Amăng hrơi ngui ngui, mơnuih ƀôn sang hăng tuai čuă ngui dưi mut hrŏm hơdôm tơlơi ngă yang yôm phara amăng hrơi ngui tê̆t Bunpimay anun lĕ ngă yang Tắc-bạt, mơnơi rup phơ̆t, akă hrĕ mrai ƀơi tơngan, hơbôr čuah ngă pra yang, đung apui bơnga, săi ia rơkâo tơlơi tơpă. Anai lĕ hơdôm tơlơi ngă yang kiăng rao rơgoh hĭ tơlơi soh sat, rơkâo tơlơi rơnuk rơnua hăng tơlơi hiam klă amăng thun phrâo.

Hăng lu sang anŏ Lao dŏ hơdip sui thun ƀơi Ƀuôn Đôn, tê̆t tui phiăn juăt ƀu djơ̆ kơnong hrơi pơtum jơngum đôč ôh mơ̆ ăt lĕ kiăng djă pioh hrĕ tơkuh nao rai hăng ơi yă. Yă Khăm Bo Lào, dŏ amăng ƀuôn Trí, să Ƀuôn Đôn brơi thâo:

“Ƀing gơmơi nao ngă yang pơyơr đĭ bơnga, boh troh, ƀañ kĕo hăng gơnam pơyơr đĭ ơi yơng yă phơ̆t kiăng rơkâo tơlơi suaih pral, yâo mơ-ak kơ sang anŏ. Ƀing gơmơi ăt mơnơi brơi rup phơ̆t kiăng rơkâo tơlơi rơnuk rơnua, hiam klă brơi sang anŏ, ană tơčô mô yâo dong.”

Hrŏm hăng anun, tuai čuă ngui ăt dưi mut hrŏm hrơi ngui ngor mơ-ak anun lĕ suang Lăm Vông, suang Chăm-pa, ba hyu hơbia yang thun phrâo Nang Sangkhane, ngui rôk tui jơlan glông, mut hrŏm hơdôm bruă tuai čuă ngui jê̆ giăm hăng rơman, nao lăng jơlan hơdră ngui adôh suang hăng ƀong gơnam ƀong djop djuai ania. Amai Hoàng Thúy Lư, dŏ ƀơi phương Ea Kao, tơring čar Dak Lak brơi thâo:

“Hrơi anai kâo rai pơ Ƀuôn Đôn hăng ngui hrŏm hrơi ƀong tê̆t mơng mơnuih ƀôn sang Lao. Kâo ƀuh hok mơ-ak biă mă hăng pơ-ư ang kơ gru grua djuai ania mơng mơnuih ƀôn sang Lao ƀơi Ƀuôn Đôn. Kâo hor hơdôm blah eng ao gru grua ƀơi anai, hơdôm bruă ngui tê̆t ƀơi anai hăng kâo hok mơ-ak biă mă lơm dưi mut hrŏm mông ngui săi ia, abih bang ngui săi ia hur har mơ-ak biă mă.”

Ƀuôn Đôn, amăng tơlơi Lao lĕ “Plơi hăng bôr lŏn”, lĕ anih dŏ hơdip sui thun mơng hơdôm rơtuh boh sang anŏ Việt, phun ñu lĕ mơng dêh čar Lao ƀơi Dak Lak.

Tui ơi Nguyễn Cảnh Tùng, Khua Jơnum min mơnuih ƀôn sang să Ƀuôn Đôn, tơdơi kơ pơmut hrŏm, dơ đam să hơmâo 15 djuai ania dŏ hơdip hrŏm, amăng anun hơmâo rơbêh 400 čô mơnuih phun mơng Lao adih. Bruă tŏ tui tê̆t Bunpimay ƀu djơ̆ kơnong ngă tui djơ̆ tơlơi rơkâo gru grua gah bơngăt  mơng mơnuih ƀôn sang đôč ôh mơ̆ ăt ba glăi hrơi mông pơbưp nao rai, hơkrŭ pran gum pơgôp, pơtrut pơđĭ kyar bơwih ƀong huă-mơnuih mơnam amăng ƀon lan.

“Mơnuih ƀôn sang Lao ƀơi anai hơmâo giăm rơbêh 400 čô mơnuih dŏ hơdip amăng să Ƀuôn Đôn. Anai lĕ gru grua yôm phara mơng mơnuih ƀôn sang Lao djă pioh sui mơng đưm hlâo. Ƀing gơmơi rĭm thun ăt pơphun tê̆t Lao brơi mơnuih ƀôn sang Việt Nam, phun ñu mơng Lao dŏ hơdip amăng ƀon lan kiăng pơtrut pran gum pơgôp kơplah wah djop djuai ania amăng plơi pla ala ƀon, djru tơdruă amăng pơđĭ kyar bơwih ƀong huă mơnuih mơnam amăng să Ƀuôn Đôn.”./.