Amăng sang dlông gru đưm djuai ania, hmư̆ jua čing tơ-ua đĭ rơnang blang. Rim kơ jua čing mơñi ƀing kơhnăk thâo atông čing mưn amăng pran jua thâo krăn soh dơ̆ hnơ̆ng tai ƀudah djăl, tul pơkra jua mơñi kiăng găl djơ̆ hăng jua mơñi sa dơnuai tơlơi kiăng atông mơ̆ng rim boh čing mut tơma hrŏm amăng ring ñu. Amăng ring čing anun, hơmâo sa ring čing arap mơ̆ng sang anŏ ơi tha Siu Čơt, arăng juăt iâu Ơi Rôp, dŏ ƀơi plơi Suối Cầm, să Čư̆ Drăng, tơring čar Gia Lai dŏ djă pioh lu gưl hnơr thun ană tơčô mô yâo amăng sang anŏ, lăng kah hăng kông ngăn yom pơphăn biă mă. Ơi Siu Čơt lăi pơthâo tui anai: Rim sa boh čing hơmâo anŏ pơkă anet prong, jua mơñi hăng hơmâo anăn phara soh, sit atông pơmut hrŏm pơjing rai jua mơñi hmư̆ hiam mơak biă mă, sa boh thâo ia rơgơi gru grua ƀing thâo atông čing amăng plơi pla dŏ djă pioh pơtô glăi lu gưl rơnuk hăng anai laih.

“Anai lĕ čing Mnâm, čing anai juăt atông amăng mông ngă yang hơ̆k mơak ƀong mơñum bơni hơ-ơč, rơngiao kơ anun, hơmâo čing guh, čing tơ, čim mung bêt, mung či, čing hlai”.

Tui hăng tơlơi tơlơi ruai glăi mơ̆ng ơi Rôp, ring čing anai mơ̆ng ơi uă, amĭ ama ñu pioh glăi lu rơnuk laih. Amăng rơnuk blah wang đưm hlâo, jua čing tơ-ua hyu kiăng pơtrut pran jua ƀing hlăk ai tơdăm dra nao ngă tơhan hơkrŭ blah ayăt pơgang lŏn ia plơi pla. Truh ră anai, jua mơñi anun čing pơ anai ăt dŏ tơ-ua đĭ amăng mông ngă yang ƀhet tơngia kơ ană nge, ngă yang pơpŭ kơ mơnuih tha rơma truh tơnŭk, lu tơlơi ngă yang amăng sang anŏ, plơi pla ƀudah amăng mông hơmâo tơlơi ƀu mơak rơngôt hning hai, hơmâo jua čing yơh atông kiăng juh alum hăng djă pioh gru ama grua amĭ Jarai hơbai.

 “Hlâo adih, hlâo kơ trun nao blah ayăt arăng atông čing ba tơkai ƀing tơdăm dra ngă tơhan nao blah ayăt. Sit ƀong kơbao gơmơi ăt atông čing anai mơ̆n. Rim kơ djuai čing dưi mă yua amăng mông ngă yang mơak, ƀudah pơyua atâo hai ăt atông mơ̆n samơ̆ hơdră atông phara. Čing Arap, čing anai ñu pơ anăn phara, atông phara. Djuai ania Jarai gơmơi hơmâo djă pioh čing hơgor truh ră anai amăng mông ngă yang mơak hăng djai brŭ ƀu thâo kơƀah čing hơgor ôh”.

Greh gruñ hue ring čing đưm lăng kah hăng kông ngăn yom djă pioh hơdôm gưl rơnuk amăng sang anŏ. Ơi Rôp hơ̆k mơak adoh tơlơi adoh đưm Jarai, kiăng lăi nao tơlơi khăp jua čing atông amăng mông ngă yang mơak plơi pla. Ñu pơ-ư ang biă mă hăng ring čing đưm hơmâo djă pioh na nao rơgao lu rơnuk hăng anai laih, ƀu kơnong yom kơ čơđeh asar đôč ôh, dŏ yom amăng lăm bơngăt jua, jing kông ngăn gru grua dŏ na nao amăng tơlơi hơdip rơnuk anai.

Jua čing hơgor tơ-ua đĭ pơphun brơi yơh mông ngă yang ngui ngor mơ̆ng djuai ania Jarai. Jua čing hơgor ƀu kơnong djă er adoh, ayun suang đôč ôh, dŏ pơjing hrŏm hơdră bơtơpư̆ drơi jăn, ƀư̆ uan ayun suang lăng hiam, tơngan hơdai tơkai yak djơ̆ hrŏm jua čing mơñi pơƀuh kơ tơlơi hơdip hiam mơak. Ƀơi ƀôn Mlah, să Phú Túc, mơnuih kơhnâo kơhnăk Kpă Bưn, sa amăng hơdôm čô ƀiă mơnuih đôč dŏ djă pioh tơlơi ayun suang hănmg jua čing đưm anai phara biă mă.

Amăng sang dlông gru đưm mơ̆ng sang anŏ mơnuih kơhnâo kơhnăk Kpă Bưn, hơmâo hơgor prong dưm amăng anih pơpŭ pơyom biă mă, sô̆ ƀơi pơnăng sang lăng kah hăng kông ngăn yom pơphăn. Anai lĕ hơgor pioh yua kơ bruă atông ngă yang dĭ dŏ sang phrâo, mơak huă asơi hle, ngă yang pin ia ƀudah ngă yang pơpŭ drơi jăn tơdruă kiăng suaih pral. Amăng lăm adih dơ̆ng hơmâo 2 boh hơgor pơkŏn, pioh atông ngă yang amăng plơi, kah hăng huă pơsat, bơthi, huă lui pơsat, hơmâo tơlơi djai brŭ. Hăng ñu, rim boh hơgor lêng kơ hơmâo tơlơi či ngă bruă či pia soh, ƀu mă yua ba atông tă tăn ôh amăng mông ngă yang phara ba tơlơi ngă yang.

Tơlơi mơ̆ ngă kơ gru grua lăp đing nao mơ̆ng mơnuih kơhnâo kơhnăk gru đưm Kpă Bưn ƀơi plơi pla ñu yua hơdră atông hơgor đôč. Sit hơmâo tơlơi ngui ngor ngă yang amăng plơi, hrŏm hăng ring čing, ñu mut hrŏm amăng anih pơdah tơlơi atông čing ayun suang mơak biă mă. Tơngan ñu djă gai taih hơgor, tơkai ayun suang đhit đhơt, drơi jăn tơpư̆, rơyuh kơdưt nao rai ngik nguk, đĭ trun mơak biă mă lăng kơ ñu wơ̆t hăng hmư̆ čing hơgor tơ-ua đĭ. Mơ̆ng tơlơi ayun suang ƀư̆ ba amăng drơi jăn, tơngan hơdai tơkai yak nao, añik añik pơ anăp, der wer kơdun pơ klôn, yut nao yut rai, đhet đhot ƀư̆ kơ-iăng drơi jăn rơ-un muăn, găng añrăng biă mă. Lu thun hăng anai Kpă Bưn pơkra hơgor hăng atông hơgor, ayuh suang rah brơi ană amôn lăng hrăm tui, ñu pơtô ba amôn ƀudah tơčô  ñu pô Ksor Blưh kiah 15 thun.

“Tơ tă anai kâo dŏ suaih pral ăt gir run pơtô glăi kơ ană tơčô mô yâo atông čing, suang arap, pah hơgor. Hlăk dŏ hlăk ai ƀiă kâo juăt đuăi hyu lu anih, atông čing taih hơgor. Samơ̆ ră anai tha rơma laih kâo kiăng ƀing hlăk ai čơđai thâo khăp kơ čing hơgor ta. Tơdah gơñu kiăng hrăm kâo pơtô ba, ƀu mă anŏ hơgĕt ôh, tơña, kâo thâo kâo pơtô ba hơdôm anun. Tơlơi hơdip rơnuk anai, djop pô anăp glăi pơ djuai ania, pin ia ala plơi đôč, ƀu kơnong djă hyu čing hơgor pơdah amăng dêh čar đôč ôh, dŏ hyu pơdah truh pơ tač rơngiao dơ̆ng. Yua kơ anun, ta gir run yơh djă piho gru ama grua amĭ ơi yă ta đưm đă ră hlâo”.