Jơnum ngui tơpai čeh mơng djuai ania M’nông ter hang dơnao ia Lăk pơphun amăng 2 hrơi dong mơng kơnôl 29 truh kơnôl 30/8. Jơnum ngui anai yua să Liên Sơn Lăk pơphun, hơmâo 10 bruă mă hăng anăn “Men say đại ngàn-Hồn M’nông bên hồ Lắk”. Tơlơi kơđŏm glăi mơng tal pơphun Pô thâo kŏng tơpai; pơƀuh glăi bruă pơkra gô̆ lŏn mơng mơnuih djuai ania M’nông; bruă pơkra tơpoi hăng kŏng tơpai čeh; hơdôm tơlơi ngui đưm; đĭ hyu rơman, đĭ song nan hăng anih pơdă gơnam, lăi pơthâo gơnam tam, gru grua ƀon lan…

Hơdôm bruă mă anai kiăng pơpŭ, djă pioh hăng tŏ tui gru grua sô hơđăp mơng djuai ania M’nông, laih dong lăi pơthâo rup rap, ană mơnuih, gru grua, gơnam yôm phara hăng tơlơi dưi bơwih brơi tuai čuă ngui amăng ƀon lan. Ơi Nguyễn Anh Tú, Khua Jơnum min mơnuih ƀon sang să Liên Sơn Lăk brơi thâo, să čang rơmang jơnum ngui amra pơgôp ba rup rap kual lŏn, ană mơnuih djuai ania M’nông ter hang dơnao Lăk jê̆ giăm hăng tuai amăng lŏn ia hăng tač rơngiao. “Kiăng ngă lar hyu tơlơi pơhing kơ jơnum ngui tơl mơnuih ƀôn sang amăng tơring čar, đơ đam dêh čar hăng pơ tač rơngiao dong. Laih anun, pơgôp pơƀuh brơi rup rap să Liên Sơn Lăk-Anih arăng dưm dăp amăng kual pơđĭ kyar tuai čuă ngui amăng tơring čar Dak Lak hăng dêh čar ta; laih dong iâu pơthưr anom bơwih ƀong sĭ mơdrô đing nao, gum hrŏm, tuh pơ alin, pơgôp pơtrut bruă tuai čuă ngui amăng ƀon lan dưi pơđĭ kyar”.

Bơ ƀơi tong krah să Ea Knuếc, jua čing hơgor, boh pơhiăp ok or ƀơi hơdôm anih pơdă sầu riêng, gơnam OCOP hăng hơdôm bruă ngui adôh suang, tơnă hơbai. Hrơi jơnum ngui hơmâo ba gơnam tam jê̆ giăm ƀiă hăng tuai čuă ngui, pok rai anih kiăng mơnuih ƀôn sang dưi bơră ruai glăi kual pla, bruă bơwih ƀong hăng gru grua mơng ƀing gơñu.

Tơlơi kơđŏm glăi mơng jơlan hơdră anai lĕ mông pĕ “Boh sầu riêng yôm hloh” mơng sa phun sui thun ba glăi pơ anih jơnum ngui. Amăng jua čing hơgor, ƀing đah kơmơi gui rêu rô hrŏm hăng dua drơi rơman ba glăi boh sầu riêng lăng hrup rup rap ƀơi kual Dap kơdư. Tơlơi ngă yang rơkâo tơlơi trơi pơđao yâo mơ-ak mơng djuai ania Êđê ăt hơmâo pơphun glăi, kiăng pơdah tơlơi čang rơmang sa bơyan pĕ pơhrui hơmâo hmăi, sầu riêng mơboh, hơmâo nua, plơi pla trơi pơđao. Ơi Y Feel Knul, mơnuih ƀôn sang amăng ƀuôn Tara, să Ea Knuếc brơi thâo, jơnum ngui djă ba tơlơi đăo gơnang hăng čang rơmang mơnuih pla sầu riêng. “Anai ăt lĕ hrơi mông kiăng pơƀuh brơi gru grua djop djuai ania amăng kual brơi abih bang gơyut gơyâo, tuai rơnguai. Jing sa čô mơnuih pla sầu riêng, kâo čang rơmang gơnam đang hmua sĭ nua hơđong ƀiă kiăng neh met wa plai ƀiă glêh glar”.

Amăng hơdôm bruă mă hăng anăn “Ea Knuếc yak nao bơyan pĕ pơhrui” ăt hơmâo jơnum sang čơ sĭ mơdrô, pơdă prưng gơnam OCOP, gơnam đang hmua, nao lăng đang pla hăng livestream lăi pơthâo sầu riêng amăng plang mơnuih mơnam. Mơng anun, ngă jơnum ngui sầu riêng Dak Lak dưi lar hyu djop kual pla, ba tuai čuă ngui hăng ƀing blơi pơhrui jê̆ giăm ƀiă mơnuih pla.

Amăng mông pơphun, să Ea Knuếc ăt lăi pơthâo anăn bơwih ƀong hrŏm “Sầu riêng Ea Knuếc”. Yă Trần Thị Vân, kơ-iăng Khua Jơnum min mơnuih ƀon sang să brơi thâo, anai lĕ tơlơi pơ-ư ang mơng ƀon lan, laih dong ngă atur pơsit tong anăn apăn sĭ mơdrô, hrưn đĭ nua gơnam, pok prong anih sĭ mơdrô hăng anăp nao pơđĭ kyar hơđong kjăp. “Tơdơi kơ jơnum ngui anai, ƀon lan amra tŏ tui pơtrut kơtang pơplih mrô, lăi pơthâo boh sầu riêng amăng plang sĭ mơdrô điện tử. Mơng anun anăn apăn gơnam mơng să hơmâo pơsit tong hăng mơnuih ƀôn sang hur har ngă hmua kiăng pơhlôm gơnam hiam hơdjă, pơđĭ kyar sầu riêng hơđong kjăp”.

Să Ea Knuếc ră anai lĕ sa amăng hơdôm kual pla sầu riêng prong hloh amăng tơring čar Dak Lak hăng giăm 6.000 ektar; amăng anun hơmâo rơbêh 2.800 ektar glăk pĕ pơhrui, sầu riêng pơhrui him lăng rơbêh 70.000 tơ̆n, abih tih nua ñu giăm 4.000 klai prăk. Pơsit tong sầu riêng lĕ gơnam pla phun, ƀon lan đing nao pơjing mrô kual pla, anih anung gơnam, pơƀuh brơi anih pla, pơđĭ kyar bơwih ƀong hrŏm hăng pơlir pla pơjing, blơi pơhrui./.