Amăng 2 blan rơnuč thun, tơring čar Lâm Đồng amra pơphun lu tơlơi ngui ngor mơak, ngă pơhưč ƀing tuai amăng čar ta wơ̆t hăng čar rơngiao, hăng tơlơi ngă pơhưč lĕ Jơnum ngui atông čing Ngŏ Dơnung ASIA thun 2025, Jơnum ngui Trà jar kmar, Jơnum ngui čơkă thun phrâo 2026...Hrŏm hăng anun tơring čar ăt pơtrut pơsur, pơƀuh hyu bruă hyu ngui kiăo tui bruă dưm pơmut boh thâo mrô anih čuă ngui, pok prong ngă hrŏm jar kmar hăng gum hrŏm lu bruă jơnum hyu ngui pơprong.

Amăng anun tơlơi Jơnum ngui Trà Jar kmar - World Tea Fest 2025 prong biă, blung a hơmâo pơphun ƀơi Việt Nam, hơmâo ngă či tơring čar Lâm Đồng, mơ̆ng lơ 11/11 truh lơ 7/12/2025, pơhưč năng ai 20.000 wơ̆t tuai amăng dêh čar wơ̆t hăng čar rơngiao. Ƀơi anai, lu bruă jơnum prong gưl jar kmar amra hơmâo pơphun kah hăng: Pơdă, pơƀuh če (tra) hăng boh thâo pơkra gơnam; Jơnum pơčrông hơdră pơđĭ tui trà Việt; pơbưp mơñum ngui ia če hăng ƀing khua anih jưh hăng ƀing tuai mơ̆ng jar kmar; Hrơi ngui ƀơi jơlan hăng boh thâo mơñum ia če; Bruă čuă ngui anih pla phun če; hrŏm hăng jơlan hơdră adoh suang. Ơi Nguyễn Văn Lộc, Khua gơnong bruă gru grua, bơrơguăt drơi jăn hăng tuai čuă ngui tơring čar Lâm Đồng brơi thâo:“Ƀing gơmơi ăt pơphun dong mơn bruă jơnum prong či pơhưč ƀing tuai hyu ngui. Hrŏm hăng anun, gơmơi ngă bruă hăng Khul tuai hyu ngui hơmâo tour, anih ngui, jơlan hơdră ba hyu ngui rơgêh, apah bơni kơ ƀing tuai, sang jưh tuai mă prăk rơgêh ƀiă mơn či čơkă tuai amăng hrơi ngui Noel, čơkă thun phrâo. Hơdôm tơlơi jơnum gru grua, bơrơguăt drơi jăn hăng hyu ngui hơmâo pơphun lu biă, biă ñu amăng rơnuč thun”.

Kiăng čơkă hrơi ngă lơphet 85 thun Hrơi akŏ pơdong Ping gah tơring čar Dak Lăk (23/11), Hrơi gum pơgôp djŏp djuai ania (18/11), ngă lơphet 20 thun Hrơi Gơnam yom gru grua boh thâo Việt Nam (23/11), tơring čar Dak Lăk pơphun Rơwang hrơi tơjuh gơnam yom gru đưm djŏp djuai ania tơring čar Dak Lăk thun 2025 hăng anăn “Jua mơñi bang mơ̆ng čing - Pơlir hơbit mơnuih tơpuôl”, pơphun mơ̆ng lơ 18/11 truh lơ 23/11/2025, ƀơi Sang djă pioh gơnam đưm Dak Lăk (phường Buôn Ma Thuột) hăng Sang djă pioh gơnam đưm Phú Yên (phường Tuy Hòa). Rơwang gơnam yom đưm jing bruă jơnum ngui yom biă, pơpŭ anŏ yom phara mơ̆ng djŏp gru grua hiam ƀơi tơring čar Dak Lăk lăi hrŏm hăng gơnam gru đưm anih ngui ngor atông čing ring hơgor lăi hơjăn; râu mơdưh pran pơ-ư pơ-ang, gơgrong bruă mơ̆ng abih bang mơnuih amăng bruă djă pioh hăng pơtrut tui gru grua đưm: laih dong pơƀuh rup Dak Lăk - kual lŏn hơmâo jua mơñi mơ-ak mơ̆ng glai čư̆, anih tum pơƀut gru grua hiam hăng hrưn đĭ djru pơđĭ tui bruă tuai hyu ngui sem lăng gru grua hơđong kjăp, pok prong tơlơi gêh găl či pơbưp, ngă hrŏm hăng djru mơnuih ƀôn sang bơwih ƀong hluai tui bruă gru grua- adoh suang - tuai čuă ngui mơak phara. Anai ăt jing hrơi ngă lơphet 20 thun Anih ngui ngor atông čing kual Dap Kơdư hơmâo UNESCO tŭ yap jing boh yom djă pioh tui tơlơi pơhiăp, tơlơi ră ruai, hăng Gru grua gah bơngăt jua mơ̆ng ană mơnuih ta.

Rơwang hrơi tơjuh pơphun lu bruă pơhưč, hmư̆ hing lĕ Jơnum ngui gru grua atông čing hăng goong brô̆ đưm djŏp djuai ania Dak Lăk, hơmâo hơdôm grup kơhnâo gru đưm mơ̆ng hơdôm boh să, phường amăng tơring čar, pơƀuh glăi hơdôm tơlơi phiăn ngă yang đưm, tơlơi ngui ngor đưm pơlir hăng čing hơdor. Laih dong jing Famtrip hyu ngui “Pơtrut Gơnam đưm - Pơlir mơnuih tơpuôl”, pơƀuh tour hyu ngui sem lăng gru hiam amăng plơi pla, hơdôm bruă hmư̆ hing mơ̆ng djŏp djuai ania, pel ĕp hơdôm gru grua hiam đưm hlâo amăng tơring čar.

Bơ ƀơi tơring čar Khánh Hòa, Khul tuai hyu ngui pơphun Pơplông čih hră pơhing hăng video clip kơ tuai hyu ngui thun 2025 hăng anăn “Tuai hyu ngui Khánh Hòa - Rup lu ia iŏm hiam”. Anai jing bruă hơmâo amăng jơlan hơdră pơtrut, pơƀuh hyu bruă hyu ngui mơ̆ng tơring čar. Tơdơi kơ pơmut hrŏm gong gai tơring čar, anih hyu ngui mơ̆ng Khánh Hòa hơmâo pok prong, anun yơh rup hyu ngui jing lu anŏ hiam hloh. Rơngiao kơ anih juăt nao ngui kah hăng kual tong wing Nha Trang - sa amăng hơdôm kual tong wing hiam hloh rŏng lŏn tơnah, bul pơtâo Cam Ranh hăng anih đih pơdơi yơyom, Pra yang Bà Ponagar, Puih kơđông đưm Diên Khánh ƀudah show adoh suang, hơmâo anih anom hiam mơ̆ng Ninh Thuận hơđăp, djru rup tuai hyu ngui Khánh Hòa hơmâo lu ia iŏm hiam hloh.