Ƀơi tơdron đă boh lông plơi Như Ngọc, să Phước Hữu, tơring čar Khánh Hòa, hơdôm rơtuh čô tơdăm ngek dra muai djuai ania Chăm buh eng ao djuai ania pô mut hrŏm ayun suang lơm jua hơgor Paranưng hăng đing ayup Saranai hmư̆ dik dak. Hơdôm tơlơi ayun suang hơmâo prap lui klă hloh, pơdah djop mơta tơlơi hơdip hăng bruă mă mơng mơnuih djuai ania Chăm, mơng rup rap mơnuih gui pơdai, kai hmua, mơñam abăn ao truh pơ hơdôm tơlơi ayun suang gru grua. Hrŏm hăng lu tuai čuă ngui rai ngui pơ anai, yă Đàng Thị Hơi, dŏ amăng să Phước Hữu, tơring čar Khánh Hòa brơi thâo:

“Hrơi ngui thun anai hơmâo pơphun mơng akŏ plơi truh pơ tlôn plơi, dik dak mơ-ak biă mă. Hơdôm tơlơi ngui ayun suang lêng kơ hiam soh, ƀing ayun suang ăt hur har pran jua mơ-ak hăng abih pran ayun suang.”

Rija Nagar lĕ tơlơi ngui prong hloh pioh čơkă thun phrâo mơng mơnuih djuai ania Chăm, hăng hơdôm tơlơi ngă yang rơkâo hơjan rơnang angĭn mơ-ak, pơdai jor kơtor mơboh hăng tơlơi hơdip rơnuk rơnua brơi ană plơi pla. Rĭm boh plơi pla djuai ania Chăm pơphun ngui ngă yang phun amăng dua hrơi hăng hơdôm tơlơi ngă yang gru grua, samơ̆ hrơi mông pơphun ăt phara yua anun tơlơi ngă yang, ngui ngor juăt sui hrơi amăng plơi pla. Amai Trần Thị Dung, rai mơng Hà Nội brơi thâo:

“Kâo hơmâo mut hrŏm lu tơlơi ngui, ngă yang ƀơi hơdôm boh kual mơng Kơdư truh pơ Dơnung samơ̆ anai lĕ tơlơi ngă yang mơng djuai ania Chăm, ăt yôm phara biă mă. Anai lĕ pơdah pran gum pơgôp djuai ania, pơpŭ gru grua plơi pla. Kâo ƀuh mơ-ak, pơpŭ bơni, pơ-ư ang lơm dưi mut hrŏm tơlơi ngă yang amăng kual lŏn anai.”

Ngui ngă yang Rija Nagar ăt lĕ anih djă pioh lu tơlơi adôh suang yôm phara đưm hlâo mơng djuai ania Chăm, mơng er gông brô̆, tơlơi ayun suang truh pơ tơlơi ngă yang gru grua. Anai lĕ hrơi mông kiăng hơdôm gru grua sô hơđăp tŏ tui djă pioh hăng jao glăi rơnuk tơdơi dong.

Kơ-iăng Khua sang phơ̆t Lưu Sanh Thanh, să Phước Hữu, tơring čar Khánh Hòa brơi thâo:

“Hrơi ngui ngă yang thun anai pơphun lơ 1 blan 1 tui thun djuai ania Chăm anai lĕ lơ 16/4, ăt lĕ hrơi pioh hơdor hrơi pơklaih rơngai tơring čar Ninh Thuận (hơđăp), neh met wa djuai ania hur har mơ-ak biă mă. Amăng hrơi blan rơgao Ping gah hăng kơnuk kơna ăt đing nao tơlơi hơdip kơ mơnuih djuai ania ƀiă. Ƀing gơmơi čang rơmang hrơi ngă yang Rija Nagar tŏ tui djă pioh, lăi pơthâo hăng tañ tŭ yap jing gru grua gah bơngăt jua gưl dêh čar.”

Jua hơgor Paranưng hăng đing ayup Saranai hmư̆ bang amăng rĭm bơyan ngui ngă yang, pơlir ană plơi pla hăng djă pioh gru grua sô hơdăp mơng djuai ania Chăm. Hăng mơng hơdôm hrơi ngui ngă yang kar hăng Rija Nagar, gru grua djuai ania Chăm tŏ tui djă pioh, ngă lar hyu amăng tơlơi hơdip tŭ tă ră anai./.