Amăng hrơi mông dik dak mơ-ak mơng hrơi jơnum ngui ngor, anih ngui ngor ƀơi tơdron lăk 16/4 bă kơ ia iom bơnga mrai đưm hăng jua mơñi hmư̆ mơn hơdôm gông brô̆ đưm. Amăng jua hơgor Paranưng, đing ayŭp Saranai pơhưč pran jua mơnuih, ayong David, sa čô tuai čuă ngui mơng dêh čar Mi, hok mơak lăi pơthâo: “Kâo hor biă mă tơlơi adoh suang mơng djuai ania Čăm, ƀuh dơlăm, yơyôm  amăng pran jua, thâo hluh dong kơ pran jua ană mơnuih. Anai lĕ eng ao đưm djuai aniă Čăm ba rai mơng plơi Mỹ Nghiệp, jing gơnam yôm kiăng djă pioh kơ pơgi kơdih ni anăp”.

Hrơi jơnum ngui ngor sit hơmâo pơjing rai sa rup rap gru hiam lu mơta yôm phara, ngă hur har pran jua mơak hăng bă kơ tơlơi čang rơmang hrưn đĭ amăng rơnuk phrâo. Tơlơi pơhưč mơng hrơi ngui ngor ƀu djơ̆ kơnong ƀơi hơdôm gru hiam phara đôč ôh mơ ăt ƀơi pran jua pơlir hơbit, tum pơƀut rơđah rơđông mơng mơnuih ƀôn sang mơng djop kual dong. Dŏ dơng tong tơdrŏn lăk ƀhiêm hla kơ bơnga, ơi Mô Ha Mad, rai mơng tơring An Giang, hok mơak brơi thâo: “Tơlơi yôm phara mơng rĭm kual dưi pơƀuh. Kâo lĕ mơnuih djuai ania Čăm đăo Islam, bơ ƀơi anai lĕ Čăm Bà Ni, Čăm H’Roi ... Rim kual hmâo gru grua phara hajăn, hmâo tơlơi tô nao rai, mơng anun, ngă kơtưn pran gum hrŏm”.

Hrơi jơnum ngui gru grua djuai ania Čăm hăng rơwang đơ đam dêh lĕ pơdah rơđah tơlơi hơdip mơda kơ glông jơlan nao ƀu hmâo tơdơi mơng gru bôh gru grua djuai ania amăng rơnuk pơplih phrâo. Hăng tơring čar Khánh Hòa, hrơi Jơnum ngui gru grua yôm phăn biă mă. Tơdơi kơ pơmut hrŏm, Khánh Hòa hơmâo sa anih anom pơđĭ kyar phrâo – anih tum pơƀut lu gru đưm, bul pơtâo ia rơsĭ hrŏm hăng tơhnal gal prong kơ bruă tuai čuă ngui, bôh thâo măi mok hăng bơwih ƀong huă gah ia rơsĭ. Anai lĕ tơlơi yôm kiăng tơring čar pơlir mut hrŏm kơplah wah djă pioh gru grua hăng pơđĭ kyar hơđong kjăp, kơplah wah djă pioh gru grua hăng pơplih phrâo. Pơsit yôm tơlơi yôm mơng bruă djă pioh phun akha gru grua, ơi Nguyễn Việt Hùng, Khua Jơnum min mơnuih ƀôn sang tơring Khánh Hòa lăi rơđah: “Ƀing gơmơi đăo kơnang kiăng nao tañ khŏm tuh pơ alin anih anom jơlan glông samơ̆ kiăng nao ataih khŏm tuh pơ alin brơi gru grua, kơ ană mơnuih. Anun ƀu djơ̆ kơnong kơ bruă ruah mă mơng tơring čar Khánh Hòa đôč ôh mơ̆ jing tơlơi gơgrong mơng tơring čar Khánh Hoà pioh kơ tơlơi pơđĭ kyar hơđong kjăp mơng lŏn ia, mơng djuai ania. Rĭm rơnuk kơnong kơ yak nao hrŏm hăng lŏn ia sa rơwang đôč samơ̆ gru grua amra yak hrŏm djuai ania na nao”.

Kiăng ngă tui tơlơi lăng nao anun, Khánh Hòa glăk ječ ameč gum hrŏm hăng hơdôm ding jum, gơnong bruă gơnong dlông, ƀing kơsem min bôh thâo phrâo hăng mơnuih mơnam pioh pơjing hră pơ-ar mơ-it UNESCO tŭ yap gru grua gah bơngăt  “Ngă tui phiăn juăt ngă yang Amĭ mơyang Y Ana” mơng djuai ania Čăm amăng Hră djă pioh gru grua gah bơngăt pơ ala brơi ană mơnuih. Ră anai Khánh Hoà anăp nao tơlơi gơgrong lĕ anih phun djă pioh, kơsem min hăng lăi pơthâo gru Čăm mơng kual ia rơsĭ Dơnung Tong hăng Dap Kơdư./.