơi hơdôm gơnam pioh pơpŭ kơ Yang rơbang”.

Khă tơlơi hơdip mơda amăng hơdôm bôh plơi pla mơ̆ng mơnuih Dap Kơdư ră anai hmâo pơplih lu laih, samơ̆ hơdôm nua yôm pran jua mơ̆ng bôh get krô ăt dô̆ hơnong mơn. Lu sang anô̆ djuai ania Êđê ăt dô̆ pla, djă pioh mơn pơjeh bôh get kă mơ̆ng rơnuk anai truh rơnuk adih kah hăng pơjeh yôm pioh pơtă pơtăn hăng pơtô juăt ană tơčô hơdor kơ phun akha pô mơ̆ng djuai ania pô hơdip juăt giăm hăng glai klô. Bôh get krô dô̆ jing gơnam djă pioh hơdor glăi brơi kơ tuai mơ̆ng lu anih rai pơ̆ Dap Kơdư bă kơ pơ-iă, pioh pơdah tơlơi pơpŭ mơ̆ng ană mơnuih ƀơi anai./.