Amăng hrơi adai pơ-iă hang pơ kual čư̆ Trường Sơn, mơ̆ng mơguah sing bring, lu khul mơnuih mơ̆ng hơdôm boh plơi amăng tơring glông Kà Lừm, tơring čar Sê Kông, čar Lao – kual giăm să Hùng Sơn, ƀôn prong Đà Nẵng (tơring glông Tây Giang, tơring čar Quảng Nam hơđăp) jak ƀing gŏp nao pơ plơi A Tu 1, să Hùng Sơn kah hăng nao ngui. Khul mơnuih mơ̆ng guai gah adih mut rai pơ anai, hlơi hlơi leng kơ buh eng ao hiam soh.

Tơlơi hiăp tlao rơhmač hơmâo ƀơi ƀô̆ mơta neh met wa. Hơmâo đa jak ba ƀing tha, čơđai anet hai. Hơmâo đa gui ba gơnam mơ̆ng sang..Ơi Savandi hok mơak lăi, hmư̆ hing ƀơi să Hùng Sơn ngui têt Bunpimay, neh met wa amăng plơi hlơi hlơi leng kơ tlao hok, jak rơbat tơkai nao ngui: “Rim thun yơh truh bơyan têt Bunpimay, neh met wa amăng plơi dŏ čang biă mă…Rai pơ anai abih bang leng kơ mơak mơai soh. Anai jing têt mơ̆ng djuai ania gơmơi, bơ neh met wa pơ Việt Nam pơphun ngui klă, kar hăng Têt dêh čar ƀing ñu mơn. Pơ anai hơmâo bưp  adơi ayong, ƀong huă, ngui ngor, čơkă têt..mơak kah hăng Têt pơ sang gơmơi mơn".

Ƀơi să Hùng Sơn, hơdôm gơnam ƀong huă mơ̆ng djuai ania Cơ Tu hơmâo prăp lui hơmre, pơƀuh pran jua thâo ƀu-eng kơ tuai mơ̆ng neh met wa čư̆ siăng. Ơi Plong Rang, Khua ping gah plơi A Tu 1 hok kơdok, hlơi hlơi leng kơ lăng anai jing bruă hrŏm amăng plơi, hlong pơgôp pran, pơgôp gơnam či ngui: “Pơdong rơnưh, pơkra hơnum či ngui; iâu neh met wa pĕ añăm, buč hơbơi plum či hơtuk rơyă añăm ƀong pŭ kơ grup glăi ngui Têt Lao. Hơdôm mơta gơnam ƀong jơman kah hăng bui, mơnŭ, akan, asơi brŏm đing, ƀañ tơki kơbao hơmâo prăp čơkă neh met wa dêh čar Lao. Hrơi ngui ngor hơmâo lu mơnuih nao pơtum, mơak biă”.

Rơnuč rơwang hrơi tơjuh, hơdôm rơbâo čô mơnuih mơ̆ng 5 boh plơi tơring glông Kà Lừm, tơring čar Sê Kông djă ba tơlơi mơak Têt Bunpimay dik dak djŏp glai rưng pơ guai Hùng Sơn. Tơlơi ră ruai mut hrŏm jua goong brô̆ mơñi tơ-oa djŏp glai rưng. Hơdôm tơlơi ngui đưm kah hăng pơdui hrĕ, pơtul gai trul, kơdăt kơsăk…mơak biă, pơhưč lu mơnuih ƀôn sang pơ dua bơnah guai nao lăng, pah tơngan.

Tơlơi phara ngă lăp hơdor hloh lĕ ngui Sang čơ Têt Bunpimay bă kơ tơlơi khăp ƀu-eng giăng mah Việt – Lao. Pơ anun, neh met wa ƀu kơnong nao pơ sang čơ đôč, huăi rơngiă prăk đôč ôh mơ̆ ăt “čơkă Têt” hăng mơnŏng ƀong huă đưm mơ̆ng plơi pla. Hơdôm gơnam ƀơk brơi kah hăng braih, mi tôm, akan sin, sum ao phrâo…hơmâo tom hăng rơbok, ačong, hơdôm gơnam juăt yua, hơmâo brơi tơl tơngan neh met wa kah hăng gơnam pơpŭ hrơi Têt, thâo khăp ƀu-eng nao rai.

Đại tá Hoàng Văn Mẫn, Khua kơđi čar Anom bruă khua git gai tơhan pơgang guai Đà Nẵng pơsit, hơdôm gơnam anai ñu kiăng yua biă, ring bruă djru ba mơnuih ƀôn sang, truh kơ bruă ngui ngor gru grua, bơkjăp drơi jăn…leng kơ anăp nao neh met wa djuai ania Lao hrup hăng sang anŏ pô mơtăm: “Amăng hrơi Têt Lao ƀudah Têt Việt, gơmơi leng kơ pơphun ngui kiăng neh met wa ngui tom; neh wa djuai ania Lao mơak biă mă lơ̆m hơmâo ngui Têt Việt, laih anun neh met wa Việt ăt mơak yua hrơi Têt Lao truh. Hơdôm thun rơgao, tơlơi ƀu-eng mơ̆ng neh wa dua guai lŏn ia, tơhan pơgang guai, gong gai dua bơnah kjăp phik, djru akŏ pơdong guai dêh čar rơngai, ngă giăng mah, ngă hrŏm”.

Ƀơ glai rưng Trường Sơn, Têt Bunpimay thun anai jing sa wơ̆t dong tô jê̆ giăm ƀiă tơkai hơyak nao rai ƀơi guai dua bơnah. Neh met wa apăn tơngan, tlao hok lơ̆m hơmâo bưp glăi…hơdôm anun đôč samơ̆ pơđao pran jua biă./.