Yang hrơi tlam ƀơi plơi Đăk Trăm 1, să Kon Đào, tơring čar Quảng Ngãi. Tơdơi kơ ha hrơi ngă hmua, ƀơi lan sang mơnuih kơhnâo gru đưm A Thu mơñi tơ-ua jua čing, đing t’rưng, đing pơng (klông put), čing boh pơtâo. Ƀing tha, tơdăm dra, hơmâo tom ƀing čơđai hai nao hrăm. Đa hrăm atông čing, pel lăng goong, đa dŏ pơhmư̆ ayong A Thu tul čing, ƀư̆ pơkra ming hrĕ goong.

Amăng hrơi blan djă pioh hăng pơtrut tui anŏ yom mơ̆ng goong brô̆ đưm, ayong A Thu ƀu kơnong thâo atông čing đôč ôh, ñu gir hyu hơduah tơña, pơkra, hăng rŭ pơjing glăi lu mơta goong brô̆ đưm. Biă ñu, mơng thun 2017, ñu pel ĕp sem lăng čing boh pơtâo. Mơ̆ng 5 tlŏ pơtâo blung a, ayong A Thu gir sem lăng, pơkra ming kiăng hơmâo ring čing boh pơtâo 15 jua mơñi. Hrŏm hăng čing čêng, t’rưng, đing pơng, đing pah, hơgor..., jua mơñi anun jing ha bơnah yom ba pơdah amăng hrơi ngui ngor pĕ goong atông brô̆ yua mơnuih kơhnâo anai ba jơlan. Ayong A Thu lăi:“Mơ̆ng hrơi kâo hơmâo lu mơnuih thâo, hmư̆ hing, gơñu iâu kâo nao pơtô atông čing. Să pơpă thơ hơmâo čing lĕ gơñu iâu kâo nao pơtô. Mơ̆ng anun truh kơ ră anai kâo hơmâo pơtô brơi rơbêh ha rơtuh anih hrăm laih. Kâo nao pơtô pơ hơdôm boh sang hră, gưl dua, sang hră kơnuk kơna čem rông. Plơi pla pơpă thơ kiăng hrăm atông čing lĕ kâo nao pơtô. Kâo pơtô atông čing rah, ƀrô pơhmư̆ yŭ jua mơñi, tul pơkra čing; rơngiao kơ anun pơtô pah đing pơng, atông đing t’rưng, atông čing boh pơtâo tui hluai kơ arăng kiăng hrăm”.

Tơlơi yom hloh ƀơi mơnuih kơhnâo A Thu ƀu djơ̆ bruă ñu thâo pĕ atông ƀudah thâo pơkra goong brô̆ đôč ôh. Ñu gir kiăng ƀing hlăk ai amăng plơi hlơi hlơi leng kơ thâo pĕ atông soh, thâo hmư̆ hăng thâo hluh anŏ yom mơ̆ng jua mơñi anun. Grup atông čing, ayun suang hăng pĕ goong brô̆ đưm yua A Thu iâu pơmut hơmâo hơdôm pluh čô, tha hơmâo, čơđai hơmâo. Mơ̆ng thun 2019 truh ră anai, grup hơmâo lu wơ̆t laih nao pơplông, pĕ atông, ayun suang brơi arăng lăng amăng mông jơnum ngui amăng tơring čar wơ̆t hăng tơring čar pơkon. Thun 2025, ƀing kơhnâo gru đưm ăt djă ba jua mơñi djuai ania Sêdang nao pơ Plơi Gru grua - Tuai čuă ngui djjŏp djuai ania Việt Nam ƀơi Đồng Mô, Hà Nội. Mơnuih kơhnâo A Hương, 47 thun, ƀơi plơi Đăk Trăm 1, jing sa amăng hơdôm čô mơnuih hơmâo lu thun laih mut amăng grup ơi A Thu, ñu lăi:"Hlâo adih, kâo thâo trah rup đôč, tơdơi kơ anun mut amăng grup atông čing hăng pĕ goong brô̆ đưm mơ̆ng ayong A Thu. Ñu pơtô brơi kâo atông čing hăng pĕ djŏp goong brô̆ đưm. Ñu ba hyu ƀing gơmơi nao jơnum ngui lu anih yơh, kah hăng Plơi gru grua - tuai hyu ngui Đồng Mô ƀơi Hà Nội, Lâm Đồng, Dak Lăk. Mơ̆ng anun ƀing gơmơi hơmâo hrăm tui hăng ba pơƀuh gru grua hiam mơ̆ng djuai ania gơmơi”.

Ơi A Don, Kơ-iăng khua anom bruă gru grua să Kon Đào, tơring čar Quảng Ngãi lăi, hơdôm bruă ngă mơ̆ng mơnuih kơhnâo gru đưm A Thu ƀu pơdơi dơ̆ bruă djă pioh goong brô̆ čing čêng ƀudah hơmâo sa grup adoh suang đôč ôh. Anun lĕ bruă ĕp ƀuh, pơdô̆ glăi kơ rơnuk tơdơi djă pioh gru ama grua amĭ. Ñu pơtô brơi atông čing hăng pĕ goong atông brô̆ kơ hơdôm rơtuh čô tui hrăm ƀơi hơdôm boh sang hră hăng amăng plơi pla; laih dong pơtô brơi lu mơnuih thâo tul, ƀư̆ pơkra čing hăng pơhmư̆ jua čing mơñi hiưm pă mơ̆ng mơak. Hơmâo mơn mơnuih tui hrăm tơdơi kơ rơguăt laih ăt kiăo tui grup hlao mơtăm, hrŏm hăng ñu pơtô glăi kơ ƀing đơ anet hloh. Ơi A Don, Kơ-iăng khua Anom bruă gru grua să Kon Đào, brơi thâo:“Kâo lăng mơnuih kơhnâo A Thu gum pơgôp lu biă mă amăng bruă djă pioh hăng pơtrut tui čing hơgor, goong brô̆ djuai ania Sêdang. Ñu gir pơtô atông čing hăng djŏp goong brô̆ đưm kơ neh met wa amăng plơi pla hăng abih bang hơdôm boh plơi pơkŏn dong amăng să. Rơngiao kơ pơtô atông čing amăng să, mơnuih kơhnâo gru đưm A Thu ăt nao pơ să pơkŏn dong amăng tơring čar či pơtô kơ hơdôm boh sang hră hăng hơdôm boh plơi hơmâo čing, hơmâo goong brô̆ laih anun hor či hrăm. Kâo lăng A Thu jing sa čô mơnuih gir biă mă amăng bruă djă pioh, pơtrut tui anŏ hiam mơ̆ng čing hăng goong brô̆ djuai ania Sêdang, anun jing bruă yom, lăp bơni biă mă”.

Anŏ yom hloh ƀơi mơnuih kơhnâo gru đưm A Thu lĕ ñu ƀu kơnong răk pioh jua mơñi mơ̆ng djuai ania Sêdang hăng sit tơngan ñu ôh, ăt pơtô glăi tơlơi kiăng khăp hăng jua mơñi anun hăng pran jua ƀing hlăk ai. Anun yơh jing bruă prong hloh mơ̆ng Mơnuih kơhnâo A Thu: ƀu pioh jua mơñi mơ̆ng ơi yă rơngiă hĭ ôh, khŏm ngă brơi jua mơñi anun mơñi tơ-ua na nao amăng tơlơi hơdip rơnuk anai./.