Dua hơpluh thun rơgao, gru grua čing hơgor hơmâo djă pioh hăng hơdôm bruă hơkrŭ glăi tơlơi ngă yang gru grua, pơhlôm tŏ tui grup atông čing, pok anih pơtô hrăm brơi ƀing čơđai, lăi pơthâo brơi jar kmar, pơlir djă pioh hăng pơđĭ kyar tuai čuă ngui gru grua.

Kơnong ƀơi Dak Lak, 20 thun rơgao, tơring čar hơmâo jao brơi 214 ring čing hăng 1.140 blah eng ao hơnua; pơphun 26 anih pơtô pĕ gông atông brô̆, adôh, ayun suang, akhan hri; ĕp pơƀut glăi, hrăm glăi hơdôm tơlơi atông gru grua mơng djuai ania Êđê, M’nông; ƀơk hră pơpŭ brơi ƀing kơhnâo kơhnăk hăng 45 čô. Tui ơi Đào Mỹ, kơ-iăng Khua Jơnum min mơnuih ƀôn sang tơring čar Dak Lak, mơng jơnum anai, tơring čar tŭ mă lu tơlơi pơgôp, tơlơi pơhing yôm kiăng djă pioh, tŏ tui klă dong gru grua čing hơgor.