Kơnôl 30/8, să Vân Hòa, tơring čar Dak Lăk, čơkă mă hră tŭ yap anăn Gơnam yom Việt Nam hăng 1 phun Cộng (đa iâu phun Sui tui yuan pia) hăng 3 phun kyâo Săi mriah, phrâo hơmâo Khul pơgang ayuh hyiăng anih hơdip Việt Nam tŭ yap. 3 ƀĕ phun săi mriah rơbêh kơ 200 thun laih, bơ phun Cộng rơbêh 350 thun laih. Phun săi mriah hơdip hơdôm rơtuh thun, brơi kơ ană plơi ƀong boh hơdôm rơtuh thun mơn, bơ phun Cộng brơi kơtăk pik ƀơi gai amrom mơ̆ng thun blan nao čong jơnah jah glai, akŏ pơdong plơi pla, hyu đom bua lua bơnah, pơkơdong glăi ayăt roh.

Mơ̆ng đưm đă ră hlâo laih, hơdôm ƀĕ phun kyâo anai jing pô dŏ lăng, ƀuh rơnuk đưm, ƀuh gru grua, anŏ hiam mơ̆ng kual lŏn, jing tơlơi pơ-ư pơ-ang mơ̆ng ană plơi pơ anai. Ayong Lê Quốc Nam, să Vân Hòa, tơring čar Dak Lăk pơ-ư pơ-ang: “Phun kyâo Cộng anai hơdip hơdôm rơnuk laih, angin rơbŭ hơkruah yâo ăt dŏ hơdip đôč. Yua hnun phun Cộng anai hăng neh met wa ăt jing anŏ kơnang prong biă. Ñu kar hăng ană mơnuih gơmơi pơ anai mơn”.

Hrŏm hăng bruă tŭ yap phun kyâo yom, să Vân Hòa ngui ngor pơƀuh glăi sang čơ Chợ Đồn gah yŭ phun kyâo Cộng. Anai jing sang čơ hơmâo mơ̆ng hơdôm rơtuh thun hlâo laih, amăng thun blan tŏ tui mơ̆ng kual ia rơsĭ truh pơ dap kơdư. Laih dong pơphun bruă pơƀuh hyu, pơtruh anom bruă sĭ mơdrô tuh pơ alin hăng ngă hrŏm ƀơi kual lŏn Vân Hòa; pơtrut hơdôm bruă čơkă tui hyu ngui nao lăng hơdôm đang phun săi mriah - djuai phun hmư̆ hing pơ kual lŏn anai.

Ơi Phạm Quốc Hòang, Kơ-iăng khua jơnum min mơnuih ƀôn sang să Vân Hòa brơi thâo, thâo rơđah anŏ yom mơ̆ng phun kyâo đưm, gong gai hrŏm hăng mơnuih ƀôn sang lăp đing nao bruă wai pơgang hăng pơtrut tui anŏ yom mơ̆ng phun kyâo đưm: “Gơmơi glăk prăp rơmet lăng glăi hơdôm djuai phun anai laih anun iâu ƀing kơhnâo bruă hmua glai rưng či pơtŏp brơi, djru rông pla, pơgang ba phun săi mriah hăng phun cộng anai, kiăng čăt hiam hloh, laih dong kiăng mơnuih ƀôn sang dưi ngă anih či čơkă tuai nao ngui”.

Ră anai gah Ngŏ Dak Lăk hơmâo 25 phun kyâo prong hơmâo tŭ yap amăng hră. Rơngiao kơ phun cộng hăng 3 phun săi mriah phrâo lăi nao, ăt hơmâo mơn 20 phun boh pơ-ô̆ prong krên dên ƀơi Anih gru grua phun Dêh čar pra yang Từ Quang, să Tuy An Bắc, hăng 1 phun bơnŭ rơbêh 200 thun laih ƀơi anih gru đưm Dêh čar Pra yang Mơnuih rơgơi kơhnâo Lương Văn Chánh.

Ơi Nguyễn Thành Sơn, Kơ-iăng khua anom bruă Gru grua - Mơnuih mơnam, să Phú Hòa 2, tơring čar Dak Lăk brơi thâo, hơdôm boh sang anŏ, plơi pla hơmâo phun kyâo yom anai leng kơ gơgrong bruă, thâo pơmin hloh, gum djă pioh “gơnam yom mơtah” anai:  “Rim thun ƀing gơmơi iâu pơthưr sang anŏ, kơnung djuai ƀing gơñu wơ̆t hăng ană plơi, biă ñu hlâo kơ bơyan hơjan jing gơmơi čơkă trơ̆i kiăng hiam, rơmet rơmot, hŭi kơ hơmâo phun kyâo rơbuh amăng bơyan hơjan kơthel”.

Hơdôm rơtuh thun rơgao, hơdôm phun kyâo prong - kyâo yom mơ̆ng đưm ăt kơčao akha kjăp khŏp amăng lŏn, ăt bluh đĭ hiam, dŏ hrŏm hăng ƀing ta truh rơnuk anai, kar hăng mơnuih dŏ lăng djŏp gru tơhnal phun mơ̆ng kual lŏn, mut amăng tơlơi pơmin pran jua djŏp rơnuk. Bruă djă pioh phun kyâo yom djă gru Việt Nam ƀu kơnong yom kơ anih anom, hơmâo djŏp mơta ra mơnŏng đôč ôh, ăt jing tơlơi pơpŭ kơ rơnuk gru phun, thâo pơpŭ bơni hăng ơi yă đưm čong jơnah jah glai, bơwih ƀong hơdip mơda, djă pioh kơ rơnuk anai hăng truh rơnuk tơdơi dong./.