Amăng tơlơi Chăm hăng hơdôm djuai ania pơkŏn pơ kual Dap Kơdư, “Chum” kar hăng čum amăng tơlơi Jarai ta mơn, pơhmutu lĕ čum ƀô̆, čum meng, pơ ala brơi anŏ rơ-un rơmuan mơ̆ng tơlơi thâo kah pơpha hăng gum pơgôp plơi pla. Hăng 60 mơnit pơphun jơlan hơdră, “Chum Show” ră ruai kơ thun blan ană mơnuih ta hơduah ĕp glăi tơlơi khăp ƀu-eng, ngă bơmơak glăi pran jua hơmâo lu tơlơi rơngôt, hăng pơtruh hrŏm abih bang. Jơlan hơdră ngă kơ lu mơnuih lăp hơdor biă mă mơ̆ng jua mơñi, rup juăt ƀuh samơ̆ ăt hơmâo anŏ phara mơn. Juăt ƀuh lĕ jua čing, jua hơgor, tơlơi suang đưm mơ̆ng djuai ania Chăm, Êđê, Raglai. Phara aka ƀu phiah ƀuh lĕ yua dah abih bang mut hrŏm hăng apui pơčrang, arăng bơrơdjung hrĕ hăng bơnal, apăn hrĕ por đĭ hăng ngŏ.

Hăng tơlơi pơƀuh ngui xiếc bơrơdjung hrĕ dai đĭ hăng ngŏ, wơ̆t hăng yŭ adoh, tơlơi ayun suang hiam, ƀing nao lăng hơmâo hơdip amăng rơnuk đưm hăng rơnuk anai, pơtruh hơjăn pô hăng abih bang mơnuih, pơtruh lŏn hăng adai. Ơi Nguyễn Hồng Quang, dŏ ƀơi phường Nha Trang, tơring čar Khánh Hòa lăi:“Yŭ adoh rơnuk phrâo, hơmâo apui pơčrang bơngač mut hrŏm hăng ƀing suang, jing pơjing rai tơlơi ayun suang hăng adai hiam kar hăng rơpơi. Suang tui rơnuk phrâo mut hrŏm hăng ngă xiếc, yŭ adoh, goong brô̆ đưm mơ̆ng djuai ania Chăm, djuai ƀiă pơ Dap Kơdư mut hrŏm amăng hrơi ngui anai”.

Yă Ngô Thanh Phương, Khua prăp rơmet jơlan hơdră Chum Show lăi, ƀing ngă jơlan hơdră anai kiăng hơmâo anih adoh suang phara hăng mơ̆ng hlâo, anih mơ̆ ƀing apăn bruă adoh suang, ngă sen, ƀing kơhnăk gum pơčeh phrâo ngă mơ-ak hloh. Rim tơlơi adoh suang pơƀuh rai tơlơi hơdip mơ̆ng mơnuih ƀôn sang kual Dap Kơdư – Dơnung Tong Krah, samơ̆ hơmâo ră ruai glăk hăng boh pơhiăp ƀơi anih adoh suang phrâo. Mă djŏp gru grua hiam mơ̆ng djŏp djuai ania amra djru djŏp plơi pla thâo hluh nao rai hloh:“Tơlơi mơ̆ ƀing gơmơi kiăng ƀing tuai nao lăng mut amăng jơlan hơdră Chum Show dưi pơtruh nao rai, ngă mơak pran jua; Hơduah ĕp glăi gru ama grua amĭ, ĕp glăi gru kơnuih phara mơ̆ng pô. Chum amăng boh pơhiăp sa, dua djuai ania ƀiă lĕ “čum”, kar hăng čum ƀô̆, čum meng, jing pơtruh, khăp ƀu-eng, hăng ngă mơ-ak pran jua, lơ̆m tơlơi hơdip gah rơngiao adih hơmâo tơlơi truh lŏn adai ngă, hơjan kơthel, blah ngă na nao”.

Tơdơi kơ pơmut hrŏm hơdôm boh tơring čar kual Dap Kơdư hăng Dơnung Tong Krah, hrơi blan rơgao, anom bruă tuai čuă ngui bơwih ƀon đĭ na nao. Hăng tơring čar Khánh Hòa, kiăng amăng thun 2025 anai hơmâo čơkă năng ai 15 klăk wơ̆t tuai, pơhrui rơbêh 60 rơbâo klai. Tuai čuă ngui ăt hơmâo tơring čar Khánh Hòa lăng jing tơlơi bơwih ƀong akŏ phun; laih anun pơmut hrŏm tuai čuă ngui hăng gru grua jing jơlan khŏm nao yơh.

Hơdôm jơlan hơdră kah hăng “Chum Show” ƀu kơnong pơjing rai lu tơlơi kiăng ƀing tuai ĕp lăng đôč ôh, ăt pơđĭ tui anŏ yôm gru grua ia iŏm, dưi bơkơtưn anih čuă ngui dong. Yă Trần Thị Kim Yến, Khua Sang adoh Đó pơsit, Khánh Hòa ƀu kơnong hơmâo anŏ hiam mơ̆ng anih anom glai klô đôč ôh, ăt hơmâo lu gru grua hiam hăng pơčeh phrâo, kiăng rim wơ̆t tuai nao ngui jing hrơi ngui hyu hơduah ĕp mơ-ak mơ-ai lăp hăng pran jua.“Tơlơi pơmin năng blung lĕ pơmut hrŏm gru grua hiam mơ̆ng lu phung djuai ania pơ anai. Tuai mơ̆ng čar rơngiao lăp hơdor, hor biă mă kơ tơlơi anai. Khă hnun tơdơi kơ anun lĕ mơnuih Việt Nam ta hai hor hăng rai lăng lu hloh. Gơñu lăng juăt ƀuh yơh samơ̆ ăt hơmâo anŏ phara mơn, anun jing hor lăng biă”./.