Hơdôm hrơi rơnuč thun, mơnuih ƀôn sang djuai ania Bahnar plơi Mơhra, să Kông Lơng Khơng, tơring glông Kƀang, tơring čar Gia Lai hok mơak čơkă tuai rai mơ̆ng Hà Nội. Tuai hok mơak biă mă hơmâo dŏ ngui ƀong mơñum hrŏm hăng hơdôm mơta asơi jơman añăm ƀâo bơngưi, asơi braih ƀlit ƀâo phu, añăm mơnong hơkŏp hăng hla pơtơi, añăm brông amăng đing djrao, añăm mơnong mơnŭ ăm, k’hang apui a djuh laih anun mơñum tơpai čeh jơman biă mă; dŏ ƀong mơñum rah hmư̆ jua tơrưng, čing hơgor ik ăk bơwih brơi kơ tuai čuă ngui hmư̆ hăng lăng. Amai Lê Thị Phương, tuai mơ̆ng Hà Nội, brơi thâo:

“Anai lĕ tal blung a kâo rai djơ̆ pơ Gia Lai, ăt kah hăng tal blung a mơ̆n kâo ƀuh arăng atông čing ring hơgor kual Dap Kơdư ƀơi anăp mơta. Biă mă ñu ƀuh ƀing čơđai muai pơdah hrŏm, lăng mơak biă mă pơhưč pran jua ta, dŏ amăng anih mơak hlak rơnuk rơnua biă mă”.

Hrŏm hăng plơi Mơhra, să Kông Lơng Khơng, tơring glông Kƀang, tơring čar Gia Lai hơmâo akŏ pơdong plơi pla tuai hyu ngui amăng plơi djuai ania Bahnar, hơmâo plơi Kdang, să Kông Lơng Khơng, plơi Stơr, să Tơtung, plơi Kon Bông, să Đak Rong hăng plơi Čiêng, tơring kual Kƀang. Tha plơi, ơi Đinh Mưñ, plơi Mơhra, să Kông Lơng Khơng brơi thâo:

“Ƀing gơmơi prăp lui jưh dŏ homestay lĕ gru đưm brơi tuai đih glăi, sang anŏ gơmơi tơnă brơi asơi añăm tui tơlơi phiăn juăt đưm hăng braih pơdai kĭ, pơdai ke, hyu yâo akan amăng ia čroh hnoh ngă añăm hơkŏp brơi ƀing tuai ƀong, akă tơpai čeh mơñum, laih anun adoh ngui mơak. Ƀing tuai ƀuh hnun hor biă mă. Tuai rai lĕ pit đih pơ sang hlơi tŭ mơ̆n. Kâo tha plơi, kâo hrŏm hăng ană plơi pla ăt gir run yơh amăng bruă anai”.

Amai Trần Thị Bích Ngọc, mơnuih apăn bruă amăng să Kông Lơng Khơng, tơring glông Kƀang brơi thâo, bruă djă pioh hăng pơgang lui gru grua hiam đưm mơ̆ng anih anom djă pioh truh pơ tơlơi phiăn juăt hiam klă lĕ đing nao soh kiăng pioh brơi mơnuih ƀôn sang pơdah thâo amăng bruă čơkă tuai hyu ngui hơđong:

“Mơ̆ng bruă čơkă tuai hyu ngui dŏ glăi amăng plơi pla djop hơbô̆ bruă djă pioh kông ngăn gru grua đưm mơnuih ƀôn sang rŭ glăi kah hăng čing hơgor, bruă krih mơñam rêu ro, rơ-i čơkua, mơñam mrai...Mơnuih ƀôn sang gir run djă pioh rah hăng pơđĭ tui rơnoh yom gru grua kông ngăn anun hăng pơtrut bruă čơkă tuai hyu ngui ĕp lăng dŏ glăi amăng plơi pla. Mơ̆ng anun djru hrŏm pơhrui glăi prăk kăk kơ ană plơi pla amăng ƀôn lan”.

Ƀu kơnong kơ hơdôm plơi pla čơkă tuai đôč ôh, ƀơi hơdôm boh să hơmâo lu mơnuih djuai ƀiă, bruă mă djă pioh gru grua hiam anăp nao bruă čơkă tuai hyu ngui hơđong ăt dưi đing nao pok pơhai. Ơi Trần Xuân Nam, Khua jơnum min mơnuih ƀôn sang să Lơku, tơring glông Kƀang brơi thâo:

“Hơdôm boh plơi pla prăp lui bruă djă pioh gru grua hiam đưm djuai ania Bahnar. Hrŏm hăng anun, ƀing gơmơi pok pơhư prong tui lu gru grua hiam djuai ania pơkŏn amăng să kah hăng djuai ania ƀiă kual gah kơdư adih, Hmông, Tày pơdah brơi tuai ĕp lăng ăt hiam mơak mơ̆n. Biă mă ñu amăng bơyan ƀong têt čơkă thun phrâo, să pơphun jơnum mơak bơyan puih phang, bơyan bơnga čuh, djop plơi pla Bahnar ngă hrŏm atông čing suang arap. Yua kơ anun, hơdôm plơi pla pơkŏn amăng thâo hluh pơgang hăng djă pioh gru grua hiam đưm”.

Mơ̆ng thun 2022, tơring glông Kƀang tuh pơ alin 4 klai prăk ngă tui akŏ bruă djă pioh hăng pơđĭ tui gru grua hiam đưm djop djuai ania ƀiă lir hơbit hăng bruă čơkă tuai hyu ngui mơ̆ng thun 2021-2025. Ơi Đinh Đình Chi, Khua anom bruă Gru grua tơlơi pơhing tơring glông Kƀang, brơi thâo, tơring glông ăt pơtlep hăng lu bruă mă pioh djru kơ mơnuih ƀôn sang djă pioh gru grua hiam hơđăp, kiăng pơsir bruă mă tơlơi bơwih ƀong huă kơ mơnuih ƀôn sang:

“Mơta sa lĕ tuh pơ alin čuk pơkra jơlan nao rai, anih dŏ hiam klă, dua lĕ djă pioh hăng pơlar tui gru grua hiam, kông ngăn đưm djuai ania ƀiă, pơtruh nao rai hăng lu plơi pla tơring glông pơkŏn kiăng akŏ pơjing sa ruăi ba tuai hyu ngui. Sit hơmâo tuai mut nao ngui amăng plơi lĕ, pơtô hrăm kơ mơnuih ƀôn sang thâo hơdră pơphun bruă mă, čơkă tuai apah prăk, djru bơwih ƀong huă; blung a mă gơnam gru grua kông ngăn đưm hơmâo baih hlâo pioh pơdah brơi tuai ĕp lăng laih anun prăk tuai apah dŏ glăi blơi gơnam, prăk ƀong huă anun yơh djru mơnuih ƀôn sang bơwih ƀong huă, pơsir bruă mă”.