Amai Nguyễn Thúy Linh, pô sang mơdrô Coffee&homestay Hoa Sứ, plơi Hữu Đức, să Phước Hữu, tơring čar Khánh Hòa prăp lui thim 2 anih đih pơdơi dong kơ ƀing tuai mơ̆ng ataih amăng hrơi ngă yang ngui Katê. Sang mơdrô pơdă hơdôm gơnam hmư̆ hing mơ̆ng tơring kah hăng: Ia măm, tơpai vang nho, mơnŏng kơbao ƀhu sa wơ̆t pơ-iă, mơnŭ rông prưh lui, hăng hơdôm mơta gơnam mơñam mơ̆ng djuai ania Chăm kah hăng kơdung bak, kơdung gui, ao pơđao...

Kiăng hrơi ngui ngor ngă yang Katê mơ-ak, să Phước Hữu iâu pơthưr giăm 300 čô čơđai sang hră, hlăk ai, ƀing đah kơmơi hrơi mơ̆ng hơdôm boh plơi pla nao hrăm suang. Mah adai hơjan hlim, samơ̆ hrơi hrăm suang pơ tơdron đă boh lông plơi Hữu Đức ăt đik đak, hao hač, hơmâo pran biă. Amai Nguyễn Thúy Linh brơi thâo:“Amăng hơdôm hrơi rơgao, ƀing adơi amai amăng plơi pơƀut kih rơmet plơi pla, lan nao rai, bơ ƀing čơđai sang hră lĕ hrăm giong tlam nao hrăm suang, kiăng truh hrơi ngui Katê nao suang tơlơi suang tơkung Y trang. Bơ rim boh sang anŏ ăt kih rơmet mơn, prăp rơmet ƀañ kĕo, boh troh, biă ñu ƀañ djuai ania Chăm. Rơngiao kơ anun, ƀuh lu plơi pla djuai ania Chăm pơkŏn ăt nao hrăm suang mơn, amăng anun gơñu pơčeh phrâo tơlơi suang, lăng hiam hloh. Hơdôm thun hlâo adih kơnong kơ hơmâo hơdôm boh plơi đôč prăp rơmet, thun anai abih bang hlao”.

Hrŏm hăng hrăm suang, hơdôm hrơi rơgao, mơnuih amăng Anom ngă ƀong hrŏm Čơlŭ mŏng gŏ lŏn Chăm Bàu Trúc pơtăng arăt mơn či pơkra rai lu čơlŭ mŏng man pơkra hăng lŏn, đah mơ̆ng sĭ kơ tuai amăng hrơi ngui Katê anai.

Ơi Phú Hữu Minh Thuần, Khua anom ngă ƀong hrŏm Čơlŭ mŏng gŏ lŏn Chăm Bàu Trúc, să Ninh Phước, tơring čar Khánh Hòa brơi thâo, ră anai rim hrơi hơmâo rơbêh 1.000 wơ̆t tuai nao pơ plơi man Čơlŭ mŏng gŏ lŏn Bàu Trúc sem lăng, hrăm man hăng blơi djă glăi. Thun anai, anom ngă ƀong hrŏm tuh pơ alin man pơdong anih pơdă čơlŭ mŏng gŏ lŏn Chăm Bàu Trúc. Anih anai ƀu kơnong pơƀuh gru hiam, tơlơi rơgơi mơ̆ng bruă man čơlŭ mŏng hăng lŏn đôč ôh, ăt jing gru hiam phara mơ̆ng djuai ania Chăm, pơlir hăng pĕ goong atông brô̆, adoh suang, djru lu tuai thâo hluh kơ tơlơi hơdip mơda, tơlơi phiăn hăng gir djă pioh gru grua mơ̆ng djuai ania Chăm. Ơi Thuần brơi thâo dong:“Thun anai tuai rai lu biă, yua anun mơ̆ Anom ngă ƀong hrŏm man pơdong thim anih bơwih brơi ƀing tuai amăng bơyan ngui ngă yang Katê anai. Tơdah ƀing tuai kiăng lĕ amra hơmâo mơn pô črâo jơlan, pơblang brơi, pơtô man ăt kah hăng pĕ atông goong brô̆ mơ̆ng djuai ania Chăm. Lơ̆m tơring čar Khánh Hòa phrâo hơmâo akŏ pơdong, jing tuai amra lu tui mơn, yua dah ƀing pôr pơhing pơtruh hăng tơring čar Ninh Thuận hơđăp hăng Khánh Hòa phrâo, yua hnun mơn hmư̆ hing hyu ataih hloh”.

Bơ ƀơi tơring čar Lâm Đồng, hơdôm hrơi anai, hơdôm anih tuai hyu ngui kah hăng: Pra yang Pô Nit pơ să Bắc Bình, pra yang Pô Klaong Mơ-nai ƀơi să Lương Sơn, Anih djă pioh gơnam yơyom mơ̆ng rơnuk Pơtao Chăm ƀơi să Hồng Thái, mơnuih ƀôn sang hơmâo rơmet rơmot hăng yôl hla kơ čar ta ƀơi sang anŏ. Biă ñu, ƀơi pra yang Pô Sah Inư ƀơi phường Phú Thủy, tơring čar Lâm Đồng amra hơmâo tơlơi gum ngă mơ̆ng 9 boh să djuai ania Chăm, hăng lu tơlơi ngui: Ayup đing Saranai, tăp pơdai, ngui tơkung ia hăng akŏ, ngui gôm mơta teng gŏ lŏn hăng pơƀuh tơlơi rơgơi man čơlŭ mŏng, gŏ lŏn, mơñam eng ao Chăm, biă ñu pơ anih pơdă mơnŏng ƀong huă Chăm.

Ơi Trần Đức Dũng, Khua wai lăng anih gru đưm pra yang Pô Sah Inư brơi thâo: “Bruă prăp rơmet ră anai hơmâo lăi pơhmư̆ hyu djŏp laih. Thun 2025, jing thun blung a mơ̆ ngui ngor Katê hơmâo pơphun tơdơi kơ tơring čar Lâm Đồng phrâo hơmâo akŏ pơdong. Lu bruă pơkŏn mơ̆ng hrơi ngui ngor anai ăt kiăng tui tơlơi phiăn, tơlơi đăo mơ̆ng djuai ania Chăm mơn, hơmâo pơphun glăi sui laih ƀơi pra yang Pô Sah Inư. Rơngiao kơ anun, ƀing gơmơi ăt pơphun hơdôm bruă yom anun lĕ tơlơi ngui ngor, adoh suang bơwih brơi ƀing tuai lơ̆m rai ngui”.

Katê jing tơlơi ngui ngor hơmâo ngă rim thun laih mơ̆ng djuai ania Chăm. Anai ƀu kơnong hrơi kiăng djuai ania Chăm pơpŭ bơni kơ ơi yă, pơpŭ kơ yang rơbang đôč ôh ăt jing pơ ala brơi tơlơi hơdip mơda, gru grua hiam hăng pran jua gum pơgôp djuai ania. Mơ̆ng rim bơyan ngui ngor, gru grua Chăm amra hơmâo djă pioh, bang hyu, djru ngă hiam tui rup gru grua phara mơ̆ng tơring čar Khánh Hòa hăng Lâm Đồng, ăt jing tơlơi gêh gal či pơƀuh hyu gru grua Chăm hăng ƀing tuai amăng dêh čar hăng čar rơngiao, djru pơđĭ tui bruă tuai hyu ngui mơ̆ng hơdôm boh tơring čar hơđong kjăp hloh.